ແລະ ທ່ານ ສັນຕິສຸກ ສິມມາລາວົງ ຮອງເລຂາຄະນະບໍລິຫານງານພັກກະຊວງ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີທ່ານ ສຸພົນ ຈັນທະວີໄຊ ຄະນະບໍລິຫານງານພັກກະຊວງ ເຕັກໂນໂລຊີ ເເລະ ການສື່ສານ, ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ພ້ອມດ້ວຍຄະນະຜູ້ບໍລິຫານ-ພະນັກງານບໍລິສັດໃນເຄືອຂ່າຍ, ຮ້ານຕົວແທນຈໍາໜ່າຍ, ຄູ່ຮ່ວມທຸລະກິດ ແລະ ບັນດາສື່ມວນຊົນ ກໍໄດ້ໃຫ້ກຽດເຂົ້າຮ່ວມ.
ບໍລິສັດ ລາວໂທລະຄົມມະນາຄົມ ມະຫາຊົນ ເປັນເຄືອຂ່າຍທຳອິດ ໃນ ສປປ ລາວ ທີ່ນໍາເຕັກໂນໂລຊີ 5G ເຂົ້າມາໃຫ້ບໍລິການສັງຄົມ. ປັດຈຸບັນ, ໄດ້ຂະຫຍາຍບໍລິການ 5G ແລະ ເປີດນໍາໃຊ້ເຄືອຂ່າຍ 5G ເປັນທາງການ ຢູ່ແຂວງຈໍາປາສັກ ຈຳນວນ 10 ຈຸດ ໃນນະຄອນປາກເຊ. ໃນອານາຄົດ, ຍັງມີແຜນຂະຫຍາຍຕາມເຂດທີ່ເຫັນວ່າແທດເໝາະກັບການນຳໃຊ້ 5G. ໃນພິທີໄດ້ໃຫ້ແພັກເກັດ ດາຕ້າ 5G ສຸດພິເສດໃຫ້ແຂກທີ່ເຂົ້າຮ່ວມງານ ແລະ ລູກຄ້າ ນໍາໃຊ້ບໍລິການ 5G ຢູ່ແຂວງຈໍາປາສັກ ທົດລອງນໍາໃຊ້ໂດຍບໍ່ເສຍຄ່າ. ໃນໂອກາດດັ່ງກ່າວ, ທ່ານ ລັດຖະປັນຍາ ຂຽວວົງພະຈັນ ຮອງເລຂາຄະນະພັກຮາກຖານ, ຮອງຜູ້ອຳນວຍການໃຫຍ່ ຂະແໜງເຕັກນິກ ບໍລິສັດ ລາວໂທລະຄົມມະນາຄົມ ມະຫາຊົນ ຂຶ້ນກ່າວຈຸດປະສົງຂອງການເປີດໃຫ້ບໍລິການ 5G ແລະ ໃຫ້ກຽດກົດປຸ່ມເປີດພິທີຢ່າງເປັນທາງການ ໂດຍ ທ່ານ ອາລຸນໄຊ ສູນນະລາດ ທ່ານ ສັນຕິສຸກ ສິມມາລາວົງ, ທ່ານ ສຸພົນ ຈັນທະວີໄຊ. ພາຍໃນງານໄດ້ມີຮ້ານວາງສະແດງຂອງ ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ, ຄູ່ຮ່ວມທຸລະກິດ, ຕົວແທນຈໍາໜ່າຍ ແລະ ໄດ້ມີກິດຈະກໍາຫຼາກຫຼາຍໃນການສາທິດການນໍາໃຊ້ເຕັກໂນໂລຊີ 5G ບໍ່ວ່າຈະເປັນເຕັກໂນໂລຊີສໍາຫຼວດພື້ນທີ່ ໂດຍນໍາໃຊ້ Drone, iFarm solutions, Virtual Reality (ທ່ອງທ່ຽວ, ເກມ), M-Money X, My TPlus, Smart Rewards, ການທົດລອງນໍາໃຊ້ອິນເຕີເນັດຄວາມໄວສູງ 5G ແລະ ອີກຫຼາຍບໍລິການ ທີ່ໄດ້ມີການວາງສະແດງ.
ປັດຈຸບັນ, ລາວໂທລະຄົມ ໄດ້ນໍາໃຊ້ບໍລິການລະບົບ 5G ຢູ່ນະຄອນຫຼວງວຽງຈັນ, ແຂວງບໍ່ເເກ້ວ, ຫຼວງພະບາງ, ສະຫວັນນະເຂດ ແລະ ຈໍາປາສັກ ໂດຍກວມເອົາຂົງເຂດຕົວເມືອງ, ສະຖານທີ່ສໍາຄັນ, ແຫຼ່ງທ່ອງທ່ຽວຕ່າງໆ ແລະ ມີແຜນຂະຫຍາຍໄປໃນທົ່ວປະເທດ. ດັ່ງທີ່ພວກເຮົາຮູ້ນຳກັນວ່າ: ເຕັກໂນໂລຊີ 5G ແມ່ນເຕັກໂນໂລຊີທີ່ທັນສະໄໝ ນໍາຄວາມກ້າວໜ້າມາສູ່ສັງຄົມ ແລະ ນຳໃຊ້ຢ່າງກວ້າງຂວາງໃນທົ່ວໂລກເຊັ່ນ: ທາງດ້ານທຸລະກິດ online, E-commerce, ນໍາໃຊ້ປັນຍາປະດິດ AI, IoT, Robotic ເຂົ້າໃນຫຼາຍຂົງເຂດອຸດສາຫະກໍາ, ກະສິກໍາ, ວຽກງານສາທານະສຸກ ລ້ວນແລ້ວແຕ່ເປັນການສ້າງເງື່ອນໄຂໃຫ້ສັງຄົມ ແລະ ຜູ້ຊົມໃຊ້ ໄດ້ມີວິຖີຊີວິດນັບມື້ສະດວກສະບາຍຂຶ້ນດ້ວຍຄວາມວ່ອງໄວ, ມີຄວາມປອດໄພສູງ ແລະ ສອດຄ່ອງໃນການຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດ ກໍຄືວຽກງານຂອງ ກະຊວງ ເຕັກໂນໂລຊີ ເເລະ ການສື່ສານ ໃນການຫັນເປັນດີຈີຕອນ ຂອງ ສປປ ລາວ ຕາມ 3 ເສົາຄໍ້າຂອງລັດຖະບານຄື: ລັດຖະບານດີຈີຕອນ, ສັງຄົມດີຈີຕອນ ແລະ ເສດຖະກິດດີຈີຕອນ, ລາວໂທລະຄົມ ກໍເປັນສ່ວນໜຶ່ງ ໃນການນຳເອົາເຕັກໂນໂລຊີໃໝ່ໆ ເຂົ້າມານຳໃຊ້ເພື່ອຮອງຮັບກັບຄວາມຕ້ອງການຂອງສັງຄົມ ພ້ອມທັງຮັບປະກັນຄຸນນະພາບການໃຫ້ບໍລິການ ເພື່ອສະໜັບສະໜູນວຽກງານແຜນຍຸດທະສາດການສ້າງສາ ແລະ ພັດທະນາປະເທດຊາດ.
ລາວ ໂທລະຄົມ ຍັງສືບຕໍ່ມຸ່ງໝັ້ນໃນການພັດທະນາ ດ້ວຍການນໍາເອົາເຕັກໂນໂລຊີ ແລະ ນະວັດຕະກໍາໃໝ່ໆ ເຂົ້າມາຮັບໃຊ້ສັງຄົມລາວ ເພື່ອເປັນການປະກອບສ່ວນໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຮຸ່ງເຮືອງສີວິໄລ, ທັນສະ ໄໝ ໃນຍຸກດີຈີຕອນ ພ້ອມທັງຢູ່ຄຽງຂ້າງກັບສັງຄົມລາວ ດັ່ງຄໍາຂັວນທີ່ວ່າ; “ລາວໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ,We are Family”.
ຄໍາເຫັນ