ກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ IX ພາຍໃຕ້ຫົວຂໍ້“ ຍົກສູງການນຳພາວຽກງານກຳມະບານ ປົກປ້ອງສິດຜົນປະໂຫຍດອັນຊອບທຳຂອງຊົນຊັ້ນກຳມະກອນ ພັດທະນາສີມືແຮງງານໃຫ້ເຂັ້ມແຂງຮອບດ້ານ ຕິດພັນກັບການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໜ່”. ກອງປະຊຸມໃຫຍ່ຄັ້ງນີ້ມີຜູ້ແທນເຂົ້າຮ່ວມທັງໝົດ 518 ສະຫາຍ ຍິງ 111 ສະຫາຍ, ມີຜູ້ແທນສົມບູນເຂົ້າຮ່ວມທັງໝົດ 388 ສະຫາຍ ຍິງ87 ສະຫາຍ ຊຶ່ງເປັນຕົວແທນໃຫ້ແກ່ສະມາຊິກກຳມະບານໃນທົ່ວປະເທດຈຳນວນ 211,092 ສະຫາຍ ຍິງ 99,531 ສະຫາຍ ພ້ອມດ້ວຍແຂກຮັບເຊີນເຂົ້າຮ່ວມ 130 ສະຫາຍ ຍິງ 24 ສະຫາຍ. ກອງປະຊຸມໃຫຍ່ໄດ້ພ້ອມກັນຍົກສູງຄວາມຮັບຜິດຊອບ ແລະ ສຸມສະຕິປັນຍາໃສ່ການຄົ້ນຄວ້າປະກອບຄຳຄິດເຫັນຢ່າງເລິກເຊິ່ງ ທັງເປັນການຢັ້ງ ຢືນເຖິງຄວາມຕັດສິນໃຈສູງຂອງຄະນະບໍລິຫານງານ ສກລ ໃນການສືບຕໍ່ນໍາພາ-ຊີ້ນໍາຮອບດ້ານເພື່ອພັດທະນາການຈັດຕັ້ງກຳມະບານລາວໃນການເປັນຕົວແທນປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະ ບານ ແລະ ຜູ້ອອກແຮງງານ ເຮັດໃຫ້ກອງປະຊຸມໃຫຍ່ດໍາເນີນໄປດ້ວຍບັນຍາກາດອັນຟົດຟື້ນ ແລະ ມີຜົນສຳເລັດຢ່າງຈົບງາມ. ກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ IX ໄດ້ເປັນເອກະສັນຮັບຮອງເອົາບົດລາຍງານການເມືອງທັງສອງພາກ ພ້ອມທັງກໍານົດທິດທາງ, ຄາດໝາຍສູ້ຊົນ 5 ປີ (2026-2030) ເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ; ຮັບຮອງເອົາແຜນພັດທະນາວຽກງານກຳມະບານລາວ 5 ປີ ຄັ້ງທີ V (2026-2030) ຊຶ່ງປະກອບມີ 7 ເປົ້າໝາຍ 26 ແຜນວຽກຈຸດສຸມ; ຮັບຮອງບົດສຳຫຼວດການນໍາພາລວມຂອງຄະນະບໍລິຫານງານ ສກລ ສະໄໝທີ VIII; ຮັບຮອງເອົາກົດລະບຽບຂອງສະຫະພັນກຳມະບານລາວ ສະໄໝທີ IX ຊຶ່ງປະກອບມີ 14 ໝວດ, 69 ມາດຕາ; ຮັບຮອງເອົາຄໍາຂວັນ: “ ກໍາມະບານລາວເຂັ້ມແຂງ, ທັນສະໄໝ, ສາມັກຄີ, ມີວິໃນ ແລະ ນໍ້າໃຈສາກົນກໍາມະຊີບ” ແລະ ຂໍ້ແຂ່ງຂັນ 5 ເປັນເຈົ້າ: “ເປັນເຈົ້າການຝຶກຝົນຫຼໍ່ຫຼອມທາງດ້ານການເມືອງ-ແນວຄິດ, ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ, ເປັນເຈົ້າການພັດທະນາຕົນເອງ ແລະ ການຈັດຕັ້ງ, ເປັນເຈົ້າການປົກປ້ອງສິດ ແລະ ຜົນປະໂຫຍດອັນຊອບທໍາ ແລະ ເປັນເຈົ້າການປະຕິບັດໜ້າທີ່ວິຊາສະເພາະຢ່າງປະດິດສ້າງ”. ກອງປະຊຸມໃຫຍ່ໄດ້ຮັບຟັງການປະກອບຄໍາເຫັນຈາກຄະນະພັກ, ຄະນະນຳຂອງກະຊວງ-ອົງການ, ແຂວງ ແລະ ຫົວໜ່ວຍແຮງງານທີ່ໄດ້ຕີລາຄາຢ່າງຖືກຕ້ອງ ຕໍ່ຜົນງານການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດຄັ້ງທີ VIII ພ້ອມທັງຢັ້ງຢືນຈະສືບຕໍ່ຮ່ວມມືສະໜັບສະໜູນເອົາໃຈໃສ່ສ້າງເງື່ອນໄຂເອື້ອຍອໍານວຍໃຫ້ສະຫະພັນກໍາມະບານແຕ່ລະຂັ້ນໄດ້ຈັດຕັ້ງປະຕິບັດ ແລະ ເຄື່ອນໄຫວຕາມພາລະບົດບາດຂອງຕົນໃຫ້ມີຜົນສຳເລັດສູງໃນຕໍ່ໜ້າ.
