 |
ສະຫາຍ ພູຂົງ ພິລາເພັດ ຫົວໜ້າກົມກໍ່ສ້າງພັກ ຄະນະຈັດຕັ້ງສູນກາງພັກຕາງໜ້າອະນຸກຳມະການກົດລະບຽບ ແລະ ບຸກຄະລາກອນກອງປະຊຸມໃຫຍ່ຄັ້ງທີ XII ຂອງພັກໄດ້ຜ່ານຮ່າງບົດສຳຫຼວດການນຳພາລວມຂອງຄະນະບໍລິຫານງານພັກສະໄໝທີ XI; ເພື່ອເປັນບ່ອນອີງໃຫ້ແກ່ການຄົ້ນຄວ້າປະກອບຄໍາເຫັນ ຂອງບັນດາຜູ້ເຂົ້າຮ່ວມກອງປະຊຸມ, ສະຫາຍປະທານກອງປະຊຸມ ໄດ້ມີບາງຄໍາເຫັນເຈາະຈີ້ມ ໃຫ້ຜູ້ເຂົ້າຮ່ວມເອົາໃຈໃສ່ປະກອບຄໍາເຫັນ ຢ່າງກົງໄປກົງມາ ເພື່ອເຮັດໃຫ້ມີເນື້ອໃນເລິກເຊິ່ງ, ພາວະວິໄສ, ຖືກກັບສະພາບຄວາມເປັນຈິງ ແລະ ຊອກໃຫ້ເຫັນສາເຫດທີ່ແທ້ຈິງ, ວິທີການ, ມາດຕະການແກ້ໄຂທີ່ຖືກຕ້ອງ, ເດັດຂາດ, ທັນການ, ສອດຄ່ອງ ກັບສະພາບການເລັ່ງທວງຕົວຈິງ, ເພື່ອສ້າງການຫັນ ປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ.
 |
ໃນໂອກາດດຽວກັນ, ສະຫາຍ ຄຳໄຫຼ ສີປະເສີດ ຕາງໜ້າອະນຸກຳມະການກົດລະບຽບ ແລະ ບຸກຄະລາກອນກອງປະຊຸມໃຫຍ່ຄັ້ງທີ XII ຂອງພັກ ກໍໄດ້ຜ່ານຂໍ້ຕົກລົງຂອງກົມການເມືອງສູນກາງພັກສະບັບເລກທີ 20/ກມສພ, ລົງວັນທີ 26 ກັນຍາ 2025 ວ່າດ້ວຍມາດຕະຖານ, ເງື່ອນໄຂຂອງຄະນະບໍລິຫານງານສູນກາງພັກ ແລະ ພະນັກງານຂັ້ນຍຸດທະສາດຂອງພັກ-ລັດສະໄໝທີ XII. ເພື່ອເປັນບ່ອນອີງໃຫ້ແກ່ການຄົ້ນຄວ້າ, ຄັດເລືອກເອົາບຸກຄະລາກອນ ແລະ ຮັບປະກັນໄປຕາມທິດທີ່ພັກໄດ້ກຳນົດໄວ້, ສະຫາຍພົນເອກ ຈັນສະໝອນ ຈັນຍາລາດ ກໍໄດ້ມີຄຳເຫັນຊີ້ນໍາໃຫ້ບັນດາສະຫາຍຜູ້ແທນກອງປະຊຸມເປັນຕົ້ນ: ເອົາໃຈໃສ່ໃນການຄົ້ນຄວ້າ, ກຳແໜ້ນກ່ຽວກັບມາດຕະຖານ, ເງື່ອນໄຂໂດຍໃຫ້ຖືເອົາດ້ານຄຸນທາດການເມືອງ, ຄຸນ ສົມບັດສິນທໍາປະຕິວັດເປັນກົກ, ເລືອກເອົາບຸກຄົນທີ່ມີຄຸນທາດການເມືອງໜັກແໜ້ນ, ມີຄວາມຮູ້ຄວາມສາ ມາດ ແລະ ສຸຂະພາບແຂງແຮງ; ດ້ານໂຄງປະກອບບຸກຄະລາກອນຄະນະບໍລິຫານງານສູນກາງພັກສະໄໝທີ XII