ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີIX ໃນວັນທີ 10 ມິຖຸນານີ້ ທີ່ສະພາແຫ່ງຊາດ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານນາງ ວັດທະນາ ດາລາລອຍ ຮັກສາການຜູ້ວ່າການທະນາຄານແຫ່ງສປປລາວ ໄດ້ຊີ້ແຈງຕໍ່ຄຳຊັກຖາມຂອງ ສະມາຊິກສະພາແຫ່ງຊາດ (ສສຊ) ວ່າ: ທຫລ ເຫັນໄດ້ຂໍ້ຈຳກັດໃນການເຂົ້າຫາສິນເຊື່ອຂອງຫົວໜ່ວຍທຸລະກິດຍັງມີຢູ່ຈຳນວນໜຶ່ງ ເປັນຕົ້ນແມ່ນຄວາມພ້ອມຂອງທຸລະກິດ, ລະບົບການຖືບັນຊີ, ການຄຸ້ມຄອງບໍລິຫານ, ຫຼັກຊັບຄໍ້າປະກັນບໍ່ພຽງພໍ, ການໄລ່ລຽງທຸລະກິດທີ່ບໍ່ຊັດເຈນ, ສະເພາະເງື່ອນໄຂການຖືບັນຊີ ແມ່ນມອບໃຫ້ຄະນະຮັບຜິດຊອບຈັດຕັ້ງປະຕິບັດ (ຂັ້ນແຂວງ) ພິຈາລະນາຜ່ອນຜັນໃຫ້ພາຍໃນຂອບເວລາບໍ່ເກີນ 01 ປີ ແລະ ໃຫ້ທະນາຄານທຸລະກິດ ແລະ ຄະນະຮັບຜິດຊອບຈັດຕັ້ງປະຕິບັດຮັບປະກັນການສືບຕໍ່ປະຕິບັດເງື່ອນໄຂຢ່າງເຂັ້ມງວດ (ອີງຕາມຄໍາແນະນໍາການຈັດຕັ້ງປະຕິບັດນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ແລະ ນະໂຍບາຍສິນເຊື່ອເພື່ອກະຕຸ້ນເສດຖະກິດ ສະບັບລົງວັນທີ 06 ພະຈິກ 2023 ທີ່ໄດ້ກຳນົດໄວ້); ຫົວໜ່ວຍທຸລະກິດຈໍານວນໜຶ່ງ ຍັງມີຄວາມສ່ຽງຕໍ່ຜູ້ໃຫ້ທຶນ ກໍຄືທະນາຄານທຸລະກິດ/ໜ່ວຍບໍລິການ ແລະ ກອງທຶນພັດທະນາໄຊສົມບູນຫຼືມີເງື່ອນໄຂ ແລະ ສອດຄ່ອງຕາມເປົ້າໝາຍ ແຕ່ປັດຈຸບັນຍັງມີພັນທະກັບທະນາຄານອື່ນ ເຮັດໃຫ້ການຕີມູນຄ່າຫຼັກຊັບຄໍ້າປະກັນຍັງມີຄວາມສ່ຽງ ແລະ ທຸລະກິດບາງຫົວໜ່ວຍຍັງເຄື່ອນໄຫວທຸລະກິດແບບຄອບຄົວ ຊຶ່ງການຫັນເປັນນິຕິບຸກຄົນມີການປະກອບເອກະສານຫຼາຍຂັ້ນຕອນ ແລະ ແກ່ຍາວເວລາ; ຫົວໜ່ວຍທຸລະກິດທີ່ໄດ້ຮັບການພິຈາລະນາອະນຸມັດແຫຼ່ງທຶນນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນຈາກຄະນະຂັ້ນແຂວງແລ້ວ, ເມື່ອດໍາເນີນການຈັດຕັ້ງປະຕິບັດຂັ້ນຕອນອະນຸມັດສິນເຊື່ອຂອງທະນາຄານທຸລະກິດ ຜ່ານການກວດກາຄືນເຫັນວ່າລູກຄ້າໄດ້ເອົາຫຼັກຊັບທີ່ຈະນໍາມາຄໍ້າປະກັນຕໍ່ທະນາຄານໄປຂາຍ ຫຼືໄປຈຳນອງກັບສະຖາບັນການເງິນອື່ນ, ຊຶ່ງເຮັດໃຫ້ມູນຄ່າຫຼັກຊັບຄໍ້າປະກັນບໍ່ພຽງພໍຕາມລະບຽບການ ແລະ ເຮັດໃຫ້ທະນາຄານຕ້ອງໄດ້ແຈ້ງຍົກເລີກການອະນຸມັດສິນເຊື່ອ, ຄຽງຄູ່ກັນນີ້ຂັ້ນຕອນໃນການອະນຸມັດສິນເຊື່ອທີ່ນໍາໃຊ້ເວລາດົນນັ້ນ, ທຫລ ເຫັນວ່າການອະນຸມັດສິນເຊື່ອແມ່ນຕິດພັນກັບຫຼາຍເງື່ອນໄຂຂອງຫົວໜ່ວຍທຸລະກິດທີ່ຈະເຂົ້າຫາແຫຼ່ງທຶນຕາມທີ່ລະບຽບການກ່ຽວຂ້ອງວາງອອກ ເປັນຕົ້ນການປະກອບເອກະສານຂອງຫົວໜ່ວຍທຸລະກິດຈໍານວນໜຶ່ງຍັງບໍ່ທັນຄົບຖ້ວນຕາມເງື່ອນໄຂ ເຮັດໃຫ້ຂອດການພິຈາລະນາສິນເຊື່ອແກ່ຍາວອອກໄປ, ການຢັ້ງຢືນການມີຕົວຕົນຂອງຫົວໜ່ວຍທຸລະກິດຈາກຂະແໜງການກ່ຽວຂ້ອງຂອງແຂວງ ຍັງບໍ່ຈະແຈ້ງບວກກັບຂັ້ນຕອນພາຍໃນຂອງຄະນະຮັບຜິດຊອບຈັດຕັ້ງປະຕິບັດນະໂຍບາຍສິນເຊື່ອຂັ້ນແຂວງ ໃນການອະນຸມັດສິນເຊື່ອຍັງມີຫຼາຍຂອດຂັ້ນ ເຮັດໃຫ້ການຄົ້ນຄ້ວາບາງຄັ້ງບໍ່ທັນກັບສະພາບການດໍາເນີນທຸລະກິດຂອງຫົວໜ່ວຍທຸລະກິດ;
ສະນັ້ນ, ໃນຕໍ່ໜ້າ ທຫລ ຈະສືບຕໍ່ປະສານສົມທົບກັບຄະນະຮັບຜິດຊອບຂັ້ນແຂວງຢ່າງເປັນປົກກະຕິ, ພ້ອມທັງຕິດຕາມ ແລະ ຊຸກຍູ້ໃຫ້ທະນາຄານທຸລະກິດເຜີຍແຜ່ຂໍ້ມູນ ແລະ ຊອກຫາລູກຄ້າທີ່ນອນໃນເປົ້າໝາຍ ຕາມຂໍ້ຕົກລົງເຂົ້າຮ່ວມໂຄງການນະໂຍບາຍສິນເຊື່ອດັ່ງກ່າວ; ເພີ່ມທະວີວຽກງານໂຄສະນາ-ປະຊາສໍາພັນລົງເຄື່ອນໄຫວເຜີຍແຜ່ຂໍ້ມູນຂ່າວສານໃຫ້ຜູ້ປະກອບການເຂົ້າໃຈຢ່າງເລິກເຊິ່ງ; ສືບຕໍ່ຂຶ້ນແຜນລົງເຄື່ອນໄຫວວຽກງານຂອງຄະນະຮັບຜິດຊອບສິນເຊື່ອເພື່ອຕິດຕາມສະພາບ ແລະ ຊຸກຍູ້ການນໍາໃຊ້ເງິນກູ້ຂອງຫົວໜ່ວຍທຸລະກິດທີ່ໄດ້ຮັບແຫຼ່ງທຶນໄປແລ້ວ (ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ) ຫົວໜ່ວຍທຸລະກິດທີ່ໄດ້ຮັບການສົມທົບດອກເບ້ຍ (ນະໂຍບາຍສິນເຊື່ອເພື່ອກະຕຸ້ນເສດຖະກິດ) ໃຫ້ເກີດປະສິດທິຜົນໃນການຜະລິດສິນຄ້າ ແລະ ການບໍລິການ; ສືບຕໍ່ທົບທວນປະເມີນຜົນການຈັດຕັ້ງປະຕິບັດນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນໃນແຕ່ລະໄລຍະໃຫ້ໄດ້ຮັບຜົນດີລວມທັງການເກັບກູ້ໜີ້ສິນເງິນກູ້ຂອງນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ; ກະກຽມຈັດກອງປະຊຸມຄະນະຮັບຜິດຊອບຈັດຕັ້ງປະຕິບັດນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນທົ່ວປະເທດແລະ ສືບຕໍ່ຄົ້ນຄວ້າຕາມການຍື່ນສະເໜີຂໍເຂົ້າຮ່ວມນະໂຍບາຍສິນເຊື່ອຂອງຫົວໜ່ວຍທຸລະກິດໂດຍຜ່ານການສະເໜີຂອງທະນາຄານທຸລະກິດໃນແຕ່ລະໄລຍະເພື່ອລາຍງານຄະນະຮັບຜິດຊອບພິຈາລະນາມີຄໍາເຫັນຮ່ວມກັນ.
ຂ່າວ: ພູວັນ, ພາບ: ສຸກສະຫວັນ
ຄໍາເຫັນ