ທ່ານ ສັນຕິພາບ ພົມວິຫານ ຊີ້ແຈງວ່າ:ເສດຖະກິດຂອງ ສປປ ລາວ ຂະຫຍາຍຕົວປະມານ 4.5% ໃນໄຕມາດ 1ຂອງປີນີ້. ໃນນີ້, ຂະແໜງກະສິກຳຂະຫຍາຍຕົວ 3.1%, ອຸດສາຫະກຳ 4.7%, ບໍລິການ 4.7% ແລະ ພາສີ-ອາກອນ 4.3%.ສະເພາະການຈັດຕັ້ງປະຕິບັດແຜນງົບປະມານແຫ່ງລັດ ຮອດວັນທີ 6 ມິຖຸນາ 2025 ປະຕິບັດໄດ້ 33,565 ຕື້ ກີບ ເທົ່າກັບ 49% ຂອງແຜນການປີ. ໃນນັ້ນ, ລາຍຮັບພາຍໃນປະຕິບັດໄດ້ 31,892 ຕື້ກີບ ເທົ່າກັບ 51% ຂອງ ແຜນການປີ ຊຶ່ງເຫັນວ່າມີທ່ວງທ່າດີຂຶ້ນ ເນື່ອງຈາກອັດຕາແລກປ່ຽນເລີ່ມມີສະຖຽນລະພາບ ແລະ ເງິນເຟີ້ມີທ່າອ່ຽງຫຼຸດລົງ ເຮັດໃຫ້ເສດຖະກິດພາຍໃນມີການຂະຫຍາຍຕົວ, ຫຼາຍກິດຈະການຂອງພາກທຸລະກິດໄດ້ຮັບການຟື້ນຟູ ແລະ ຂະຫຍາຍຕົວດີຂຶ້ນບວກກັບການຈັດຕັ້ງປະຕິບັດບັນດາມາດຕະການ ແລະ ນິຕິກຳຕິດພັນກັບວາລະແຫ່ງຊາດ ໃນການຄຸ້ມຄອງລາຍຮັບຜ່ານລະບົບທັນສະໄໝລວມສູນ. ສໍາລັບຢູ່ຂັ້ນທ້ອງຖິ່ນມາຮອດປັດຈຸບັນກໍເຫັນວ່າຫຼາຍແຂວງ ສາມາດປະຕິບັດໄດ້ລື່ນຄາດໝາຍ 6 ເດືອນຕົ້ນປີ (ມີ 5 ແຂວງເກີນ 70%) ແລະ ຄາດຄະເນໝົດປີຈະໄດ້ເກີນແຜນເປັນປີທີ 5 ຖ້າຫາກສະພາບເສດຖະກິດທີ່ຖືກຜົນກະທົບຫາກໄດ້ຮັບການຟື້ນຕົວດີຂຶ້ນ. ໃນນີ້, ສາມາດແຍກເປັນຂະແໜງການລາຍຮັບທີ່ພົ້ນເດັ່ນຕາມໂຄງປະກອບຂອງເສດຖະກິດດັ່ງນີ້:ຂະແໜງບໍລິການ ກວມເອົາ 50.8% ຂອງລາຍຮັບພາຍໃນທັງໝົດ ເພີ່ມຂຶ້ນ 70.3% ທຽບໃສ່ປີຜ່ານມາ ເປັນເງິນ 4,702 ຕື້ກີບ (ຊຶ່ງໄດ້ຈາກກຸ່ມຜະລິດໄຟຟ້າ ກວມເອົາ 20.4% ຂອງລາຍຮັບພາຍໃນທັງຫມົດ ແລະ ກຸ່ມທະນາຄານ, ການເງິນ ແລະ ການປະກັນໄພ ກວມ 6.4%),ຂະແໜງອຸດສາຫະກໍາ ກວມເອົາ 42.5% ຂອງລາຍຮັບພາຍໃນທັງຫມົດ ເພີ້ມຂື້ນ 22.5% ທຽບໃສ່ ປີຜ່ານມາ ເປັນເງິນ 1,747 ຕື້ກີບ (ຊຶ່ງໄດ້ຈາກກຸ່ມບໍ່ແຮ່ ກວມເອົາ 23.7% ແລະ ກຸ່ມຜະລິດເຄື່ອງດື່ມ ກວມ 15.0%),ຂະແໜງການຄ້າ ກວມເອົາ 6.7% ຂອງລາຍຮັບພາຍໃນທັງໝົດ ເພີ່ມຂຶ້ນ 37% ທຽບໃສ່ປີຜ່ານມາ ເປັນເງິນ 406 ຕື້ກີບ (ຊຶ່ງໄດ້ຈາກກຸ່ມກະສິກໍາ, ປ່າໄມ້ແລະການປະມົງກວມເອົາ 1.7%, ກຸ່ມພາຫະນະກວມ 1.1% ກຸ່ມນໍ້າມັນເຊື້ອໄຟ ກວມ 1.2%).
