 |
ເນື້ອແທ້ຂອງລັດທິຫຼາຍຝ່າຍແມ່ນຖືເອົາຜົນປະໂຫຍດຮ່ວມເປັນສາຍພານເພື່ອແກ້ໄຂບັນຫາຫຍຸ້ງຍາກຮ່ວມດ້ວຍການປຶກສາຫາລືຢ່າງສະເໝີພາບກັນແລະປະຕິບັດງານຢ່າງປະສົມປະສານກັນ. ປັດຈຸບັນ, ການຫຼອກລວງທາງໂທລະຄົມຂ້າມຊາດໄດ້ກາຍເປັນຮູບແບບການເຄື່ອນໄຫວແບບອຸດສາຫະກຳ. ການປະຕິບັດງານຂ້າມຊາດ, ການໂອນເງິນຂ້າມຊາດແລະການລີ້ຊ້ອນຂອງຜູ້ກ່ຽວຂ້ອງລວມທັງການປະຍຸກໃຊ້ເຕັກໂນໂລຊີ AI ເຂົ້າໃນວິກິດການຫຼອກລວງເຮັດໃຫ້ປະເທດດຽວຍາກທີ່ຈະຮັບມືແກ້ໄຂໄດ້. ໃນກອງປະຊຸມຄັ້ງນີ້, 6 ປະເທດໄດ້ເຊັນເອກະສານຜົນງານ, ຊີ້ແຈງບັນດາໜ້າວຽກຕົ້ນຕໍເຊັ່ນ: ການສຸມໃສ່ປາບປາມເຂດດຳເນີນການຫຼອກລວງແລະຈັບກຸມຜູ້ກ່ຽວຂ້ອງຢ່າງສຸດຄວາມສາມາດ, ຍິ່ງໄດ້ລົງເລິກປຶກສາຫາລືກ່ຽວກັບຂໍ້ລິເລີ່ມຂອງຝ່າຍຈີນໃນການສ້າງພັນທະມິດປາບປາມການຫຼອກລວງທາງໂທລະຄົມສາກົນຊຶ່ງໄດ້ສະແດງໃຫ້ເຫັນເຖິງແນວຄວາມຄິດ “ມວນມະນຸດເປັນປະຊາຄົມຄວາມໝັ້ນຄົງທີ່ຕັດແຍກອອກຈາກກັນບໍ່ໄດ້” ທີ່ຈີນໄດ້ສະເໜີອອກໃນຂໍ້ລິເລີ່ມຄວາມໝັ້ນຄົງທົ່ວໂລກ.
ຜົນການຮ່ວມມືຕົວຈິງໄດ້ພິສູດໃຫ້ເຫັນເຖິງພະລັງຊີວິດຂອງລັດທິຫຼາຍຝ່າຍໂດຍກົງ. ໃນຊຸມປີຜ່ານມາ, ຈີນໄດ້ຈັດຕັ້ງປະຕິບັດຕາມຂໍ້ລິເລີ່ມຄວາມໝັ້ນຄົງທົ່ວໂລກແລະຂໍ້ລິເລີ່ມການບໍລິຫານທົ່ວໂລກໂດຍໄດ້ສ້າງກົນໄກການຮ່ວມມືດ້ານການປະຕິບັດກົດໝາຍຫຼາຍລະດັບກັບປະເທດອ້ອມຂ້າງ, ຜົນງານສຳຄັນຫຼາຍຢ່າງໄດ້ສະແດງໃຫ້ເຫັນເຖິງປະສິດທິຜົນຕົວຈິງຂອງການປະສານງານຫຼາຍຝ່າຍ. ນັບແຕ່ຕົ້ນປີນີ້ເປັນຕົ້ນມາ, ຈີນ, ມຽນມາແລະໄທໄດ້ຮ່ວມກັນປາບປາມການກະທຳຜິດກ່ຽວກັບການພະນັນແລະການຫຼອກລວງຢູ່ເຂດມິວວາດີຂອງມຽນມາ, ຂະນະທີ່ມຽນມາໄດ້ສົ່ງຜູ້ຕ້ອງຫາ 