ທ່ານ ວິໄລວົງ ບຸດດາຄໍາ ໄດ້ກ່າວຕ້ອນຮັບຕໍ່ການເຂົ້າຢ້ຽມຂໍ່ານັບໃນຄັ້ງນີ້ ເພື່ອເປັນການຮັດແໜ້ນຄວາມສາມັກຄີ ແລະ ສາຍພົວພັນຮ່ວມມືລະຫວ່າງສອງຊາດ ທີ່ມີມາດົນນານ, ພ້ອມທັງກ່າວຊົມເຊີຍຕໍ່ການມາປະຕິບັດວຽກງານຂອງທ່ານເອກອັກຄະລັດຖະທູດ ແລະ ຍັງໄດ້ຕີລາຄາສູງໃນການຮ່ວມມືໃນຕໍ່ໜ້າ ໃນການປະກອບສ່ວນເຂົ້າໃນການພັດທະນາປະເທດຊາດ ແລະ ປະກອບສ່ວນເຂົ້າໃນການຊຸກຍູ້ສາຍພົວພັນ ລາວ-ອິນເດີຍ ໃຫ້ນັບມື້ນັບມີການຂະຫຍາຍຕົວ. ພ້ອມກັນນີ້ ຍັງໄດ້ປຶກສາຫາລື ແລກປ່ຽນຄວາມຄິດເຫັນ ແລະ ຂໍການສະໜັບສະໜູນໃນດ້ານວຽກງານຕ່າງໆ ເປັນຕັ້ນວຽກງານການຄຸ້ມຄອງ ພະນັກງານ-ລັດຖະກອນ, ວຽກງານການຄຸ້ມຄອງພົນລະເມືອງ, ການປັບປຸງບັນດານິຕິກໍາຕ່າງໆ, ການປັບປຸງວຽກງານດ້ານການປົກຄອງ, ວຽກງານການຫັນເປັນທັນສະໄໝ, ການປັບປຸງພື້ນຖານໂຄງລ່າງດ້ານເຕັກໂນໂລຊີ-ຂໍ້ມູນຂ່າວສານ, ທຶນການສຶກສາ, ທຶນຝຶກອົບຮົມໄລຍະສັ້ນ, ໄລຍະຍາວ, ທຶນທັດສະນະສຶກສາ ແລະ ອື່ນໆ.
ໃນໂອກາດນີ້, ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈເປັນຢ່າງສູງ ມາຍັງທ່ານລັດຖະມົນຕີກະຊວງພາຍໃນ ທີ່ໄດ້ໃຫ້ກຽດຕ້ອນຮັບການຢ້ຽມຂໍ່ານັບໃນຄັ້ງນີ້ ແລະ ທ່ານຍັງໄດ້ເຊື້ອເຊີນການນໍາຂັ້ນສູງຂອງກະຊວງພາຍໃນ ໄປຢ້ຽມຢາມ ແລະ ທັດສະນະສຶກສາກ່ຽວກັບວຽກງານຄຸ້ມຄອງພະນັກງານ-ລັດຖະກອນ, ວຽກງານຄຸ້ມຄອງພົນລະເມືອງ ລວມໄປເຖິງການແລກປ່ຽນບົດຮຽນໃນລະດັບຂັ້ນບໍລິຫານ ແລະ ວິຊາການ ນໍາຕື່ມ; ນອກຈາກນີ້ ຍັງໄດ້ໃຫ້ຄໍາໝັ້ນສັນຍາວ່າ ຈະສືບຕໍ່ຂະຫຍາຍການພົວພັນ ແລະ ການຮ່ວມມື ໃນຂົງເຂດວຽກງານດ້ານຕ່າງໆ ໃຫ້ເກີດດອກອອກຜົນນັບມື້ນັບຫຼາຍຂຶ້ນ.
(ຂ່າວ: ກະຊວງພາຍໃນ)
ຄໍາເຫັນ