 |
ທ່ານ ອິນພອນຮັກ ພັດທະຟອງ ອຳນວຍການລັດວິສາຫະກິດນໍ້າປະປາ ແຂວງເຊກອງ ເວົ້າວ່າ: ເມື່ອກ່ອນ, ແຫຼ່ງນໍ້າແຫ່ງນີ້ ໄດ້ນໍາໃຊ້ເຂົ້າໃນການຜະລິດນໍ້າປະປາທົ່ວແຂວງເຊກອງ ມີຄວາມອຸດົມສົມບູນມີປ່າໄມ້ຂຽວສົດງົດງາມ ປະລິມານນໍ້າດິບ, ນໍ້າຫ້ວຍ ແລະ ນໍ້າອອກບໍ່ ມີປະລິມານຈໍານວນຫຼາຍ ສໍາລັບການຜະລິດນໍ້າປະປາ, ແຕ່ມາຮອດປັດຈຸບັນແມ່ນມີປະລິມານນໍ້າຫຼຸດໜ້ອຍລົງ ໂດຍສະເພາະໃນລະດູແລ້ງປະລິມານນ້ຳທີ່ໃຊ້ເຂົ້າໃນການຜະລິດນໍ້າປະປາ ແມ່ນບໍ່ພຽງພໍ ຍ້ອນການປ່ຽນແປງຂອງດິນຟ້າອາກາດ, ການບຸກເບີກເນື້ອທີ່ປູກຝັງກະສິກຳຂອງປະຊາຊົນຈຳນວນໜຶ່ງ, ເຮັດໃຫ້ປ່າໄມ້ແຫຼ່ງຍອດນໍ້າບົກແຫ້ງ. ສະນັ້ນ, ລັດວິສາຫະກິດນໍ້າປະປາ ແຂວງເຊກອງ ຈຶ່ງໄດ້ຈັດໃຫ້ມີການປູກທົດແທນຕົ້ນໄມ້ທີ່ເສຍໄປຢູ່ບໍລິເວນເຂດປ່າສະຫງວນຍອດນໍ້າແຫ່ງນີ້ ເພື່ອປັບຄວາມສົມດູນໃຫ້ແກ່ທໍາມະຊາດມີຄວາມອຸດົມສົມບູນ, ມີສີຂຽວຫຼາຍຂຶ້ນທັງເປັນການຮັກສາແຫຼ່ງນໍ້າບໍ່ໃຫ້ບົກແຫ້ງ ໂດຍເບ້ຍໄມ້ທີ່ປູກໃນມື້ນີ້ ປະເພດໄມ້ດູ່ນ້ຳ, ໄມ້ຈຳປາປ່າ ແລະ ໄມ້ຍາງ ຈຳນວນ 250 ເບ້ຍ.
ໂອກາດນີ້, ທ່ານ ບຸນເລີຍ ນັນທະວົງ ໄດ້ສະແດງຄວາມຊົມເຊີຍ ຕໍ່ລັດວິສາຫະກິດປ້ຳປະປາແຂວງ ທີ່ເຫັນຄວາມສຳຄັນຂອງປ່າໄມ້ ແລະ ພ້ອມກັນປູກທົດແທນ; ທັງນີ້ ເມື່ອປູກແລ້ວກໍຂໍການຮ່ວມມືຈາກປະຊາຊົນພາຍໃນບ້ານ ພ້ອມກັນເອົາໃຈໃສ່ໃນການປົກປັກຮັກສາໃຫ້ຕົ້ນໄມ້ເຕີບໃຫຍ່ແຂງແຮງ ເພື່ອໃຫ້ພື້ນທີ່ເຂດຍອດນໍ້າປົກຫຸ້ມດ້ວຍປ່າໄມ້ແໜ້ນ ໜາຂຶ້ນ.
ຂ່າວ: ອັດສະວິນ
ຄໍາເຫັນ