ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 18 ຕຸລາ ຜ່ານມາ ຢູ່ສຳນັກງານສູນກາງພັກ, ທ່ານ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ຕ້ອນຮັບ ທ່ານ ປຣາກ ໂສຄອນ ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ກຳປູເຈຍ (CPP) ທີ່ປຶກສາຂັ້ນສູງສຸດຂອງກະສັດ ກຳປູເຈຍ.
ໃນການຕ້ອນຮັບ, ທ່ານ ຫງວຽນຝູຈ້ອງ ໄດ້ຊົມເຊີຍກຳປູເຈຍ ທີ່ຈັດການເລືອກຕັ້ງສະພາແຫ່ງຊາດຢ່າງສຳເລັດຜົນ, CPP ຍາດໄດ້ໄຊຊະນະຢ່າງໃຫຍ່ຫຼວງ, ໄດ້ສ້າງຕັ້ງສະພາແຫ່ງຊາດ, ສ້າງຕັ້ງລັດຖະບານຊຸດໃໝ່ ແລະ ມອບໂອນສິດໃຫ້ການນຳຮຸ່ນໃໝ່. ທ່ານ ຫງວຽນຝູຈ້ອງ ຢືນຢັນວ່າ: ຍາມໃດ ຫວຽດນາມ ກໍສະໜັບສະໜູນກິດຈະການສ້າງສາ ແລະ ພັດທະນາ ກຳປູເຈຍ. ໃນໄລຍະຈະມາເຖິງ, ທ່ານ ຫງວຽນຝູຈ້ອງ ສະເໜີໃຫ້ ຫວຽດນາມ ແລະ ກຳປູເຈຍ ສືບຕໍ່ຖືການພົວພັນດ້ານການເມືອງເປັນແກ່ນສານກຳນົດທິດສັງລວມໃຫ້ການພົວພັນລະຫວ່າງ 2 ປະເທດ; ເພີ່ມທະວີການຮ່ວມມືໃນວຽກງານການຕ່າງປະເທດ; ສ້າງບາດກ້າວບຸກທະລຸ, ຍົກສູງປະສິດທິຜົນໃນການຮ່ວມມືດ້ານເສດຖະກິດ, ວັດທະນະທຳ ແລະ ການສຶກສາ.
ທ່ານ ປຣາກ ໂສຄອນ ຢືນຢັນວ່າ: ກຳປູເຈຍ ຈະສືບຕໍ່ສົມທົບກັບ ຫວຽດນາມ ຢ່າງແໜ້ນແຟ້ນ ເພື່ອປະຕິບັດບັນດາສົນທິສັນຍາ, ສັນຍາ, ຂໍ້ຕົກລົງ ແລະ ຂໍ້ສະຫຼຸບລະຫວ່າງບັນດາການນຳຂັ້ນສູງຂອງ 2 ພັກ ແລະ 2 ປະເທດໃຫ້ບັນລຸປະສິດທິຜົນ; ພ້ອມທັງເນັ້ນໜັກວ່າ, ບໍ່ວ່າຈະດຳລົງຕຳແໜ່ງໃດກໍຕາມ, ທ່ານກໍຈະເຮັດຈົນສຸດຄວາມສາມາດເພື່ອຊຸກຍູ້ການພົວພັນລະຫວ່າງ ກຳປູເຈຍ - ຫວຽດນາມ ໃຫ້ນັບມື້ນັບພັດທະນາ.
ຄໍາເຫັນ