 |
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຕໍ່ ທ່ານ ເຄັນທ໌ ວາຊ່ອງ ໃນການປະຕິບັດໜ້າທີ່ເປັນເອກອັກຄະລັດຖະທູດແຫ່ງ ການາດາ ປະຈຳ ສປປ ລາວ ນັບແຕ່ເດືອນຕຸລາ 2025 ເປັນຕົ້ນມາ, ພ້ອມທັງສະແດງຄວາມເຊື່ອໝັ້ນວ່າ ທ່ານເອກອັກຄະລັດຖະທູດ ຈະສືບຕໍ່ປະກອບສ່ວນເຂົ້າໃນການເສີມຂະຫຍາຍສາຍພົວພັນອັນດີງາມລະຫວ່າງສອງປະເທດ ໃຫ້ໄດ້ຮັບການພັດທະນາຍິ່ງໆຂຶ້ນ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງຊາດ ລາວ-ການາດາ. ພ້ອມນີ້, ທ່ານລັດຖະມົນຕີ ຍັງໄດ້ສະແດງຄວາມຂອບໃຈຕໍ່ການສະໜັບສະໜູນຂອງການາດາຕໍ່ ສປປ ລາວ ຕະຫຼອດໄລຍະ 5 ທົດສະວັດຜ່ານມານັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 15 ມິຖຸນາ 1974 ແລະ ໄດ້ແລກປ່ຽນທິດທາງການເສີມຂະຫຍາຍການພົວພັນ ແລະ ການຮ່ວມມືໃນດ້ານຕ່າງໆ, ລວມເຖິງການເກັບກູ້ລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (UXO), ການສຶກສາໂດຍຜ່ານໂຄງການ SEED ແລະ ການຮ່ວມມືໃນຂອບອາຊຽນ-ການາດາ. ພິເສດ, ສປປ ລາວ ໄດ້ຮັບໜ້າທີ່ເປັນປະເທດປະສານງານສໍາລັບການພົວພັນຮ່ວມມື ອາຊຽນ-ການາດາ ປີ 2024-2027. ນອກນີ້, ທ່ານ ລັດຖະມົນຕີ ກໍໄດ້ສະແດງຄວາມຊົມເຊີຍໃນໂອກາດຄົບຮອບ 1 ປີຂອງການເປີດສະຖານເອກອັກຄະລັດຖະທູດ ແຫ່ງ ການາດາ ປະຈໍາ ສປປ ລາວ ຢ່າງເປັນທາງການ ທີ່ ນະຄອນຫຼວງວຽງຈັນ (ເດືອນມີນາ 2025).
ໃນໂອກາດດຽວກັນນີ້, ທ່ານເອກອັກຄະລັດຖະທູດ ກໍໄດ້ສະແດງຄວາມຂອບໃຈຕໍ່ທ່ານລັດຖະ ມົນຕີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຍິນດີທີ່ຈະສືບຕໍ່ໃຫ້ການສະໜັບສະໜູນ ແລະ ເຮັດວຽກຮ່ວມກັບຝ່າຍລາວຢ່າງໃກ້ຊິດ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວ ພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດໃນອະນາຄົດ ເພື່ອນໍາເອົາຜົນປະ ໂຫຍດສູງສຸດມາສູ່ປະຊາຊົນສອງຊາດ ລາວ-ການາດາ.
(ຂ່າວ: ກຕທ)
ຄໍາເຫັນ