ທ້າຍອາທິດຜ່ານມາ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບການເຂົ້າພົບປະຂອງ ທ່ານ ໂຢເກສວາ ສັງວານ (Yogerhwar Sangwan) ເອກອັກຄະລັດຖະທູດອິນເດຍ ປະຈຳລາວ ພ້ອມຄະນະ ເພື່ອປຶກສາຫາລືການຮ່ວມມືສອງຝ່າຍ ດ້ານການຄ້າອຸດສາ ຫະກຳ ແລະ ການລົງທຶນດ້ານຕ່າງໆ ລະຫວ່າງ ລາວ ແລະ ອິນເດຍ ທີ່ມີມາແລ້ວນັ້ນ ໃຫ້ນັບມື້ຈະເລີນງອກງາມຍິ່ງຂຶ້ນເລື້ອໆ.
ການຮ່ວມມືດ້ານການຄ້າ ໃນປີ 2024 ມີສິນຄ້າຂອງລາວ ທີ່ສົ່ງອອກໄປອິນເດຍ ມູນຄ່າ 51,149,184 ໂດລາ ແລະ ສິນຄ້ານໍາເຂົ້າຈາກອິນເດຍ ມູນຄ່າ 32,023,048 ໂດລາ, ສິນຄ້າຫຼັກທີ່ລາວສົ່ງອອກ ປະກອບມີ: ຄຳປະສົມ, ຄຳແທ່ງ, ເຄື່ອງໃຊ້ໄຟຟ້າ, ອຸປະກອນເຄື່ອງ ໃຊ້, ຜະລິດຕະພັນປະສົມເຄມີສຳເລັດຮູບ, ຊືນ, ເຄື່ອງທີ່ເຮັດດ້ວຍຊືນ, ໄມ້ແປຮູບ, ເຄື່ອງສຳເລັດຮູບ, ເກີບ ແລະ ອື່ນໆ. ສ່ວນສິນຄ້າຫຼັກທີ່ລາວນໍາເຂົ້າ ປະກອບມີ: ຜະລິດຕະພັນການຢາ (ເພສັດຊະກຳ), ພາຫະນະທາງບົກ (ນອກ ຈາກລົດໄຖນາ ແລະ ລົດຈັກ), ອາຫານສັດ, ໜັງດິບ, ໜັງຟອກ, ຜະລິດຕະພັນດິນເຜົາ, ເສັ້ນທາງສັງເຄາະ, ເພັດ ແລະ ອື່ນໆ ກົນໄກການຄ້າລະຫວ່າງລາວ-ອິນເດຍ ສ່ວນໃຫຍ່ແມ່ນປະຕິບັດພາຍໃຕ້ຂອບສັນຍາອາຊຽນບວກອິນເດຍ.
ການພົບປະຄັ້ງນີ້, ສອງຝ່າຍໄດ້ແລກປ່ຽນ ແລະ ສະເໜີການຮ່ວມມືສອງຝ່າຍໃນຕໍ່ໜ້າ ເປັນຕົ້ນ ສະເໜີໃຫ້ມີການແລກປ່ຽນຂໍ້ມູນລະຫວ່າງນັກທຸລະກິດ ລາວ-ອິນເດຍ ຢ່າງເປັນປະຈຳ ຜ່ານສະຖານທູດ ຫຼື ກອງປະຊຸມພົບປະສອງປະເທດ ເພື່ອດຶງດູດນັກລົງທຶນສອງປະເທດ ໃຫ້ນັບມື້ຫຼາຍຂຶ້ນ ແລະ ເພື່ອຊອກຫາຊ່ອງທາງໃນການສົ່ງອອກສິນຄ້າຂອງລາວ ໄປຍັງຕະຫຼາດອິນເດຍ, ສະເໜີໃຫ້ມີການແລກປ່ຽນບົດຮຽນ ເພື່ອສຶກສາຄວາມເປັນໄປໄດ້ ໃນການຮ່ວມມືພັດທະນາອຸດສາຫະກຳປຸງແຕ່ງ ສິນຄ້າກະສິກຳ, ອຸດສາຫະກຳ, ໄອທີ ແລະ ອື່ນໆ, ສະເໜີພິຈາລະນາການສ້າງແຜນສົ່ງເສີມການຕະຫຼາດ ເປັນຕົ້ນ ການອຳນວຍຄວາມສະດວກໃຫ້ແກ່ພາກລັດ ແລະ ພາກທຸລະກິດ ໄດ້ເຂົ້າຮ່ວມງານວາງສະແດງສິນຄ້າໃນງານສຳຄັນຕ່າງໆຢູ່ອິນເດຍ ເຊັ່ນ: ກົນຈັກ, ພັດທະນາປຸງແຕ່ງສິນຄ້າກະສິກຳ, ການແປຮູບສິນຄ້າ ແລະ ນະວັດຕະກຳໃໝ່.
(ຂ່າວ: ວຽງຈັນໃໝ່)
ຄໍາເຫັນ