ກອງປະຊຸມໃຫຍ່ໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກ ແລະ ຮັບຮອງເອົາຄະນະບໍລິຫານງານ ສກລ ສະໄໝທີ IX ຈໍານວນ 61 ສະຫາຍ ຍິງ 20 ສະຫາຍ ຊຶ່ງແມ່ນຜູ້ມີມາດຖານເງື່ອນໄຂທີ່ໄດ້ກໍານົດໄວ້ ຊຶ່ງປະກອບດ້ວຍຜູ້ເກົ່າ, ຜູ້ໃໝ່, ຮຸ່ນອາວຸໂສ, ຮຸ່ນກາງ, ຮຸ່ນໜຸ່ມ, ເພດ ແລະ ຊົນເຜົ່າ. ກອງປະຊຸມຄັ້ງປະຖົມມະລືກຂອງຄະນະບໍລິຫານງານ ສກລ ໄດ້ເປັນເອກະສັນເລືອກເອົາສະຫາຍ ເລັດ ໄຊຍະພອນ ເປັນປະທານຄະນະບໍລິຫານງານ ສກລ, ສະຫາຍ ພອນສານ ວິໄລເມັ້ງ ເປັນຮອງປະທານຄະນະບໍລິຫານງານ ສກລ, ສະຫາຍ ວິໄລ ວົງຂະເສີມ ເປັນຮອງປະທານຄະນະບໍລິຫານງານ ສກລ, ສະຫາຍ ທອງຈັນ ພູມີພັນ ເປັນຮອງປະທານຄະນະບໍລິຫານງານ ສກລ, ເລືອກເອົາສະຫາຍ ວິໄລ ວົງຂະເສີມ ເປັນປະທານກວດກາຄະນະບໍລິຫານງານ ສກລ, ສະຫາຍ ນາງ ສາຍປານີ ສົມຊະນິດ ເປັນຮອງປະທານຄະນະກວດກາ ແລະ ສະຫາຍ ນາງ ເກດມະນີ ຈຸນລະມະນີ ເປັນຮອງປະທານຄະນະກວດກາ. ກອງປະຊຸມໃຫຍ່ຖືເປັນກຽດຢ່າງສູງໄດ້ຮັບຟັງການໂອ້ລົມຂອງສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ສະຫາຍໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວສະມາຊິກກຳມະບານ, ກໍາມະກອນ ແລະ ຜູ້ອອກແຮງງານລາວບັນດາເຜົ່າທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ດັ່ງຄໍາຂວັນທີ່ວ່າ: “ກໍາມະບານລາວເຂັ້ມແຂງ, ທັນສະໄໝ, ສາມັກຄີ, ມີວິໃນ ແລະ ນໍ້າໃຈສາກົນກຳມະຊີບ” ຊຶ່ງສະຫາຍໄດ້ເນັ້ນໜັກຫຼາຍບັນຫາທີ່ສໍາຄັນ, ທຸກຄໍາຄິດຄໍາເຫັນຂອງສະຫາຍລ້ວນແຕ່ເປັນທິດຊີ້ນໍາໃຫ້ແກ່ການຈັດຕັ້ງປະຕິບັດວຽກງານກໍາມະບານໃນຕໍ່ໜ້າໃຫ້ມີຜົນສໍາເລັດ. ກອງປະຊຸມໃຫຍ່ສະແດງຄວາມຮູ້ບຸນຢ່າງສູງຕໍ່ການນຳພັກ, ສະພາແຫ່ງຊາດ ແລະ ລັດຖະບານ ຊຶ່ງຍາມໃດກໍໄດ້ເປັນຫ່ວງເປັນໃຍ, ໃກ້ຊິດຕິດແທດ, ນຳພາ-ຊີ້ນຳ ແລະ ສ້າງເງື່ອນໄຂອໍານວຍຄວາມສະດວກໃຫ້ສະຫະພັນກຳມະບານລາວໄດ້ເຄື່ອນໄຫວຕາມພາລະບົດບາດຂອງຕົນ, ສຶກສາອົບຮົມກໍ່ສ້າງສະມາ ຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວບັນດາເຜົ່າໃຫ້ມີຄຸນທາດການເມືອງໜັກແໜ້ນ, ມີຄຸນ ສົມບັດສິນທໍາປະຕິວັດ, ມີຄວາມຮູ້ຄວາມສາມາດມີລະບຽບວິໄນໃນການອອກແຮງງານ. ຂໍຮຽກຮ້ອງມາຍັງຄະນະພັກ, ອໍານາດການປົກຄອງ, ອົງການຈັດຕັ້ງທຸກຂັ້ນ, ຄະນະບໍລິຫານງານ ສກລ ແລະ ຄະນະນໍາກຳມະບານທຸກຂັ້ນຈົ່ງເພີ່ມທະວີໃນການນໍາພາ-ຊີ້ນຳ, ພັດທະນາຕົນເອງຢ່າງຮອບດ້ານເພື່ອເຮັດຫຼ້ອນໜ້າທີ່ອັນມີກຽດສະຫງ່າຂອງຕົນ. ຂໍຮຽກຮ້ອງມາຍັງສະຫະພັນກຳມະບານລາວທຸກພາກສ່ວນ, ພະນັກງານ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວບັນດາເຜົ່າໃນທົ່ວປະເທດ ຈົ່ງພ້ອມກັນສືບຕໍ່ອອກແຮງແຂ່ງຂັນ, ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດຄັ້ງທີ IX ໃຫ້ບັນລຸຜົນສໍາເລັດຕາມຈຸດປະສົງ ແລະ ລະ ດັບຄາດໝາຍທີ່ວາງໄວ້. ຂໍສະແດງຄວາມຂອບໃຈມາຍັງຄະນະປະທານ, ບັນດາທ່ານຜູ້ນໍາພັກ-ລັດ, ອົງການຈັດ ຕັ້ງມະຫາຊົນຂັ້ນສູນກາງ, ບັນດາປະເທດເພື່ອນມິດຍຸດທະສາດ, ອົງການຈັດຕັ້ງສາກົນ, ສະຫະພັນກໍາມະບານແຕ່ລະຂັ້ນ, ບັນດາວິສາຫະກິດທັງພາກລັດ, ເອກະຊົນ, ສະມາຊິກກຳມະບານ, ກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າທີ່ໄດ້ໃຫ້ການສະໜັບສະໜູນຊ່ວຍເຫຼືອ ຈຶ່ງເຮັດໃຫ້ກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດຄັ້ງທີ IX ສໍາເລັດຜົນຢ່າງສະຫງ່າງາມ. ຂໍອວຍພອນໄຊອັນປະເສີດໃຫ້ແກ່ບັນດາສະຫາຍຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ວຽກງານອັນມີກຽດ. ສາທາລະນະລັດ ປະຊາທິປະໄຕ ປະຊາຊົນລາວ ໝັ້ນຍືນ, ພັກປະຊາຊົນ ປະຕິວັດລາວ ທີ່ມີກຽດສະຫງ່າໜັ້ນຍືນ, ອົງການຈັດຕັ້ງກໍາມະບານ, ຊົນຊັ້ນກໍາມະກອນລາວຈົ່ງອາດຫານກ້າວຂຶ້ນຢ່າງມີໄຊ, ກໍາມະບານລາວເຂັ້ມແຂງ, ທັນສະໄໝ, ສາມັກຄີ, ມີວິໄນ ແລະ ນໍ້າໃຈສາກົນກໍາມະຊີບ, ຍົກສູງການນຳພາວຽກງານກຳມະບານປົກປ້ອງສິດຜົນປະໂຫຍດອັນຊອບທຳຂອງຊົນຊັ້ນກຳມະ ກອນ ພັດທະນາສີມືແຮງງານໃຫ້ເຂັ້ມແຂງຮອບດ້ານ ຕິດພັນກັບການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໜ່.
ຂ່າວ: ບຸນຕອມ; ພາບ: ຕຸໄລເພັດ ພິມເມືອງ
ຄໍາເຫັນ