 |
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ນໍາເອົາຄວາມຢື້ຢາມຖາມຂ່າວ ແລະ ໄມຕີຈິດມິດຕະພາບອັນອົບອຸ່ນ ຈາກ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ແລະ ພະນະທ່ານ ໄຊສົມພອນ ພົມວິຫານ ປະທານສະພາແຫ່ງຊາດເຖິງ ພະນະທ່ານ ກອມບໍຈາວ ຊັງຕັງຊາທາຣ ພ້ອມທັງໄດ້ສະແດງຄວາມຊົມເຊີຍ ພະນະທ່ານ ກອມບໍຈາວ ຊັງຕັງຊາທາຣ ທີ່ໄດ້ຮັບການເລືອກຕັ້ງໃຫ້ດໍາລົງຕໍາແໜ່ງເປັນ ນາຍົກລັດຖະມົນຕີ ແຫ່ງ ມົງໂກລີ ຄົນໃໝ່ ໃນເດືອນກໍລະກົດ 2025 ທີ່ຜ່ານມາ ແລະ ສະແດງຄວາມຊົມເຊີຍວັນຊາດມົງໂກລີ ຄົບຮອບ 819 ປີ ໃນວັນທີ 11 ກໍລະກົດ 2025 ທີ່ຜ່ານມາ.
ພະນະທ່ານ ທອງສະຫວັນ ພົມວິຫານ ໄດ້ແຈ້ງໃຫ້ຊາບກ່ຽວກັບຜົນການພົບປະສອງຝ່າຍກັບ ພະນະທ່ານ ນາງ ບັດເຊເຊັກ ບັດເມິງ (H.E. Mrs. BATTSETSEG BATMUNKH) ລັດຖະມົນຕີກະຊວງການຕ່າງປະເທດ ແຫ່ງ ມົງໂກລີ ໃນວັນທີ 20 ສິງຫາ ທີ່ຜ່ານມາ ຊຶ່ງສອງຝ່າຍ ໄດ້ເຫັນດີເປັນເອກະພາບໃນການສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ມົງໂກລີ ໂດຍສະເພາະ ການພົວພັນ ແລະ ຮ່ວມມືໃນສາຍພັກ, ລັດຖະສະພາ, ປ້ອງກັນຊາດ, ສາທາລະນະສຸກ, ກະສິກຳ, ການສຶກສາ, ການຄ້າ, ວັດທະນະທໍາ, ການທ່ອງທ່ຽວ ກໍຄືການໄປມາຫາສູ່ຂອງປະຊາຊົນສອງຊາດ ລາວ ແລະ ມົງໂກລີ ເພີ່ມຂຶ້ນໃນຊຸມປີຕໍ່ໜ້າ. ພະນະທ່ານ ທອງສະຫວັນ ພົມວິຫານ ຍັງໄດ້ສະແດງຄວາມຂອບໃຈຕໍ່ການຮ່ວມມື ແລະ ຊ່ວຍເຫຼືອຂອງມົງໂກລີ ໃນໄລຍະຜ່ານມາ ໂດຍສະເພາະແມ່ນການປະກອບສ່ວນຊ່ວຍເຫຼືອໃນການປັບປຸງໂຮງໝໍມິດຕະພາບ ລາວ-ມົງໂກລີ ທີ່ ແຂວງຊຽງຂວາງ ແລະ ການສົ່ງຊ່ຽວຊານແພດໝໍຈາກ ມົງໂກລີ ມາປະຈໍາຢູ່ໂຮງໝໍດັ່ງກ່າວ, ລວມທັງການມອບແກະ ຈໍານວນ 1,050 ໂຕ ໃຫ້ແກ່ ລັດຖະບານລາວ ໃນປີ 2018 ທີ່ຜ່ານມາ.
