 |
ໃນພິທີ, ສະຫາຍ ທອງສະຫວັນ ພົມວິຫານ ແລະ ສະຫາຍ ນາງ ຟາງ ຫົງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໄດ້ຂຶ້ນກ່າວຄໍາເຫັນ ໂດຍໄດ້ຍົກໃຫ້ເຫັນ ເຖິງຄວາມໝາຍຄວາມສໍາຄັນຂອງວັນດັ່ງກ່າວ ກໍຄືການພົວພັນຮ່ວມມື ລະຫວ່າງ ສປປ ລາວ ແລະ ສປ ຈີນ ໃນຕະຫຼອດໄລຍະ 6 ທົດສະວັດເຄິ່ງທີ່ຜ່ານມາ ຊຶ່ງສາຍພົວພັນມິດຕະພາບທີ່ເປັນມູນເຊື້ອ ລະຫວ່າງ ສອງປະເທດ ແລະ ປະຊາຊົນສອງຊາດ ລາວ-ຈີນ; ຈີນ-ລາວ ໄດ້ຮັບການພັດທະນາ ແລະ ເພີ່ມພູນຄູນສ້າງຈາກການນໍາຮຸ່ນຕ່າງໆ ແລະ ໄດ້ຮັບການຍົກລະດັບຂຶ້ນເປັນ “ຄູ່ຮ່ວມມືຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ” ແລະ ການສ້າງເປັນຄູ່ຮ່ວມຊາຕາກໍາ ລາວ-ຈີນ; ຈີນ-ລາວ ຊຶ່ງໄດ້ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດຕະຫຼອດມາ. ພິເສດ, ໂຄງການເສັ້ນ ທາງລົດໄຟ ລາວ-ຈີນ ໄດ້ກາຍເປັນສັນຍາລັກອັນພົ້ນເດັ່ນແຫ່ງການຮ່ວມມື ແລະ ເຊື່ອມຈອດ ລະຫວ່າງສອງປະເທດ ແລະ ກາຍເປັນເສັ້ນທາງເຊື່ອມຕໍ່ອັນສໍາຄັນໃນການເຊື່ອມໂຍງ ແລະ ເຊື່ອມ ຈອດຂອງພາກພື້ນ ແລະ ສາກົນ.
ສປປ ລາວ ແລະ ສປ ຈີນ ເປັນປະເທດບ້ານໃກ້ເຮືອນຄຽງທີ່ມີສາຍພູ ສາຍນໍ້າ ຕິດຈອດກັນ, ປະຊາຊົນສອງຊາດມີສາຍພົວພັນມິດຕະພາບອັນເປັນມູນເຊື້ອມາແຕ່ບູຮານນະການ ແລະ ສະໜັບສະ ໜູນຊ່ວຍເຫຼືອຊຶ່ງກັນ ແລະ ກັນ ທັງໃນໄລຍະຕໍ່ສູ້ກູ້ຊາດ ກໍຄືການພັດທະນາ ແລະ ສ້າງສາປະເທດ ຊາດໃນປັດຈຸບັນ. ຕະຫຼອດໄລຍະ 65 ປີ ຜ່ານມາ, ການພົວພັນຮ່ວມມື ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ທັງທາງດ້ານການເມືອງ, ຄວາມໝັ້ນຄົງ, ເສດຖະກິດ, ການຄ້າ ແລະ ການລົງທຶນ, ວັດທະນະທໍາ-ສັງຄົມ ແລະ ດ້ານອື່ນໆ ໄດ້ຮັບການເພີ່ມທະວີຢ່າງຮອບດ້ານ, ຕໍ່ເນື່ອງ ແລະ ຂຶ້ນສູ່ລະດັບໃໝ່. ອັນພົ້ນເດັ່ນ, ສະເພາະປີ 2025, ການຄ້າສອງຝ່າຍບັນລຸໄດ້ເກືອບ 10 ຕື້ໂດລາ (ເພີ່ມຂຶ້ນເກືອບ 20%). ນອກຈາກນີ້, ການລົງທຶນຂອງ ສປ ຈີນ ຍັງຄອງອັນດັບຕົ້ນໆ ຂອງການລົງທຶນຈາກຕ່າງປະເທດ ຢູ່ ສປປ ລາວ (ລວມມູນຄ່າສະສົມປະມານ 18 ຕື້ກວ່າໂດລາ). ຄຽງຄູ່ກັນນີ້, ນັບແຕ່ການເປີດບໍລິການນໍາໃຊ້ລົດໄຟ ລາວ-ຈີນ ໃນວັນທີ 3 ທັນວາ 2021 ເປັນຕົ້ນມາ, ສາມາດຂົນສົ່ງຜູ້ໂດຍສານໄດ້ຫຼາຍກວ່າ 11 ລ້ານເທື່ອຄົນ ແລະ ຂົນສົ່ງສິນຄ້າໄດ້ເກືອບ 17 ລ້ານໂຕນ. ສປປ ລາວ ຍັງເປັນປະເທດທີ່ມີນັກທ່ອງທ່ຽວຈີນ ມາທ່ຽວຫຼາຍທີ່ສຸດ ຊຶ່ງຈັດຢູ່ໃນອັນ ດັບທີ 3 (ຮອງຈາກໄທ ແລະ ຫວຽດນາມ) ສະເພາະປີ 2025 ມີທັງໝົດຫຼາຍກວ່າ 1 ລ້ານຄົນ.
 |
ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າ ຈາກ ລັດຖະບານ ແລະ ປະຊາຊົນຈີນອ້າຍນ້ອງ ຊຶ່ງໄດ້ປະກອບສ່ວນອັນສໍາຄັນເຂົ້າໃນການປົກ ປັກຮັກສາ ແລະ ສ້າງສາພັດທະນາປະເທດລາວ ຕະຫຼອດໄລຍະຜ່ານມາ ພ້ອມທັງໄດ້ເນັ້ນວ່າ ໃນທ່າມກາງສະພາບການສາກົນ ພວມຜັນແປໄປຢ່າງສະຫຼັບສັບຊ້ອນ ແລະ ຄາດຄະເນໄດ້ຍາກ ຄືໃນປັດຈຸບັນ, ສອງປະເທດ ແລະ ປະຊາຊົນສອງຊາດ ລາວ-ຈີນ ຍິ່ງຕ້ອງສືບຕໍ່ຮັດແໜ້ນການເສີມ ຂະຫຍາຍສາຍພົວພັນຮ່ວມມືມິດຕະພາບທີ່ເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ ໝັ້ນ ຄົງ ຍາວນານ ຕາມທິດ 4 ດີ ແລະ ການສ້າງເປັນຄູ່ຮ່ວມຊາຕາກໍາ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ; ຈີນ-ລາວ ໃຫ້ມີຄຸນນະພາບສູງ, ມາດຕະຖານສູງ ແລະ ລະດັບສູງກວ່າເກົ່າ ກໍຄື ໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຢ່າງບໍ່ຢຸດຢັ້ງ ເພື່ອເປັນ ກໍາລັງແຮງປະກອບສ່ວນເຂົ້າໃນການສົ່ງເສີມສັນຕິພາບ, ມິດຕະພາບ ແລະ ການຮ່ວມມືເພື່ອການພັດ ທະນາແບບຍືນຍົງ ຢູ່ໃນພາກພື້ນ ແລະ ໃນໂລກ.
ໃນພິທີດັ່ງກ່າວ, ການນໍາຂັ້ນສູງຂອງລາວ ແລະ ຈີນ ພ້ອມດ້ວຍບັນດາແຂກທີ່ມີກຽດ ຍັງໄດ້ ຢ້ຽມຊົມການວາງສະແດງຮູບພາບສາຍພົວພັນການທູດ ລາວ-ຈີນ ຄົບຮອບ 65 ປີ ແລະ ຮັບຊົມວີດີ ໂອສັ້ນ ການພົວພັນ ລາວ-ຈີນ ອີກດ້ວຍ.
(ຂ່າວ: ກຕທ)
ຄໍາເຫັນ