ແມ່ນໜຶ່ງໃນຄໍາເຫັນຊີ້ນໍາຂອງທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ທີ່ໄດ້ກ່າວຕໍ່ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ວາລະເປີດກວ້າງໂດຍໃຫ້ລັດຖະບານສຸມໃສ່ແກ້ໄຂບັນຫາດັ່ງກ່າວໃນປີ 2025. ປັດຈຸບັນ, ລັດຖະບານໄດ້ມີທິດທາງແກ້ໄຂບັນຫາດັ່ງກ່າວ ໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 18 ພະຈິກ ຜ່ານມາຊຶ່ງຄາດໝາຍໃນປີ 2025 ລັດຖະບານຈະພະຍາຍາມປັບເພີ່ມຂຶ້ນເງິນເດືອນພະນັກງານ-ລັດຖະກອນ.
ທ່ານ ສອນໄຊ ສີພັນດອນ ໄດ້ກ່າວໃຫ້ຮູ້ວ່າ: ລາຍຈ່າຍສ່ວນໃຫຍ່ ແມ່ນສຸມໃສ່ລາຍຈ່າຍບຸລິມະສິດຂອງລັດຖະບານ ເປັນຕົ້ນ ການເບີກຈ່າຍເງິນເດືອນ, ເງິນອຸດໜູນຄ່າຄອງຊີບໃຫ້ພະນັກງານ-ລັດຖະກອນ, ທະຫານ, ຕໍາຫຼວດ, ພະນັກງານບໍານານ ແລະ ຜູ້ເສຍອົງຄະ ລວມທັງການປະຕິບັດເງິນອຸດໜູນຕໍ່ຄູອາສາສະໝັກ; ໄດ້ຍົກລະດັບເງິນເດືອນຂັ້ນຕໍ່າ ຂອງພະນັກງານ-ລັດຖະກອນ ໃນປີ 2024 ໃຫ້ຢູ່ໃນລະດັບ 1,850,000 ກີບ/ຄົນ/ເດືອນ ແລະ ຄາດໝາຍໃນປີ 2025 ຈະພະຍາຍາມປັບເພີ່ມຂຶ້ນ ໃຫ້ໄດ້ຕໍ່າສຸດ ຢູ່ໃນລະດັບ 2,200,000 ກີບ/ຄົນ/ເດືອນ.
ທ່ານນາຍົກລັດຖະມົນຕີ ກໍໃຫ້ຮູ້ຕື່ມວ່າ: ລັດຖະບານໄດ້ເອົາໃຈໃສ່ຈັດຕັ້ງປະຕິບັດແຜນງົບປະມານແຫ່ງລັດ ຕາມທິດບຸກທະລຸ ແລະ ເປັນເຈົ້າຕົນເອງສູງກວ່າເກົ່າ ໂດຍນໍາໃຊ້ຫຼາຍມາດຕະການ ຄວບຄູ່ກັນໄປ ເຊັ່ນ: ໄດ້ສຸມໃສ່ປັບປຸງນິຕິກໍາທີ່ກ່ຽວຂ້ອງ ເພື່ອອັດຊ່ອງວ່າງການຮົ່ວໄຫຼຂອງງົບປະມານ ແລະ ການຫັນເປັນທັນສະໄໝ,ທັງໄດ້ມອບຄວາມຮັບຜິດຊອບໃຫ້ທ້ອງຖິ່ນ ເປັນເຈົ້າຕົນເອງຫຼາຍຂຶ້ນກວ່າເກົ່າ ຊຶ່ງສາມາດຈັດເກັບລາຍຮັບງົບປະມານໄດ້ 46,174 ຕື້ກີບ ເທົ່າກັບ 92% ຂອງແຜນການປີ (ແຜນການປີ 50,107 ຕື້ກີບ), ສະເພາະທ້ອງຖິ່ນ ປະຕິບັດໄດ້ 126% ຂອງແຜນການປີ;ໃນນີ້, ທຸກແຂວງສາມາດປະຕິບັດລາຍຮັບໄດ້ເກີນແຜນ, ຄາດຄະເນໝົດປີ 2024 ລັດຖະບານ ຈະສາມາດຈັດເກັບລາຍຮັບທັງໝົດໄດ້ເກີນແຜນ ປະມານ 10% ຂອງແຜນການປີ, ຕົກເປັນເງິນປະມານ 5,000 ກວ່າຕື້ກີບ. ສ່ວນດ້ານລາຍຈ່າຍງົບປະມານ ປະຕິບັດໄດ້ 41,512 ຕື້ກີບ ເທົ່າກັບ 68% ຂອງແຜນການປີ. ສໍາລັບການປະຕິບັດລາຍຈ່າຍໝົດປີ 2024 ນີ້ ຈະຄຸ້ມຄອງບໍ່ໃຫ້ເກີນເພດານແຜນທີ່ສະພາແຫ່ງຊາດຮັບຮອງ (ຖ້າບໍ່ນັບເງິນເກີນແຜນປີ 2023 ຜ່ານມາທີ່ຈະມາປະຕິບັດເພື່ອດັດແກ້ງົບປະມານປີ 2024).
