ລັດຖະບານ ຈະສືບຕໍ່ແກ້ໄຂການເກັບຄືນເງິນກູ້ຢືມຢ່າງເຂັ້ມງວດ

ທ່ານ ສັນຕິພາບ ພົມວິຫານ ຊີ້ແຈງວ່າ:ຕໍ່ກັບສະພາບການຊຳລະໜີ້ສິນທັງໝົດໃນ 6 ເດືອນຕົ້ນ ປີ 2025ການຊໍາລະໜີ້ສິນພາຍໃນ ແລະ ຕ່າງປະເທດ ທີ່ປະຕິບັດໄດ້ພຽງ 13.54% ຂອງແຜນການປີ ເປັນພຽງຕົວເລກສະເພາະແຕ່ການຊຳລະໜີ້ສິນພາຍໃນທີ່ໄດ້ຊຳລະຕົວຈິງໃນໄລຍະ 5 ເດືອນຕົ້ນປີ, ຖ້າທຽບໃສ່ການຊຳລະໜີ້ສິນທັງພາຍໃນ ແລະ ຕ່າງປະເທດທັງໝົດແມ່ນສາມາດປະຕິບັດໄດ້ 22.54% ຂອງແຜນປີ ຫຼື ເທົ່າກັບ 64.94% ຂອງແຜນ 6 ເດືອນຕົ້ນປີ ເປັນເງິນປະມານ 13,796 ຕື້ກີບ. ຄາດຄະເນຈະສາມາດປະຕິບັດການຊຳລະໜີ້ສິນໃນ 6 ເດືອນຕົ້ນປີ 2025 ໄດ້ທັງໝົດ 33.54% ຂອງແຜນປີ ຫຼື ເທົ່າກັບ 96.61% ຂອງແຜນ 6 ເດືອນຕົ້ນປີ ເປັນເງິນ 20,525 ຕື້ກີບ.ໂດຍລວມແລ້ວເຫັນວ່າການຊໍາລະໜີ້ສິນ ແມ່ນສາມາດປະຕິບັດໄດ້ຕາມແຜນຖ້າທຽບໃສ່ແຜນ 6 ເດືອນຕົ້ນປີ, ແຕ່ຖ້າທຽບໃສ່ແຜນໝົດປີ 2025 ເຫັນວ່າຍັງປະຕິບັດໄດ້ຕໍ່າ ເນື່ອງຈາກພັນທະໜີ້ສິນສ່ວນໃຫຍ່ຈະຄົບກໍານົດຊໍາລະໃນໄລຍະ 6 ເດືອນທ້າຍປີ ແລະ ຜູ້ຖືຄອງພັນທະບັດຈໍານວນໜຶ່ງແມ່ນຍັງບໍ່ທັນໄດ້ ປະກອບເອກະສານຄົບຖ້ວນເພື່ອໄຖ່ຖອນພັນທະບັດພາຍໃນທີ່ຄົບກຳນົດຊຳລະ.ສໍາລັບການເກັບກູ້ໜີ້ສິນຄືນໃນ 6 ເດືອນຕົ້ນ ປີ 2025 ສາມາດເກັບກູ້ໜີ້ສິນຄືນໄດ້ທັງໝົດ ປະມານ 631 ຕື້ກີບ (ແຜນການເກັບປີ 2025 ຈໍານວນ 2,500 ຕື້ກີບ), ເທົ່າກັບ 25% ຂອງແຜນປີ. ໃນນີ້, ການເກັບຄືນເງິນກູ້ຢືມຕໍ່ຈາກລັດວິສາຫະກິດ ປະມານ 537 ຕື້ກີບ; ການເກັບຄືນໜີ້ເສຍຈາກ 2 ທະນາຄານ ປະມານ 86 ຕື້ກີບ (ສະເພາະຕົ້ນທຶນ) ແລະ ຄ່າທໍານຽມການອອກຄໍ້າປະກັນປະມານ 8 ຕື້ກີບ. ຄາດຄະເນໝົດປີຈະສາມາດຈັດຕັ້ງປະຕິບັດໄດ້ພຽງແຕ່ 50% ຂອງແຜນການປີ 2025 ເນື່ອງຈາກວ່າບາງລັດວິສາຫະກິດບໍ່ສາມາດເກັບກູ້ໄດ້ຕາມແຜນການທີ່ກໍານົດເປັນຕົ້ນ: ລັດວິສາຫະກິດໄຟຟ້າລາວ.

ທ່ານ ສັນຕິພາບ ພົມວິຫານ ກ່າວອີກວ່າ: ສໍາລັບທິດທາງແກ້ໄຂໃນຕໍ່ໜ້າຈະໄດ້ລົງຕິດຕາມກວດກາຕົວຈິງ ແລະ ຊຸກຍູ້ການຈັດຕັ້ງປະຕິບັດການເກັບຄືນເງິນກູ້ຢືມຕໍ່ຢ່າງເຂັ້ມງວດ ແລະ ເປັນປົກກະຕິ ໂດຍສະເພາະລັດວິສາຫະກິດໄຟຟ້າລາວ ທີ່ໄດ້ປັບປຸງໂຄງສ້າງລາຄາໄຟຟ້າຄືນໃໝ່ໃນແຕ່ລະໄລຍະ ຊຶ່ງຈະເປັນພື້ນຖານໃນການປັບໂຄງສ້າງໜີ້ສິນຂອງລັດວິສາຫະກິດໄຟຟ້າລາວ ທີ່ມີຕໍ່ກະຊວງການເງິນ ເພື່ອກ້າວໄປສູ່ການປັບປຸງຖານະການເງິນຂອງໄຟຟ້າລາວໃຫ້ດີຂຶ້ນ ແລະ ເປັນເງື່ອນໄຂໃຫ້ສາມາດຊໍາລະໜີ້ສິນກູ້ຢືມຕ່າງປະເທດໂດຍກົງ ແລະ ກູ້ຢືມຕໍ່ລັດຖະບານ.

(ຂ່າວ: ວັນເພັງ)