ທ່ານ ພົທ ສຸວອນ ເລືອງບຸນມີ, ຮອງປະທານສະພາແຫ່ງຊາດລາວ, ປະທານຄະນະມິດຕະພາບລັດຖະສະພາລາວ-ຣັດເຊຍ ໄດ້ພົບປະກັບທ່ານ ໂຊລບັນ ກາຣາ-ໂອລ (Sholban Kara-ool), ຮອງປະທານສະພາດູມາ ແຫ່ງ ສະຫະພັນຣັດເຊຍ ພ້ອມດ້ວຍຄະນະ ໃນວັນທີ 18 ຕຸລາ 2024 ທີ່ຫໍປະຊຸມແຫ່ງຊາດ ໃນໂອກາດທີ່ເດີນທາງມາເຂົ້າຮ່ວມກອງປະຊຸມ AIPA ຄັ້ງທີ 45.
ທ່ານ ພົທ ສຸວອນ ເລືອງບຸນມີ ໄດ້ກ່າວວ່າ: ການພົບປະຄັ້ງນີ້ ຈະເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມ ລະຫວ່າງສອງປະເທດ ລາວ-ຣັດເຊຍ ກໍຄື ສອງອົງການນິຕິບັດຍັດ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທຳຂຶ້ນເລື້ອຍໆ ໂດຍສະເພາະແມ່ນ ການຮ່ວມມື ແລະ ການສະໜັບສະໜູນ ເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນ ຊຶ່ງສະແດງອອກມີການແລກປ່ຽນຄະນະຜູ້ແທນ ຂັ້ນສູງ ແລະ ຂັ້ນຕ່າງໆ ນໍາກັນ, ການຮ່ວມມືໃນດ້ານເສດຖະກິດ-ການຄ້າ, ຝ່າຍລັດຖະບານກໍໄດ້ມີສັນຍາຮ່ວມມືກັນແຕ່ເຫັນວ່າຍັງບໍ່ໄດ້ຮັບການເສີມຂະຫຍາຍໃຫ້ຂະຫຍາຍຕົວເທົ່າທີ່ຄວນ, ມູນຄ່າການສົ່ງອອກສິນຄ້າຈາກ ລາວ ໄປຍັງ ຣັດເຊຍ ແມ່ນຫຼຸດລົງ ຍ້ອນຫຼາຍປັດໄຈ, ການລົງທຶນ ຂອງຣັດເຊຍ ແມ່ນຈັດຢູ່ໃນອັນດັບທີ 22 ຂອງການລົງທຶນຕ່າງປະເທດຢູ່ ສປປ ລາວ (ມີ 53 ປະເທດ), ມີ 24 ໂຄງການ ແລະ ມີມູນຄ່າການລົງທຶນທັງໝົດ 52 ລ້ານໂດລາ ຊຶ່ງກວມເອົາຂົງເຂດພະລັງງານບໍ່ແຮ່ເປັນຕົ້ນຕໍ, ສອງລັດຖະບານລາວ-ຣັດເຊຍ ກໍໄດ້ປຶກສາຫາລື ຄວາມເປັນໄປໄດ້ ໃນການຊື້ຂາຍນໍ້າມັນເຊື້ອໄຟ ຮ່ວມກັນ ແລະ ຊຸກຍູ້ ແລະ ສົ່ງເສີມໃນການຄ້າຂາຍສິນຄ້າ ທີ່ສອງປະເທດມີທ່າແຮງ.
ເພື່ອເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງສອງອົງການນິຕິບັນຍັດໃນຕໍ່ໜ້າ ສະເໜີແລກປ່ຽນບາງຄໍາຄິດເຫັນຄື ດັ່ງນີ້:
ສະເໜີໃຫ້ສືບຕໍ່ ແລກປ່ຽນການຢ້ຽມຢາມ ລະຫວ່າງຄະນະຜູ້ແທນຂັ້ນສູງ, ຂັ້ນກໍາມາທິການ ແລະ ຄະນະມິດຕະພາບລັດຖະສະພາ ຢ່າງເປັນປົກກະຕິ ທີ່ຕິດພັນກັບການແລກປ່ຽນບົດຮຽນ ກ່ຽວກັບການປະຕິບັດພາລະບົດບາດ ຂອງອົງການນິຕິບັນຍັດ;
ສະເໜີໃຫ້ສອງລັດຖະບານສືບຕໍ່ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ທີ່ລັດຖະບານ ຂອງສອງປະເທດ ໄດ້ລົງນາມຮ່ວມກັນ ໃຫ້ເປັນຮູບປະທຳຂື້ນກວ່າເກົ່າ ແລະ ສືບຕໍ່ຊຸກຍູ້ການຈັດຕັ້ງປະຕິບັດບັນດາໂຄງການຕ່າງໆ ຂອງຣັດເຊຍ ທີ່ມາລົງທຶນຢູ່ ສປປ ລາວ ໃຫ້ສໍາເລັດຕາມແຜນການ ແລະ ນໍາເອົາຜົນປະໂຫຍດມາສູ່ ປະຊາຊົນສອງຊາດຢ່າງແທ້ຈິງ.
ສືບຕໍ່ຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.
ຂ່າວ: ຍຸພິນທອງ, ພາບ: ຕຸໄລເພັດ
ดูข้อมูลเชิงลึกและโฆษณา
ความรู้สึกทั้งหมด
77
ຄໍາເຫັນ