ທ່ານ ສັນຕິພາບ ພົມວິຫານ ກ່າວຕື່ມວ່າ: ເພື່ອຮັບປະກັນໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນ 6 ເດືອນທ້າຍປີນີ້ ບັນລຸຕາມເປົ້າໝາຍ, ລັດຖະບານ ກໍຄືກະຊວງການເງິນ ຈະສືບຕໍ່ສົມທົບກັບພາກສ່ວນກ່ຽວຂ້ອງຊຸກຍູ້ໃຫ້ທຸກແຫຼ່ງທຶນທີ່ໄດ້ຜ່ານການຮັບຮອງແລ້ວ ໄດ້ຮັບການຈັດຕັ້ງປະຕິບັດຕາມແຜນທີ່ສະພາໄດ້ຮັບຮອງ. ຄຽງຄູ່ກັນນັ້ນ, ລັດຖະບານຈະສືບຕໍ່ປະຕິບັດນະໂຍບາຍຕ່າງໆ ເພື່ອຊຸກຍູ້ສົ່ງເສີມ ແລະ ດຶງດູດການລົງທຶນຂອງພາກເອກະຊົນພາຍໃນ-ຕ່າງປະເທດ ແລະ ທຶນຊ່ວຍເຫຼືອທາງການເພື່ອການພັດທະນາ (ODA) ໃຫ້ແຂງແຮງກວ່າເກົ່າ ແລະ ໃຫ້ສາມາດບັນລຸໄດ້ຕາມຄາດໝາຍ ໂດຍການສຸມໃສ່ຊຸກຍູ້, ຕິດຕາມ, ກວດກາ ແລະ ສ້າງເງື່ອນໄຂໃຫ້ບັນດາໂຄງການລົງທຶນເອກະຊົນຂະໜາດໃຫຍ່ທີ່ໄດ້ອະນຸມັດແລ້ວ ສາມາດຈັດຕັ້ງປະຕິບັດໂດຍໄວ ເປັນຕົ້ນໂຄງການທາງດ່ວນແລວໃໝ່ ແຕ່ບ້ານໄຮ່ ເຂດທ່າງ່ອນເມືອງໄຊທານີ ຫາ ບ້ານນາຊ່າງເລັກເມືອງທຸລະຄົມແຂວງວຽງຈັນ; ໂຄງການໄຟຟ້າພະລັງງານຊີວະມວນຢູ່ເຂດເມືອງໄຊ ແລະ ເມືອງຫຼາແຂວງອຸດົມໄຊ; ໂຄງການໄຟຟ້າພະລັງງານລົມ ຢູ່ແຂວງຜົ້ງສາລີ ແລະ ແຂວງອຸດົມໄຊ; ໂຄງການໄຟຟ້າແສງຕາເວັນ ຢູ່ເຂດນະຄອນໄກສອນພົມວິຫານແຂວງສະຫວັນນະເຂດ; ໂຄງການໄຟຟ້າພະລັງງານລົມກາລອງ ແລະ ໂຄງການໄຟຟ້າພະລັງງານລົມພິລາ ຢູ່ເມືອງໄຊຈຳພອນແຂວງບໍລິຄໍາໄຊ ແລະ ໂຄງການອື່ນໆ.
ນອກຈາກນັ້ນ, ສືບຕໍ່ຫັນໂຄງການຂຸດຄົ້ນແຮ່ທາດແບບທົດລອງ (ເປັນຕົ້ນ: ແຮ່ເຫຼັກ, ແຮ່ຄໍາ ແລະ ແຮ່ຫາຍາກ) ເຂົ້າສູ່ການປະຕິບັດໃນຮູບບແບບປົກກະຕິຕາມກົດໝາຍຢ່າງເຂັ້ມງວດ, ນໍາເອົາໂຄງການທີ່ລັດຖະບານໄດ້ໂຈະ ແລະ ຖອນຄືນແລ້ວ ມາປະມູນເພື່ອຄັດເລືອກເອົາບໍລິສັດຜູ້ລົງທຶນໃໝ່ທີ່ມີມາດຖານເງື່ອນໄຂຄົບຖ້ວນໂດຍສະເພາະດ້ານເຕັກນິກວິທີການ, ທຶນຮອນ ແລະ ປະສົບການຕົວຈິງ ເພື່ອເຮັດໃຫ້ໂຄງການດັ່ງກ່າວ ສາມາດສືບຕໍ່ຈັດຕັ້ງປະຕິບັດ ສໍາເລັດຕາມແຜນ ແລະ ສ້າງລາຍຮັບເຂົ້າງົບປະມານແຫ່ງລັດ ຄຽງຄູ່ກັບການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການລົງທຶນ, ສືບຕໍ່ປັບປຸງຖານຂໍ້ມູນ ແລະ ໂຄສະນາດຶງດູດເອົາການລົງທຶນໃໝ່ເຂົ້າໃນຂະແໜງການບຸລິມະສິດຕ່າງໆ.
ສໍາລັບການຊ່ວຍເຫຼືອທາງການເພື່ອການພັດທະນາ (ODA) ຈະໄດ້ສົມທົບກັບບັນດາກະຊວງ, ອົງການ, ນະຄອນຫຼວງ ແລະ ບັນດາແຂວງ ເປັນເຈົ້າການຮີບຮ້ອນຈັດຕັ້ງປະຕິບັດບັນດາແຜນງານ ແລະ ໂຄງການທີ່ໄດ້ຮັບການອະນຸມັດແລ້ວ ໃຫ້ສຳເລັດໂດຍໄວ ໂດຍສະເພາະແມ່ນການຍົກສູງຄວາມເປັນເຈົ້າການປະຕິບັດໜ້າວຽກ ແລະ ການຂໍອະນຸມັດເບີກຈ່າຍຢູ່ຂັ້ນທ້ອງຖິ່ນໃຫ້ໄວກວ່າເກົ່າ ແລະ ມີໝາກຜົນສູງ ເພື່ອສ້າງເງື່ອນໄຂທີ່ດີໃນການລະດົມທຶນໃໝ່ຈາກບັນດາປະເທດເພື່ອນມິດ ແລະ ຄູ່ຮ່ວມພັດທະນາໃຫ້ໄດ້ຫຼາຍກວ່າເກົ່າ.
(ຂ່າວ: ວັນເພັງ, ພາບ: ສຸກສະຫວັນ)
ຄໍາເຫັນ