 |
ໂອກາດນີ້, ທ່ານ ອາລຸນໄຊ ສູນນະລາດ ໄດ້ລາຍງານສະພາບລວມໃນການນໍາພາ-ຊີ້ນໍາຂອງຄະພັກ-ອົງການປົກຄອງແຂວງຈໍາປາສັກ ແລະ ການເຄື່ອນໄຫວຂອງສະມາຊິກສະພາແຫ່ງຊາດ-ສະພາປະ ຊາຊົນແຂວງ ໃນໄລຍະຜ່ານມາ ໂດຍສຸມໃສ່ການເຄື່ອນໄຫວເຜີຍແຜ່ແນວທາງນະໂຍບາຍຂອງພັກ ໂດຍສະເພາະແມ່ນມະຕິກອງປະຊຸມຄົບຄະນະ ຄັ້ງທີ 3 ຂອງຄະນະບໍລິຫານງານສູນກາງພັກ ສະໄໝທີ XII, ມະຕິກອງປະຊຸມຄົບຄະນະ ຄັ້ງທີ 5 ຂອງຄະນະບໍລິຫານງານພັກແຂວງຈໍາປາສັກ ສະໄໝທີ IX ແລະ ເອກະສານສໍາຄັນອື່ນໆ ເພື່ອເຮັດໃຫ້ການນໍາຫຼັກແຫຼ່ງ, ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ພໍ່ແມ່ປະຊາຊົນໄດ້ຮັບຮູ້ເຂົ້າໃຈຢ່າງເລິກເຊິ່ງ; ການຫັນເອົາພະນັກງານລົງກໍ່ສ້າງຮາກຖານ ເຮັດໃຫ້ຮາກຖານມີຄວາມສະຫງົບ ໂດຍສະເພາະແມ່ນສະພາບຕາມບໍລິເວນຊາຍແດນ; ພ້ອມນີ້, ຍັງຍົກໃຫ້ເຫັນທິດທາງຄາດໝາຍສູ້ຊົນ ເພື່ອສ້າງແຂວງຈໍາປາສັກ ເປັນສູນກາງທາງດ້ານເສດຖະກິດຂອງພາກໃຕ້, ຂອງ ສປປ ລາວ ແລະ ພາກພື້ນ, ສ້າງແຂວງຈໍາປາສັກ ໃຫ້ເປັນຫົວຈັກແຫ່ງການພັດທະນາທີ່ດີເດັ່ນຂອງລາວ ທັງເປັນແບບຢ່າງໃນການນໍາພາທີ່ດີເດັ່ນຂອງທົ່ວປະເທດ.
ຕໍ່ມາ, ທ່ານ ຫງວຽນ ດຶກ ຢັ້ງ ຮອງເລຂາຄະນະພັກນະຄອນ, ປະທານສະພາປະຊາຊົນນະຄອນດານັງ ກໍໄດ້ມີຄໍາເຫັນ ໂດຍສະແດງຄວາມຍ້ອງຍໍຊົມເຊີຍຕໍ່ບັນດາຜົນສໍາເລັດທີ່ຄະນະພັກ - ອົງການປົກຄອງແຂວງຈໍາປາສັກ ຍາດມາໄດ້ໃນໄລຍະຜ່ານມາ, ພ້ອມທັງຕີລາຄາສູງ ຕໍ່ຜົນການພົວພັນຮ່ວມມືຜ່ານມາ ຊຶ່ງມີການພັດທະນາຢ່າງບໍ່ຢຸດຢັ້ງ ໃນທຸກຂົງເຂດວຽກງານ. ການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກຄັ້ງນີ້ ກໍເພື່ອປະກອບສ່ວນເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍຄືສອງປະເທດ ລາວ - ຫວຽດນາມ ເວົ້າລວມ, ເວົ້າສະເພາະ ແມ່ນນະຄອນດານັງ ແລະ ແຂວງ ຈໍາປາສັກ ທີ່ດີຢູ່ແລ້ວ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.
ພ້ອມນີ້, ສອງຝ່າຍຍັງໄດ້ປຶກສາຫາລື ແລະ ແລກປ່ຽນຄໍາເຫັນຮ່ວມກັນຢ່າງກົງໄປກົງມາ ແລະ ດ້ວຍບັນຍາກາດໄມຕີຈິດມິດຕະພາບຖານສະຫາຍອ້າຍນ້ອງໜຶ່ງດຽວໃນໂລກ, ມີໜຶ່ງບໍ່ມີສອງ. ສໍາລັບທິດທາງແຜນການຈຸດສຸມຂອງການຮ່ວມມືໃນຕໍ່ໜ້າ, ສອງຝ່າຍໄດ້ມີຄວາມຍິນດີເປັນເອກະພາບສືບຕໍ່ການພົວ ພັນຮ່ວມມືເຊິ່ງກັນ ແລະ ກັນ ໃຫ້ເຂົ້າສູ່ລວງເລິກ ແລະ ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ. ຕອນທ້າຍ, ການນໍານະຄອນດານັງ ຍັງໄດ້ມອບທຶນ 500 ລ້ານດົງ ໃຫ້ແກ່ແຂວງຈຳປາສັກ ເພື່ອປະກອບສ່ວນຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນລະດູຝົນປີ 2026 ນີ້. (ຂ່າວ-ພາບ: ທູນທອງໃຈ)
ຄໍາເຫັນ