ຕ້ອງຄໍານຶງຄວາມຮັບປະກັນໃນໜ້າທີ່ການເມືອງ. ເພາະສະນັ້ນຕ້ອງໃຫ້ມີທັງຄົນເກົ່າ, ຄົນໃໝ່, ຮັບປະກັນໃຫ້ໄດ້ 3 ຮຸ່ນ (ຮຸ່ນອາວຸໂສ, ຮຸ່ນກາງ, ຮຸ່ນໜຸ່ມ), ປະກອບດ້ວຍຊົນເຜົ່າ, ເພດຍິງ ແລະ ຂົງເຂດວຽກງານຕ່າງໆຢູ່ສູນກາງ ແລະ ທ້ອງຖິ່ນຢ່າງສົມເຫດສົມຜົນ; ຄຽງຄູ່ກັນນັ້ນທັດສະນະທີ່ຄວນເອົາໃຈໃສ່ຕ້ອງຢືນຢູ່ໃນຜົນປະໂຫຍດລວມຂອງຊາດ ແລະ ປະຊາຊົນບັນດາເຜົ່າເປັນຫຼັກ, ມີຄວາມເສຍສະຫຼະຮັບໃຊ້ຊາດ, ຮັບໃຊ້ປະຊາຊົນຢ່າງແທ້ຈິງ, ທັງນີ້ກໍເພື່ອເລືອກເອົາຄະນະບໍລິຫານງານສູນກາງພັກສະໄໝທີ XII ໃຫ້ເປັນການນໍາທີ່ເຂັ້ມແຂງ. ທັງໝົດນັ້ນ, ກໍເພື່ອເພີ່ມທະວີຄວາມເຂັ້ມແຂງຂອງພັກບົນພື້ນຖານຄວາມສາ ມັກຄີເປັນເອກະພາບໃນທົ່ວພັກ.
 |
ຫຼັງຈາກນັ້ນ, ສະຫາຍ ພັອ ໄຊຍະສຸກ ແສງປະທິບ ຮອງຫົວໜ້າກົມຈັດຕັ້ງພັກ ກົມໃຫຍ່ການເມືອງກອງທັບ ກະຊວງປ້ອງກັນປະເທດ ຕາງໜ້າອະນຸກຳມະການກົດລະບຽບ ແລະ ບຸກຄະລາກອນກອງປະຊຸມໃຫຍ່ຄັ້ງທີ XII ຂອງພັກ ກໍໄດ້ຜ່ານລະບຽບ ແລະ ແນະນຳວິທີການຂີດບັດທາບທາມບຸກຄະລາກອນເພື່ອເຮັດໃຫ້ຂັ້ນຕອນ ດໍາເນີນໄປຢ່າງຖືກຕ້ອງ, ເປັນເອກະພາບ ແລະ ຮັບປະກັນໃຫ້ມີຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້.
ໃນຕອນທ້າຍ, ບັນດາສະຫາຍຜູ້ແທນສົມບູນ-ສຳຮອງ ທີ່ເຂົ້າຮ່ວມກອງປະຊຸມ ກໍໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດທາບທາມເອົາບຸກຄະລາກອນທີ່ຈະອອກຮັບສະໝັກເລືອກຕັ້ງເຂົ້າໃນຄະນະບໍລິຫານງານສູນກາງພັກສະໄໝທີ XII ຮອບທີ 2 ສໍາເລັດຕາມວາລະທີ່ກຳນົດໄວ້.
ໃນໂອກາດເຄື່ອນໄຫວເຮັດວຽກຢູ່ແຂວງຊຽງຂວາງ ໃນຄັ້ງນີ້, ສະຫາຍ ພົນເອກ ຈັນສະໝອນ ຈັນຍາລາດ ພ້ອມດ້ວຍຄະນະ ຍັງໄດ້ໄປຢ້ຽມຢາມ ແລະ ຊຸກຍູ້ວຽກງານການພັດທະນາກະສິກຳ ຢູ່ສູນບໍລິ ການເຕັກນິກກະສິກໍາ ແລະ ສວນປູກພືດ-ຜັກຂອງປະຊາຊົນ ຢູ່ບ້ານວຽງ ເມືອງແປກ ຕື່ມອີກ.
(ຂ່າວ-ພາບ: ກົມປະຊາສໍາພັນ ຫສນຍ)
ຄໍາເຫັນ