ລມຕ ກະຊວງກະສິກຳ ແລະ ສິ່ງແວດລ້ອມ ຕ້ອນຮັບທູດ ສະຫະພາບເອີຣົບປະຈຳ ສປປ ລາວ

ໃນໂອກາດນີ້, ທ່ານ ລິນຄຳ ດວງສະຫວັນ ສະແດງຄວາມຍິນດີຕ້ອນຮັບ ອັນອົບອຸ່ນ ຕໍ່ ທ່ານເອກອັກຄະລັດຖະທູດ ພ້ອມດ້ວຍຄະນະ ທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການໃນຄັ້ງນີ້ ແລະ ຍັງໄດ້ຕີລາຄາສູງທີ່ໄລຍະຜ່ານມາ ສະຫະພາບເອີຣົບ (EU) ທີ່ປະກອບສ່ວນເສີມຂະຫຍາຍສາຍສຳພັນມິດຕະພາບທາງການທູດ ສະຫວ່າງ ສປປ ລາວ ແລະ ສະຫະພາບເອີຣົບ ຄົບຮອບ 50 ປີ. ນັບແຕ່ທັງສອງຝ່າຍ ໄດ້ລົງນາມບົດບັນທຶກການຮ່ວມມື ຫຼາຍສະບັບ ເພື່ອສ້າງພື້ນຖານການຮ່ວມມື ຕິດພັນກັບການຜະລິດກະສິກໍາເປັນສິນຄ້າ, ພັດທະນາຊົນນະບົດ ແລະ ຂອບການຮ່ວມມືພາຍໃຕ້ໂຄງການ TICAF ຊຶ່ງປະກອບດ້ວຍ:

1. ສະໜັບສະໜູນການປັບປຸງລະບົບຕ່ອງໂສ້ມູນຄ່າ ກາເຟ, ຊາ, ໄມ້ ແລະ ຜະລິດຕະພັນໄມ້, ພ້ອມທັງຍົກສູງຄຸນນະພາບ, ສ້າງມູນຄ່າເພີ່ມ ແລະ ເປີດຕະຫຼາດໃນສະຫະພາບ ເອີຣົບ ໂດຍລັດຖະບານຝຣັ່ງ ແລະ ຈັດຕັ້ງປະຕິບັດໂດຍ ອົງການ AFD ປະຈໍາ ສປປ ລາວ;

2. ໂຄງການປົກປັກຮັກສາ ແລະ ຄຸ້ມຄອງປ່າໄມ້ (FLEGT) ໂດຍລັດຖະບານເຢຍລະມັນ ແລະ ຈັດຕັ້ງປະຕິບັດໂດຍ ອົງການ GIZ ປະຈໍາ ສປປ ລາວ ແລະ ອື່ນໆ.

ນອກຈາກນັ້ນ, ທ່ານລັດຖະມົນຕີກະຊວງກະສິກໍາ ແລະ ສິ່ງແວດລ້ອມ ຍັງໄດ້ສະເໜີໃຫ້ສະຫະ ພາບເອີຣົບ ສືບຕໍ່ການຮ່ວມມືລະຫວ່າງສອງຝ່າຍ ໃນຂົງເຂດວຽກງານທີ່ໄດ້ກ່າວມານັ້ນ ແລະ ຊ່ວຍເສີມຂະຫຍາຍສາຍພົວພັນໃຫ້ແໜ້ນແຟ້ນຍິ່ງໆຂຶ້ນ, ພ້ອມທັງເປັນການຍົກສູງ ຄຸນນະພາບຂອງຜະລິດຕະພັນ, ການປົກປັກຮັກສາປ່າໄມ່, ແລກປ່ຽນຖອດຖອນບົດຮຽນນໍາກັນ ແລະ ສະໜັບສະໜູນຊຸກຍູ້ເຊິ່ງກັນ ແລະ ກັນໃຫ້ນັບມື້ນັບຫຼາຍຂຶ້ນ. ເນື່ອງຈາກວ່າ, ວຽກງານດັ່ງກ່າວລ້ວນແລ້ວແຕ່ເປັນວຽກງານບຸລິມະສິດຂອງກະຊວງກະສິກໍາ ແລະ ສິ່ງແວດລ້ອມ, ທັງເປັນການຊ່ວຍປົກປັກຮັກສາ, ຟື້ນຟູ ແລະ ຮັບປະກັນການຄຸ້ມຄອງ ປ່າໄມ້ຍືນຍົງ ຊຶ່ງຈະເປັນຜົນປະໂຫຍດຂອງທັງສອງຝ່າຍໃນໄລຍະຍາວ.

(ຂ່າວ: ກະສິກຳ)