5.500 ກວ່າຄົນໃຫ້ຝ່າຍຈີນ; ເຈົ້າໜ້າທີ່ຕຳຫຼວດຈີນແລະລາວຮ່ວມກັນປາບປາມ 4 ຈຸດຫຼອກລວງທາງໂທລະຄົມຢູ່ເຂດພິເສດສາມຫຼ່ຽມຄຳຂອງລາວແລະຈັບກຸມຜູ້ກະທຳຜິດໄດ້ 600 ກວ່າຄົນ; ການປະຕິບັດງານສະເພາະລະຫວ່າງຈີນກັບກຳປູເຈຍແລະລະຫວ່າງຈີນກັບຫວຽດນາມຕ່າງໄດ້ຈັບກຸມຜູ້ກ່ຽວຂ້ອງກັບການສໍ້ໂກງ 2,141 ຄົນແລະ 149 ຄົນຕາມລຳດັບ, ຝ່າຍກຳປູເຈຍໄດ້ສົ່ງບຸກຄົນເຫຼົ່ານີ້ໃຫ້ຝ່າຍຈີນທັງໝົດ. ເມື່ອຫວນຄືນອະດີດ, ຈາກການປະຕິບັດງານຮ່ວມສະເພາະລະຫວ່າງຈີນ, ໄທ, ມຽນມາແລະລາວໃນປີ 2023ໄດ້ຈັບກຸມຜູ້ກ່ຽວຂ້ອງກັບຄະດີຫຼອກລວງ 6,492 ຄົນເຖິງການສົ່ງກຸ່ມຜູ້ກະທຳຜິດ “4 ຕະກຸນໃຫຍ່” ຢູ່ເຂດໂກກັງທາງພາກເໜືອມຽນມາໃນປີ 2025 ເຂົ້າສູ່ຂັ້ນຕອນຕຸລາການທັງໝົດ, ຈັບກຸມແລະລົງໂທດຜູ້ຕ້ອງຫາທີ່ພົວພັນກັບຄະດີຫຼອກລວງທາງໂທລະຄົມ 57,000 ຄົນ ຊຶ່ງໄດ້ສະແດງໃຫ້ເຫັນເຖິງບົດບາດຂອງການຮ່ວມມືດ້ານການປະຕິບັດກົດໝາຍຫຼາຍຝ່າຍຢ່າງແທ້ຈິງ. ຜົນງານເຫຼົ່ານີ້ຕັດແຍກອອກຈາກຄວາມພະຍາຍາມຮ່ວມຂອງພາກສ່ວນປະຕິບັດກົດໝາຍຂອງປະເທດຕ່າງໆບໍ່ໄດ້ແລະຍິ່ງໄປກວ່ານັ້ນຍັງໄດ້ຮັບຜົນດີຈາກການມີຄວາມສະດວກແລະລຸລ່ວງດີຂອງຂອດສຳຄັນຕ່າງໆພາຍໃຕ້ກົນໄກຫຼາຍຝ່າຍເຊັ່ນ: ການແບ່ງປັນຂໍ້ມູນຂ່າວສານ, ການປະຕິບັດງານຮ່ວມແລະການສົ່ງຜູ້ກ່ຽວຂ້ອງກັບການຫຼອກລວງກັບຄືນປະເທດ ຊຶ່ງໄດ້ເຮັດໃຫ້ການປາບປາມອາຊະຍາກຳຂ້າມຊາດບັງເກີດຜົນ.