ໃນຂະນະດຽວກັນ, ພະນະທ່ານ ກອມບໍຈາວ ຊັງຕັງຊາທາຣ ນາຍົກລັດຖະມົນຕີ ແຫ່ງ ມົງໂກລີີ ກໍໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຝາກຄວາມຢື້ຢາມຖາມຂ່າວອັນອົບອຸ່ນ ແລະ ໄມຕີຈິດມິດຕະພາບອັນອົບອຸ່ນ ມາຍັງ ພະນະທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ທີ່ເຄີຍໄດ້ຮ່ວມເຮັດວຽກຮ່ວມກັນເມື່ອຄັ້ງທີ່ດໍາລົງຕໍາແໜ່ງເປັນປະທານສະພາຄູຣານໃຫຍ່ ແຫ່ງ ມົງໂກລີ ແລະ ຝາກຄວາມຢື້ຢາມຖາມຂ່າວ ຫາ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ເຊັ່ນດຽວກັນ. ພ້ອມນີ້, ຍັງໄດ້ຕີລາຄາສູງຕໍ່ການຢ້ຽມຢາມທາງການມົງໂກລີ ຂອງລັດຖະມົນຕີກະຊວງການຕ່າງປະເທດລາວ ກໍຄືການເຂົ້າຮ່ວມກອງປະຊຸມລັດຖະມົນຕີຕ່າງປະເທດ FEALAC ຄັ້ງທີ 10 ທີ ມົງໂກລີ ໃນຄັ້ງນີ້, ອັນໄດ້ເປັນການປະກອບສ່ວນສໍາຄັນເຂົ້າໃນການເພີ່ມທະວີ ແລະ ຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີ ແລະ ການຮ່ວມມືອັນດີງາມ ລະຫວ່າງ ມົງໂກລີ ແລະ ສປປ ລາວ. ພະນະທ່ານນາຍົກລັດຖະມົນຕີແຫ່ງມົງໂກລີ ຍັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ (JC) ລາວ-ມົງໂກລີ ຄັ້ງທີ 12 ທີ່ ສປປ ລາວ ເປັນເຈົ້າພາບ ໃນເດືອນມັງກອນ 2025 ຜ່ານມາ ແລະ ສະເໝີໃຫ້ສອງຝ່າຍສືບຕໍ່ຈັດຕັ້ງປະຕິບັດຜົນການຕົກລົງຂອງກອງປະຊຸມດັ່ງກ່າວ ກໍຄື ການຈັດຕັ້ງປະຕິບັດບັນດາເອກະສານຮ່ວມມືສອງຝ່າຍຕ່າງໆ ທີ່ໄດ້ລົງນາມຮ່ວມກັນໃນໄລຍະຜ່ານມາໃຫ້ເປັນຮູບປະທໍາ ເພື່ອນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດມົງໂກລີ ແລະ ສປປ ລາວ.
ພະນະທ່ານ ກອມບໍຈາວ ຊັງຕັງຊາທາຣ ຍັງໄດ້ສະແດງຄວາມຂອບໃຈຕໍ່ຄໍາອວຍພອນອັນປະເສີດ ແລະ ໄດ້ອວຍພອນໃຫ້ການເດີນທາງຢ້ຽມຢາມມົງໂກລີ ຂອງ ທ່ານລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ຄະນະ ປະສົບຜົນສໍາເລັດຕາມລະດັບຄາດໝາຍທີ່ວາງໄວ້.
ໃນໂອກາດຢ້ຽມຢາມທາງການຢູ່ມົງໂກລີຄັ້ງນີ້ ທ່ານພົນເອກ ບຽມບາຊູເຣນ ຈຳສຣັງ (B.G. Mr. Byambasuren JAMSRAN) ຫົວໜ້າກອງບັນຊາການທະຫານຊາຍແດນ ກະຊວງປ້ອງກັນປະ ເທດແຫ່ງມົງໂກລີ ອະດີດເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ມົງໂກລີ ປະຈຳ ສປປ ລາວ ທີ່ຫາກໍສໍາເລັດການປະຕິບັດໜ້າທີ່ການທູດຢູ່ ສປປ ລາວ ໃນເດືອນພຶດສະພາ 2025 ທີຜ່ານມາກໍໄດ້ຈັດງານລ້ຽງອາຫານຄໍ່າຕ້ອນຮັບ ພະນະທ່ານ ທອງສະຫວັນ ພົມວິຫານ ແລະ ຄະນະອີກດ້ວຍ.ທ່ານ ຫົງແກ້ວ ສຸກສະຫວັດ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈໍາມົງໂກລີ ໄດ້ຮ່ວມຕິດຕາມຄະນະໃນໄລຍະການຢ້ຽມຢາມມົງໂກລີຄັ້ງນີ້.
(ຂ່າວ: ກຕທ)
ຄໍາເຫັນ