ນອກຈາກລາຍຮັບ ທີ່ຄາດວ່າຈະເກີນແຜນ 10% ຂອງແຜນການ, ຍັງມີລາຍຮັບວິຊາການ ແລະ ກອງທຶນຈໍານວນໜຶ່ງ ທີ່ຫົວໜ່ວຍງົບປະມານ ສະເໜີດັດແກ້ຕື່ມ 941,45 ຕື້ກີບ ທີ່ມີຄວາມຈໍາເປັນໃນການໃຊ້ຈ່າຍ ເພື່ອປະຕິບັດວຽກງານຈຸດສຸມທ້າຍປີ ທີ່ຈະໄດ້ສະເໜີດັດແກ້ຕາມ ມາດຕາ 59 ທີ່ກໍານົດໃນກົດໝາຍ ວ່າດ້ວຍ ງົບປະມານແຫ່ງລັດ; ພ້ອມນີ້, ກໍໄດ້ສືບຕໍ່ແກ້ໄຂໜີ້ສິນພາຍໃນ ແລະ ຕ່າງປະເທດ ດ້ວຍຮູບການຕ່າງໆ ໃຫ້ໄດ້ຕາມສັນຍາ ໂດຍໄດ້ສຸມໃສ່ຈັດຕັ້ງປະຕິບັດມາດຕະການຕ່າງໆ ໃນການລະດົມທຶນ ເປັນຕົ້ນແມ່ນ ການເກັບຄືນເງິນກູ້ຢືມຕໍ່, ການກູ້ຢືມ ແລະ ການອອກພັນທະບັດຜ່ານຕະຫຼາດຫຼັກຊັບລາວ. ນອກຈາກນັ້ນ, ຍັງໄດ້ນໍາໃຊ້ລາຍຮັບພາຍໃນຈໍານວນໜຶ່ງ ເພື່ອຊໍາລະໜີ້ສິນໃຫ້ຕ່າງປະເທດ ທັນຕາມກໍານົດເວລາ ແລະ ສາມາດຮັບປະກັນບໍ່ໃຫ້ປະເທດເຮົາຕົກເປັນປະເທດທີ່ບໍ່ສາມາດຊໍາລະໜີ້ສິນໄດ້. ສໍາລັບການແກ້ໄຂໜີ້ສິນໂຄງການລົງທຶນຂອງລັດ ດ້ວຍຮູບແບບອວ່າຍໜີ້ 3 ແຈ, ບ້ວງ 8,000 ຕື້ກີບ ມາຮອດປັດຈຸບັນ ສາມາດປະຕິບັດໄດ້ 7,893 ຕື້ກີບ ເທົ່າກັບ 98.67% ຂອງແຜນການ.
ເຖິງຢ່າງໃດກໍດີ, ທິດທາງກ່ຽວກັບການແກ້ໄຂບັນຫາຊີວິດການເປັນຢູ່ຂອງພະນັກງານ-ລັດຖະກອນ, ທະຫານ, ຕໍາຫຼວດ, ພະນັກງານບໍານານ ແລະ ຜູ້ເສຍອົງຄະ ລວມທັງການປະຕິບັດເງິນອຸດໜູນຕໍ່ຄູອາສາສະໝັກ ຈະມີຂໍ້ມູນໜ້ອຍໃນການລາຍງານ ແຕ່ກໍມີຂໍ້ມູນທີ່ສະໜັບສະໜູນ ບໍ່ວ່າຈະເປັນການເກັບລາຍຮັບເກີນແຜນ ແລະ ອື່ນໆ ຊຶ່ງໄດ້ສະແດງເຖິງຄວາມເອົາໃຈໃສ່ຂອງພັກ ແລະ ລັດຖະບານ ກ່ຽວກັບທິດທາງ ທີ່ຈະແກ້ໄຂບັນຫາດັ່ງກ່າວ ຊຶ່ງຈະເປັນປັດໄຈສຳຄັນທີ່ຊ່ວຍໃຫ້ບຸກຄະລາກອນຂອງພັກ, ລັດຖະບານ ມີຊີວິດການເປັນຢູ່ທີ່ດີຂຶ້ນ ມີກຳລັງໃຈໃນການຮັບໃຊ້ຊາດ, ຮັບໃຊ້ພັກ, ລັດ ແລະ ຮັບໃຊ້ປະຊາຊົນ ຜ່ານຜ່າຄວາມຫຍຸ້ງຍາກ ປະກອບສ່ວນພັດທະນາປະເທດຊາດໃຫ້ຈະເລີນຮຸ່ງເຮືອງຂຶ້ນເລື້ອຍໆ.
ຄໍາເຫັນ