ພະລັງຊີວິດຖາວອນຂອງລັດທິຫຼາຍຝ່າຍຍິ່ງໄດ້ສະແດງໃຫ້ເຫັນຢູ່ຕາມຂະບວນການຫັນຈາກການຮັບມືແບບສຸກເສີນກາຍມາເປັນການປົກຄອງແບບປົກກະຕິ. ລັດທິຫຼາຍຝ່າຍທີ່ແທ້ຈິງບໍ່ແມ່ນກົນໄກຊົ່ວຄາວ, ຫາກແມ່ນພື້ນຖານດ້ານລະບຽບການໃນການບໍລິຫານທົ່ວໂລກ, ຕ້ອງການໃຫ້ບັນລຸການປົກຄອງຢ່າງມີປະສິດທິຜົນຖາວອນດ້ວຍການສ້າງລະບຽບການ. ຄວາມເຫັນທີ່ເປັນເອກະພາບກັນໃນກອງປະຊຸມຄັ້ງນີ້ບໍ່ພຽງແຕ່ໄດ້ສຸມໃສ່ໜ້າທີ່ປາບປາມໃນປັດຈຸບັນເທົ່ານັ້ນ, ຍິ່ງໄດ້ເນັ້ນໃສ່ການສ້າງກົນໄກປະສານງານແບບປົກກະຕິໂດຍໄດ້ກຳນົດມາດຕະການໄລຍະຍາວຕ່າງໆຢ່າງຈະແຈ້ງເຊັ່ນ: ເພີ່ມທະວີການແບ່ງປັນຂໍ້ມູນຂ່າວສານ, ຊຸກຍູ້ການສົ່ງຄືນຜູ້ກະທຳຜິດທີ່ກ່ຽວພັນກັບຄະດີຫຼອກລວງທາງໂທລະຄົມຢ່າງຕໍ່ເນື່ອງແລະອື່ນໆເພື່ອເຮັດໃຫ້ການຮ່ວມມືໃນດ້ານນີ້ກາຍເປັນກົນໄກຮ່ວມມືຖາວອນ.
ພາຍໃຕ້ສະພາບການທີ່ລັດທິຝ່າຍດຽວແລະລັດທິປົກປ້ອງເງີຍຫົວຂຶ້ນໃນປັດຈຸບັນ, ການຮ່ວມມືຫຼາຍຝ່າຍແບບນີ້ທີ່ຖືເອົາຜົນປະໂຫຍດຮ່ວມກັນເປັນທິດຊີ້ນຳ, ຖືເອົາການສ້າງກົນໄກເປັນສິ່ງຄ້ຳປະກັນແລະຖືເອົາການປະຕິບັດຕົວຈິງເປັນການຮັບປະກັນນັ້ນບໍ່ພຽງແຕ່ໄດ້ປ້ອງກັນຄວາມປອດໄພຂອງປະຊາຊົນໃນພາກພື້ນເທົ່ານັ້ນ, ຍິ່ງໄດ້ປະກອບສ່ວນດ້ານບົດຮຽນອັນລ້ຳຄ່າທີ່ໄດ້ຮັບຈາກການແກ້ໄຂບັນຫາໃນອາຊີແກ່ການບໍລິຫານຄວາມໝັ້ນຄົງທົ່ວໂລກອີກດ້ວຍ. ຄຽງຄູ່ກັບການປາບປາມຮ່ວມໄດ້ຂະຫຍາຍຕົວລົງສູ່ລວງເລິກ, ລັດທິຫຼາຍຝ່າຍຍ່ອມຈະເປັ່ງລັດສະໝີທີ່ຮຸ່ງເຮືອງກວ່າເກົ່າໃນການບໍລິຫານຄວາມໝັ້ນຄົງທົ່ວໂລກແລະສ້າງພື້ນຖານທີ່ໜັກແໜ້ນໃນການສ້າງລະບຽບສາກົນທີ່ໝັ້ນຄົງກວ່າເກົ່າແລະມີສະຖຽນລະພາບກວ່າເກົ່າ.
ໂດຍ: ຊີອາໄອ
ຄໍາເຫັນ