ສະຫາຍ ລິນຄໍາ ດວງສະຫວັນ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກ ກະຊວງ ກສ

ສະຫາຍ ລິນຄໍາ ດວງສະຫວັນ ກ່າວທີ່ປະຊຸມ ບາງຕອນວ່າ: ກອງປະຊຸມໃຫຍ່ຄັ້ງນີ້ ໄດ້ຄົ້ນຄວ້າ ແລະ ຮັບຮອງເອົາ ຮ່າງລາຍງານການເມືອງ ແລະ ຮ່າງບົດສະຫຼຸບການຈັດຕັ້ງ ປະຕິບັດແຜນພັດທະນາຂະແໜງກະສິກຳ ແລະ ສິ່ງແວດລ້ອມ ຂອງ 2 ຂະແໜງການທີ່ມີການໂຮມເຂົ້າກັນ, ຊຶ່ງ 2 ເອກະສານດັ່ງກ່າວ ແມ່ນມີຄວາມສໍາຄັນ ທີ່ສ່ອງແສງໃຫ້ເຫັນໝາກຜົນໃນການນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 6 ຂອງອົງຄະນະພັກກະຊວງກະສິກຳ ແລະ ປ່າໄມ້, ມະຕິກອງປະຊຸມໃຫຍ່ ຄັ້ງທີ 2 ຂອງອົງຄະນະພັກ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃນເມື່ອກ່ອນ ແລະ ການກຳນົດທິດທາງຈຸດສຸມ 5 ປີ ໃນຕໍ່ໜ້າ ຂອງຂະແໜງກະສິກຳ ແລະ ສິ່ງແວດລ້ອມ ຊຶ່ງຈະເປັນການປະກອບ ສ່ວນເຂົ້າໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງ ພັກ ໃຫ້ບັນລຸຜົນສໍາເລັດ ຕາມຄາດໝາຍທີ່ວາງໄວ້; ຄົ້ນຄວ້າ ແລະ ຮັບຮອງເອົາ ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກ ກະຊວງ ໃນໄລຍະ 5 ປີຜ່ານມາ, ຈາກນັ້ນ ກອງປະຊຸມ ໄດ້ດໍາເນີນການເລືອກຕັ້ງເອົາ ຄະນະບໍລິຫານງານພັກກະຊວງຊຸດໃໝ່, ເພື່ອສືບຕໍ່ນໍາພາ-ຊີ້ນໍາ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ 7 ຂອງອົງຄະນະພັກກະຊວງ ໃຫ້ມີຜົນສໍາເລັດ ແລະ ເລືອກຕັ້ງເອົາຜູ້ແທນສົມບູນ, ສໍາຮອງໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ.
ກອງປະຊຸມຄັ້ງປະຖົມມະລືກ ເປັນເອກະສັນເລືອກເອົາ ສະຫາຍ ລິນຄໍາ ດວງສະຫວັນ ເປັນ ເລຂາຄະນະບໍລິຫານງານພັກ ກະຊວງ ກສ, ສະຫາຍ ໄຊນະຄອນ ອິນທະວົງ ເປັນຮອງເລຂາຄະນະບໍລິຫານງານພັກ ກະຊວງ ກສ, ສະຫາຍ ກິແກ້ວ ສິງນາວົງ ເປັນປະທານກວດກາພັກກະຊວງ ກສ.
ໂອກາດທີ່ສະຫງ່າລາສີນີ້ ຍັງໄດ້ຮັບຟັງການໂອ້ລົມ ໃຫ້ທິດເຍືອງທາງຈາກ ສະຫາຍ ບຸນທອງ ຈິດມະນີ ມີບາງຕອນສໍາຄັນ ວ່າ: ໃຫ້ສືບຕໍ່ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ແນວຄິດ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ຮັບຮູ້-ເຂົ້າໃຈ ເລິກເຊິ່ງ ເປັນເອກະພາບ ຕໍ່ແນວທາງນະໂຍບາຍຂອງພັກ, ຮີບຮ້ອນຈັດຕັ້ງເຜີຍແຜ່ເນື້ອໃນກອງປະຊຸມໃຫຍ່ຄັ້ງນີ້ ໃຫ້ຄະນະພັກ, ສະມາຊິກພັກ, ພະນັກງານ-ລັດ ຖະກອນ ພ້ອມກັນນັ້ນ ຈັດຕັ້ງເຜີຍແຜ່ ແລະ ເຊື່ອມຊຶມມະຕິຄໍາສັ່ງຕ່າງໆຂອງພັກ ລວມທັງມະຕິກອງປະຊຸມໃຫຍ່ ຄັ້ງທີ XII ຂອງພັກ ທີ່ຈະມາເຖິງໃນຕໍ່ໜ້າ, ສືບຕໍ່ຊຸກຍູ້ສົ່ງເສີມການຜະລິດກະສິກໍາ ເພື່ອຄໍ້າປະກັນຄວາມໝັ້ນຄົງດ້ານສະບຽງອາຫານ, ຍູ້ແຮງວຽກງານການສົ່ງເສີມການຜະລິດກະສິກໍາເປັນສິນຄ້າ ເພື່ອສະໜອງພາຍໃນ ແລະ ສົ່ງອອກ, ເອົາໃຈໃສ່ຕໍ່ການຄຸ້ມຄອງ, ປົກປັກຮັກສາ ແລະ ນໍາໃຊ້ປ່າໄມ້, ເອົາໃຈໃສ່ວຽກງານທີ່ດິນ: ວຽກນີ້ເປັນວຽກທີ່ສໍາຄັນຫຼາຍ ເພາະທີ່ດິນ ເປັນຊັບສິນໜຶ່ງ ທີ່ສໍາຄັນຂອງຊາດ, ທັງແມ່ນພາຫະນະ ແລະ ເປົ້າໝາຍ ຂອງການຜະລິດ, ວຽກງານປົກປັກຮັກສາສິ່ງແວດລ້ອມ: ຕ້ອງໄດ້ລົງເລິກ ແລະ ເປັນເຈົ້າການຊຸກຍູ້ຜັນຂະຫຍາຍຕາມທິດສີຂຽວ ແລະ ຍືນຍົງ ໃຫ້ເປັນຮູບປະທຳຫຼາຍຂຶ້ນ, ເອົາໃຈໃສ່ການພັດທະນາຊົນນະບົດ ຕິດພັນກັບການແກ້ໄຂຄວາມທຸກຍາກ ຕ້ອງຄົ້ນຄວ້າກຳນົດແຜນຍຸດທະສາດພັດທະນາຊົນນະບົດ ແລະ ແກ້ໄຂຄວາມທຸກຍາກຕິດພັນກັບການຈັດສັນພູມລໍາເນົາ, ອາຊີບຄົງທີ່ໃຫ້ປະຊາຊົນ, ເພິ່ມທະວີວຽກງານປັບປຸງກໍ່ສ້າງພັກ, ເປັນຕົ້ນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໃຫ້ບັນລຸຕາມຄາດໝາຍທີ່ໄດ້ວາງໄວ້ ແລະ ເອົາໃຈໃສ່ວຽກງານອື່ນໆ.

ຈາກນັ້ນ, ຍັງໄດ້ມີບາງຄຳເຫັນ ຕໍ່ຄະນະພັກຊຸດໃໝ່ ຄື: ໃຫ້ຕັ້ງໜ້ານຳພາຊີ້ນໍາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ, ໂຄງການ ແລະ ສ້າງເປັນນິຕິກຳລະອຽດ, ໃຫ້ແບ່ງວຽກ, ແບ່ງຄວາມຮັບຜິດຊອບ ພາຍໃນຄະນະບໍລິຫານງານພັກ, ຄະນະປະຈໍາພັກໃຫ້ລະອຽດ, ຈະແຈ້ງ, ຕ້ອງຢຶດໝັ້ນ ແລະ ປະຕິບັດຢ່າງເຂັ້ມງວດຫຼັກການລວມສູນປະຊາທິປະໄຕ,ມີຄວາມຮັບຜິດຊອບໂດຍກົງຕໍ່ຜົນໄດ້-ຜົນເສຍຂອງວຽກງານທີ່ຖືກມອບໝາຍ, ຕ້ອງສືບຕໍ່ຕັ້ງໜ້າການຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ, ຄຸນສົມບັດສິດທໍາປະຕິວັດ, ເປັນແບບຢ່າງນໍາໜ້າດ້ານຄວາມຈົງຮັກພັກດີ ແລະ ຄວາມຊື່ສັດບໍລິສຸດ ຕໍ່ອຸດົມການຂອງພັກ ແລະ ຜົນປະໂຫຍດຂອງປະເທດຊາດ, ສືບຕໍ່ເສີມຂະຫຍາຍມູນເຊື້ອ ແຫ່ງຄວາມສາມັກຄີ, ຄວາມເປັນເອກະພາບພາຍໃນ ແລະ ຄວາມສາມັກຄີກັບທຸກພາກສ່ວນໃຫ້ ແໜ້ນແຟ້ນ ແລະ ອື່ນໆ.
ຕອນທ້າຍ, ສະຫາຍ ບຸນທອງ ຈິດມະນີ ຍັງກ່າວຕື່ມວ່າ: ກອງປະຊຸມໃຫຍ່ ຂອງອົງຄະນະພັກພວກສະຫາຍໄດ້ສໍາເລັດຕາມຈຸດປະສົງ, ລະດັບຄາດໝາຍ ແຕ່ພາລະໜ້າທີ່ໃນການນໍາພາ-ຊີ້ນໍາ ໃນຊຸມປີຕໍ່ໜ້າຍັງຈະໜັກໜ່ວງ ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນໍາພາຂອງຄະນະພັກຊຸດໃໝ່ ຈະສ້າງໃຫ້ມີບາດກ້າວໃໝ່ໃນການປັບປຸງຂະແໜງການທີ່ຂຶ້ນກັບໃຫ້ມີຄວາມໜັກແໜ້ນ, ເຂັ້ມແຂງ, ເຮັດສໍາເລັດໜ້າທີ່ການເມືອງອັນມີກຽດສະຫງ່າທີ່ພັກ, ລັດ ແລະ ປະຊາຊົນມອບໝາຍໃຫ້.
(ຂ່າວ: ແສງຈັນ)