ທ່ານ ສັນຕິພາບ ພົມວິຫານ ຊີ້ແຈງວ່າ: ໃນໄລຍະຜ່ານມາ ລັດຖະບານໄດ້ສຸມໃສ່ການດຶງດູດການລົງທຶນເພື່ອຊຸກຍູ້ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ. ໃນນີ້, ກົດໝາຍສົ່ງເສີມການລົງທຶນ ໄດ້ກຳນົດກິດຈະການທີ່ໃຫ້ນະໂຍບາຍສົ່ງເສີມດ້ານພາສີ-ອາກອນໃນ 9 ຂະແໜງການບູລິມະສິດ, ສາມາດສ້າງເງື່ອນໄຂດຶງດູດໂຄງການລົງທຶນທີ່ສໍາຄັນ ຕໍ່ການພັດທະນາ ເສດຖະກິດ-ສັງຄົມແຫ່ງຊາດ.
ໃນຂະນະດຽວກັນ ກໍຍັງມີໂຄງການຂະໜາດໃຫຍ່ຈໍານວນໜຶ່ງ ທີ່ບໍ່ໄດ້ກຳນົດໃຫ້ບູລິມະສິດຕາມ ກົດໝາຍ ແຕ່ມີຄວາມຈຳເປັນ, ຄວາມສໍາຄັນລະດັບຊາດ ເປັນຕົ້ນໂຄງການພະລັງງານໄຟຟ້າ, ໂຄງການ ພັດທະນາພື້ນຖານໂຄງລ່າງ ແລະ ອື່ນໆ. ຈາກສະພາບດັ່ງກ່າວ ໄດ້ສົ່ງຜົນກະທົບຕໍ່ກັບຜົນສັກສິດຂອງ ກົດໝາຍ ແລະ ນິຕິກຳໃຕ້ກົດໝາຍ ທັງເຮັດໃຫ້ລັດສູນເສຍລາຍຮັບງົບປະມານຈາກການໃຫ້ນະໂຍບາຍ ດັ່ງກ່າວ. ໃນໄລຍະຜ່ານມາ ກະຊວງການເງິນ ໄດ້ສັງລວມຂໍ້ມູນການສູນເສຍລາຍຮັບຈາກບັນດາໂຄງການລົງທຶນໃນຂອດນໍາເຂົ້າ ໄລຍະ 5 ປີ ປະມານ 6,000 ຕື້ກີບຊຶ່ງເປັນພຽງຕົວເລກເບື້ອງສົ້ນເຂົ້າ ຈາກການນໍາເຂົ້າສິນຄ້າເທົ່ານັ້ນ ແຕ່ຍັງບໍ່ລວມມູນຄ່າການຍົກເວັ້ນອາກອນພາຍໃນ ຄາດວ່າມີຈໍານວນຫຼາຍ ທີ່ບໍ່ສາມາດສັງລວມໄດ້. ປັດຈຸບັນກະຊວງການເງິນກໍາລັງຄົ້ນຄວ້າ, ການນໍາໃຊ້ລະບົບການວິເຄາະການສູນເສຍລາຍຮັບຈາກການຍົກເວັ້ນພາສີ-ອາກອນຊຶ່ງຈະເຮັດໃຫ້ການສັງລວມມີຄວາມຊັດເຈນຂຶ້ນ ໃນຕໍ່ໜ້າ.
ທ່ານລັດຖະມົນຕີກະຊວງການເງິນຍັງສະເໜີບາງມາດຕະການດັ່ງນີ້:1) ສະເໜີສ້າງຄະນະກຳມະການລະດັບຊາດ ເພື່ອຄົ້ນຄວ້າກໍານົດຫຼັກການມາດຕະຖານຂອງການໃຫ້ນະໂຍບາຍຕ່າງໆ ລວມທັງພາສີ-ອາກອນ ທີ່ເປັນເອກະພາບ ໃນແຕ່ລະຂະແໜງການຢ່າງລະອຽດ ໂດຍສະເພາະໂຄງການຂະໜາດໃຫ່ຍໃນຂະແໜງການພະລັງງານ, ໂຄງການພັດທະນາພື້ນຖານໂຄງລ່າງ ແລະ ແຮ່ທາດ;2) ກະຊວງການເງິນ ຕ້ອງໄດ້ເຂົ້າຮ່ວມແຕ່ຫົວທີ ກັບຂະແໜງການກ່ຽວຂ້ອງໃນການຄົ້ນຄ້ວາ ແລະ ປະເມີນບົດວິພາກເສດຖະກິດ, ເຕັກນິກ ແລະ ການເງິນຂອງໂຄງການ, ການກຳນົດພັນທະພາສີ-ອາກອນ ໃນສັນຍາສໍາປະທານ;3) ສະເໜີສະພາແຫ່ງຊາດ ເປັນເຈົ້າການຕິດຕາມ, ຊຸກຍູ້ ແລະ ປະເມີນຄືນ ກ່ຽວກັບການອອກມະຕິຂອງຄະນະປະຈຳສະພາແຫ່ງຊາດ ໄລຍະຜ່ານມາ. ພ້ອມທັງເປັນເຈົ້າການຊ່ວຍລັດຖະບານກ່ຽວກັບການສະເໜີທີ່ບໍ່ເປັນໄປຕາມກົດໝາຍ ຫຼື ເໜືອກົດໝາຍກຳນົດ ເພື່ອຫຼີກລຽງການບໍ່ປະຕິບັດນະໂຍບາຍຕາມກົດໝາຍກຳນົດ;4) ຈະສົມທົບກັບກະຊວງອຸດສາຫະກຳ ແລະ ການຄ້າ ກ່ຽວກັບການອອກເລກປະຈໍາຕົວຜູ້ເສຍອາກອນ (TIN) ໂດຍສະເພາະໂຄງການບູລິມະສິດ ທີ່ບໍ່ໄດ້ກຳນົດໃນກົດໝາຍວ່າດ້ວຍການສົ່ງເສີມການລົງທຶນ ທີ່ລັດຖະບານຕ້ອງການໃຫ້ມີການລົງທຶນ ເພື່ອຮັບປະກັນການໃຫ້ນະໂຍບາຍພາສີ-ອາກອນ ພ້ອມທັງປະເມີນການໃຫ້ນະໂຍບາຍພັນທະພາສີ-ອາກອນ ຖືກຕ້ອງ ແລະ ສອດຄ່ອງຕາມທີ່ໄດ້ກຳນົດ ໂດຍສະເພາະການນໍາເຂົ້າວັດຖຸອຸປະກອນ, ຮັບປະກັນວ່າບໍ່ໃຫ້ເອົາໄປນໍາໃຊ້ໃນໂຄງການອື່ນທີ່ບໍ່ໄດ້ຮັບນະໂຍບາຍ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