 |
ການພົບປະຄັ້ງນີ້, ຖືເປັນອີກເວທີໜຶ່ງ ໃນການຊຸກຍູ້ສົ່ງເສີມຜັນຂະຫຍາຍການຮ່ວມມື ໃນການລົງທຶນທາງດ້ານການເງິນ ແລະ ສົ່ງເສີມຕະຫຼາດທອງຄໍາອອກສູ່ຕະຫຼາດສາກົນ, ສຶກສາແລກປ່ຽນນະໂຍບາຍການຊື້-ຂາຍ ທອງຄໍາໃນຕະຫຼາດສາກົນ, ການຊໍາລະສະສາງຕ່າງໆ ແລະ ສ້າງຄວາມປອດໄພໃນການເກັບຮັກສາທອງຄໍາ.
ຜົນໄດ້ຮັບໃນການປຶກສາຫາລືແລກປ່ຽນບົດຮຽນໃນຄັ້ງນີ້, ເຫັນວ່າສໍານັກງານສົ່ງເສີມການລົງທຶນ (Invest HK) ເປັນອົງການໜຶ່ງທີ່ສໍາຄັນຂອງລັດຖະບານເຂດປົກຄອງພິເສດຮົງກົງ ສປ ຈີນ ເຮັດໜ້າທີ່ເປັນຜູ້ຊຸກຍູ້ສົ່ງເສີມນັກລົງທຶນທັງພາຍໃນ ແລະ ຕ່າງປະເທດ ພ້ອມທັງເປັນຜູ້ຈັດຕັ້ງປະຕິບັດນະໂຍບາຍຂອງລັດຖະບານ ເພື່ອສ້າງລາຍຮັບ ແລະ ຜົນປະໂຫຍດອັນສູງສຸດໃຫ້ລັດຖະບານເຂດປົກຄອງພິເສດຮົງກົງ ສປ ຈີນ. ໃນນັ້ນ, ສາມາດສຶກສາໄດ້ວ່າ ເຂດປົກຄອງພິເສດຮົງກົງ ສປ ຈີນ ເປັນສູນລວມທາງດ້ານການເງິນ ແລະ ການລົງທຶນສາກົນ ເປັນປະຕູດ່ານໜ້າເຂົ້າສູ່ຕະຫຼາດສາກົນ ທີ່ມີບັນດາບໍລິສັດໃຫຍ່ໆຈາກທົ່ວໂລກ ໃຫ້ຄວາມສໍາຄັນໃນການລົງທຶນໃນຂົງ ເຂດການເງິນ ແລະ ຕະຫຼາດທອງຄໍາສາກົນ ແລະ ເຫັນວ່າເປັນບາດກ້າວອັນສໍາຄັນໃນການສ້າງຜົນປະໂຫຍດໃຫ້ ສປປ ລາວ ແລະ ສາມາດຜັນຂະຫຍາຍການຮ່ວມມື ຊຸກຍູ້ສົ່ງເສີມການລົງທຶນໃນຂະແໜງການເງິນ, ຂະແໜງອຸດສາຫະກໍາທອງຄໍາ, ການເງິນສີຂຽວ, ພັນທະບັດສີຂຽວ, ສິນເຊື່ອກາກບອນ ແລະ ບັນດາຂະແໜງການອື່ນໆ ຢູ່ ສປປ ລາວ ໃນອະນາຄົດ. ການເຄື່ອນໄຫວຄັ້ງນີ້, ຍັງໄດ້ພົບປະກັບບັນດາສະຖາບັນການເງິນສໍາຄັນຢູ່ເຂດປົກຄອງພິເສດຮົງກົງ ສປ ຈີນ ຈຳນວນໜຶ່ງຕື່ມອີກ.
ຂ່າວ: ກະຊວງການເງິນ
ຄໍາເຫັນ