ເລຂາພັກແຂວງຄໍາມ່ວນ ຢ້ຽມຢາມ ແລະ ຊຸກຍູ້ວຽກງານ ຢູ່ບໍລິສັດ ລາວຄາຍຢວນ ບໍ່ແຮ່ ຈໍາກັດ

ທ່ານ ຫວາງ ເຕີສວນ ຜູ້ອໍານວຍການບໍລິສັດ ໄດ້ລາຍງານຕໍ່ຄະນະການນໍາກ່ຽວກັບ ສະພາບໂດຍລວມຂອງການພັດທະນາວິສາຫະກິດ, ການຜະລິດ ແລະ ການດໍາເນີນທຸລະກິດ, ການປະຕິບັດໂຄງການເພື່ອຜົນປະໂຫຍດປະຊາຊົນ ແລະ ຄວາມຮັບຜິດຊອບຕໍ່ສັງຄົມ, ແຜນການກໍ່ສ້າງສວນອຸດສາຫະກໍາເສດຖະກິດໜູນວຽນ. ບໍລິສັດດັ່ງກ່າວ, ໄດ້ເຂົ້າມາລົງທຶນ ແລະ ສ້າງຕັ້ງບໍລິສັດຢູ່ ສປປ ລາວ ໃນປີ 2008 ເປັນບໍລິສັດໜຶ່ງທີ່ໄດ້ປະສົບຜົນສໍາເລັດໃນການຂຸດຄົ້ນ ແລະ ປຸງແຕ່ງເກືອໂປຕາສແບບຂະໝາດໃຫຍ່. ໃນປີ 2025 ຜ່ານມາບໍລິສັດສາມາດຜະລິດປຸ໋ຍໂພທັສຊຽມໄດ້ຫຼາຍກວ່າ 1.3 ລ້ານໂຕນ ແລະ ບັນລຸຄວາມສົມດຸນລະຫວ່າງການຜະລິດ ແລະ ຈໍາໜ່າຍ, ນັບແຕ່ປີ 2026 ເປັນຕົ້ນມາ ບໍລິສັດຍັງສືບຕໍ່ດຳເນີນການຜະລິດຕາມແຜນຢ່າງໜັ້ນຄົງ ແລະ ຕໍ່ເນື່ອງ. ປັດຈຸບັນ, ມີປະລິມານສິນຄ້າພຽງພໍສໍາລັບການຈໍາໜ່າຍ. ນອກນີ້ບໍລິສັດຍັງໄດ້ລາຍງານກ່ຽວກັບຜົນການເຂົ້າຮ່ວມກອງປະຊຸມສໍາມະນາດ້ານນະໂຍບາຍການພັດທະນາ ແລະ ການປ້ອງກັນໄພພິບັດ ຈາກການຂຸດຄົ້ນເກືອໂປຕາສ, ພ້ອມທັງການໄປສຶກສາພາກສະໝາມ ບໍລິສັດ ຊິງຕາວ ແຂວງ ຊານຕົງ ສປຈີນ ຂອງຄະນະການນໍາແຂວງ ແລະ ບໍລິສັດ ລະຫວ່າງທ້າຍເດືອນກຸມພາຜ່ານມາ ຊຶ່ງເປັນບໍລິສັດແມ່ຂອງບໍລິສັດລາວຄາຍຢວນ, ລວມເຖິງບັນຫາສະດວກ, ຂໍ້ຫຍຸ້ງຍາກໃນການດໍາເນີນທຸລະກິດ ຕໍ່ທ່ານເລຂາພັກແຂວງຊ່ວຍພິຈາລະນາເຊັ່ນ: ນະໂຍບາຍຫຼຸດຜ່ອນດ້ານພາສີການຂົນສົ່ງສິນຄ້າ ແລະ ບັນຫາອື່ນໆ.

ໂອກາດນີ້, ທ່ານ ໄຊຊະນະ ໂຄດພູທອນ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານຂອງບໍລິສັດໃນການດໍາເນີນທຸລະກິດໄລຍະຜ່ານມາ ທີ່ໄດ້ປະກອບສ່ວນພັດທະນາເສດຖະກິດ, ມອບພັນທະຕ່າງໆ ໃຫ້ແກ່ລັດຖະບານກໍຄືແຂວງຄໍາມ່ວນດ້ວຍດີຕະຫຼອດມາ. ພ້ອມນັ້ນ, ຍັງໄດ້ສະເໜີໃຫ້ບໍລິສັດເອົາໃຈໃສ່ຕື່ມໂດຍສະເພາະການປະກອບສ່ວນຢ່າງຕັ້ງໜ້າເຂົ້າໃນການພັດທະນາແຂວງຄໍາມ່ວນ, ຊ່ວຍເຫຼືອຊຸມຊົນ, ສ້າງວຽກເຮັດງານທໍາໃຫ້ປະຊາຊົນໃນເຂດໂຄງການໃຫ້ແຂງແຮງຫຼາຍຂຶ້ນກວ່າເກົ່າ; ສືບຕໍ່ຍົກລະດັບການຜະລິດ, ສ້າງໃຫ້ບໍລິສັດລາວຄາຍຢວນ ເປັນຕົວແບບໃນການພັດທະນານິຄົມອຸດສາຫະກໍາທີ່ທັນສະໄໝ ແລະ ເປັນມິດກັບສິ່ງແວດລ້ອມ. ພ້ອມກັນນີ້ ທ່ານເລຂາພັກແຂວງຍັງໄດ້ຮັບເອົາຂໍ້ສະເໜີຂອງບໍລິສັດ ເພື່ອນໍາໄປຄົ້ນຄວ້າ ແລະ ສະເໜີຕໍ່ຂັ້ນເທິງ ເພື່ອຊອກແນວທາງແກ້ໄຂໃຫ້ເໝາະສົມ ໃຫ້ບໍລິສັດສາມາດໄດ້ດຳເນີນໄປໄດ້ດ້ວຍດີ. ຈາກນັ້ນ, ຄະນະການນໍາແຂວງ ຍັງໄດ້ຢ້ຽມຊົມເບິ່ງສະຖານທີ່ ແລະ ເຂດການຜະລິດ ຂອງບໍລິສັດອີກດ້ວຍ.

(ຂ່າວ: ມະນີວັນ + ພາບ: ກອງຄໍາ)