ໃນໂອກາດທີ່ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ຄະນະສະເພາະກິດ 19/ກມສພ ເປັນປະທານກອງປະຊຸມເຜີຍແຜ່ ແລະ ຊຸກຍູ້ການຈັດຕັ້ງປະຕິບັດວຽກງານຂອງຄະນະສະເພາະກິດຕາມມະຕິຕົກລົງເລກທີ 19/ກມສພ ວ່າດ້ວຍມາດຕະການແກ້ໄຂບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ໃຫ້ແກ່ອົງການປົກຄອງແຂວງຄຳມ່ວນ, ບໍລິຄໍາໄຊ ແລະ ແຂວງສະຫວັນນະເຂດ ທີ່ໄດ້ຈັດຂຶ້ນໃນວັນທີ 5 ຕຸລາ ນີ້ ທີ່ສະໂມສອນຂອງແຂວງຄໍາມ່ວນ; ທ່ານ ມະໄລທອງ ກົມມະສິດ ໄດ້ມີຄໍາເຫັນບາງບັນຫາສໍາຄັນຕົ້ນຕໍຄື: 1. ຄະນະພັກ-ຄະນະນຳ ຂອງແຂວງທຸກຂັ້ນ, ທຸກຂະແໜງການ ແລະ ພາກສ່ວນທີ່ກ່ຽວຂ້ອງ ຕະຫຼອດບັນດາທ່ານ ທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງນໍາເອົາບັນດາເນື້ອໃນຈິດໃຈຂອງກອງປະຊຸມນີ້ໄປຈັດຕັ້ງປະຕິບັດໃຫ້ມີປະສິດທິຜົນ, ພ້ອມກັນເຊື່ອມຊຶມ ແລະ ເຜີຍແຜ່ບັນດານິຕິກໍາທີ່ກ່ຽວຂ້ອງ ຂອງລັດຖະບານ ກໍຄື ຂອງຄະນະສະເພາະກິດ ຕາມມະຕິຕົກລົງເລກທີ 19/ກມສພ ໃຫ້ທົ່ວເຖິງ, ກວມທຸກກຸ່ມເປົ້າໝາຍ, ໃຫ້ເຂົາເຈົ້າໄດ້ເຊື່ອມຊຶມ, ຮັບຮູ້ ແລະ ເຂົ້າໃຈຕໍ່ບັນຫາດັ່ງກ່າວຢ່າງເລິກເຊິ່ງ ແລະ ເຂົ້າຮ່ວມຢ່າງຕັ້ງໜ້າໃນຂະບວນການແກ້ໄຂບັນຫາເສດຖະກິດ ເພື່ອພ້ອມກັນຜ່ານຜ່າໄລຍະຫຍຸ້ງຍາກນີ້; 2.ຕໍ່ກັບມາດຕະການແກ້ໄຂບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ແມ່ນໃຫ້ກໍານົດມາດຕະການແກ້ໄຂອອກເປັນປະຈໍາວັນ, ປະຈໍາອາທິດ ແລະ ປະຈໍາເດືອນ ໃຫ້ມີຄວາມວ່ອງໄວ ດ້ວຍການສຸມໃສ່ແກ້ໄຂການຄ້າຂາຍບໍ່ສອດຄ່ອງ; ການຄ້ານອກລະບົບທຸກຮູບແບບໄປຄຽງຄູ່ກັບການຄຸ້ມຄອງຄົນຕ່າງປະເທດ ທີ່ເຂົ້າມາດໍາລົງຊີວິດ ແລະ ດໍາເນີນທຸລະກິດ ຢູ່ ສປປ ລາວ ໃຫ້ເຂົ້າສູ່ ລະບຽບ-ກົດໝາຍ. ເພີ່ມທະວີການດຶງດູດການລົງທຶນຈາກຕ່າງປະເທດໃຫ້ຫຼາຍຂຶ້ນ ໂດຍການປັບປຸງສະພາບແວດລ້ອມໃນການດໍາເນີນທຸລະກິດໃຫ້ມີຄວາມສະດວກ, ງ່າຍດາຍ, ໂປ່ງໃສ ກໍຄືການຫຼຸດຜ່ອນຂັ້ນຂອດທີ່ບໍ່ຈໍາເປັນ. ພ້ອມນັ້ນ, ກໍໃຫ້ບຸກທະລຸ ແກ້ໄຂລະບອບ-ລະບຽບ ແລະ ຂັ້ນຂອດບໍລິການ ທີ່ເປັນການກົດໜ່ວງທ່ວງດຶງ, ຄຸ້ມຄອງການເຄື່ອນໄຫວທາງການເງິນຂອງທະນາຄານທຸລະກິດ, ສຸມໃສ່ແກ້ໄຂບັນຫາການແລກປ່ຽນເງິນຕານອກລະບົບຮັບປະກັນບໍ່ໃຫ້ມີການປັ່ນປ່ວນເສດຖະກິດ ພ້ອມທັງນໍາໃຊ້ມາດຕະການຢ່າງເຂັ້ມງວດ, ເດັດຂາດຕໍ່ຜູ້ລະເມີດກົດ ໝາຍ, ຕໍ່ຜູ້ສວຍໃຊ້ໜ້າທີ່ຫາຜົນປະໂຫຍດແບບບໍ່ຊອບທໍາ. ການນໍາເຂົ້າ-ສົ່ງອອກ ຕ້ອງຊໍາລະຜ່ານລະບົບທະນາຄານ, ຂຶ້ນທະບຽນ ແລະ ຄຸ້ມຄອງຜູ້ນໍາເຂົ້າ-ສົ່ງອອກ, ແກ້ໄຂສະພາບຫຍໍ້ທໍ້ຕ່າງໆ ແລະ ບັນຫາອື່ນໆ. 3. ໃຫ້ອີງໃສ່ແຜນວຽກ ແລະ ໜ້າທີ່ລວມຂອງຄະນະສະເພາະກິດ 19/ກມສພ ເພື່ອເປັນພື້ນຖານ ໃນການຈັດແບ່ງວຽກຈຸດສຸມຢູ່ຂັ້ນທ້ອງຖິ່ນ, ແຕ່ລະໜ້າວຽກຈຸດສຸມ ຕ້ອງໄດ້ຜັນຂະຫຍາຍໃຫ້ມີຄວາມລະອຽດຊັດເຈນ, ມີຄາດໝາຍດ້ານເວລາ, ກໍານົດຂອບເຂດຄວາມຮັບຜິດຊອບ ຕາມພາລະບົດບາດໃນຂະແໜງການຢູ່ທ້ອງຖິ່ນຂອງຕົນ; 4. ຕໍ່ກັບການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ກະຈາຍແຫຼ່ງທຶນສູ່ທ້ອງຖິ່ນ, ບັນດາຂະແໜງການກ່ຽວຂ້ອງ ກໍຕ້ອງໄດ້ອອກນິຕິກໍາໃຫ້ໄວ ສົມທົບກັບອົງການປົກຄອງທ້ອງຖິ່ນ ຄົ້ນຄວ້າກໍານົດເຂດຈຸດສຸມການຜະລິດ, ປະເພດ ແລະ ກຳນົດເປົ້າໝາຍເພື່ອສົ່ງເສີມ, ສຸມໃສ່ຜະລິດຕະພັນທີ່ເປັນທ່າແຮງຂອງແຕ່ລະທ້ອງຖິ່ນ ທີ່ສາມາດແຂ່ງຂັນ ໄດ້ທັງປະລິມານ ແລະ ຄຸນນະພາບ; 6. ໃຫ້ແຂວງ ເອົາໃຈໃສ່ຕໍ່ການຈັດເກັບລາຍຮັບ, ຄຸ້ມຄອງລາຍຈ່າຍ ໃນທ້າຍປີທີ່ຍັງເຫຼືອ ໃຫ້ບັນລຸຕາມແຜນການທີ່ກໍານົດ ແລະ ແຜນຮັບຮອງຈາກສູນກາງ; 7. ເພື່ອຜັນຂະຫຍາຍຄໍາສັ່ງ ນາຍົກລັດຖະມົນຕີ ວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ, ໃຫ້ສົມທົບກັບພາກສ່ວນທີ່ກ່ຽວຂ້ອງ ເພື່ອຕິດຕາມ ແລະ ກວດກາ ແຕ່ຂອດການນໍາເຂົ້າສິນຄ້າ ຈົນຮອດການຈໍລະຈອນຢູ່ພາຍໃນ ເພື່ອແກ້ໄຂສະພາບການຄ້ານອກລະບົບ; ຈໍາກັດການນໍາເຂົ້າສິນຄ້າທີ່ສາມາດຜະລິດໄດ້ພາຍໃນ, ສຸມໃສ່ຊຸກຍູ້ສົ່ງເສີມການຜະລິດເປັນສິນຄ້າ, ເຂັ້ມງວດການປະຕິບັດວິໄນຕໍ່ພະນັກງານ ແລະ ເຈົ້າໜ້າທີ່ສວຍໃຊ້ໜ້າທີ່ອຳນວຍຄວາມສະດວກໃນການດຳເນີນການແລກປ່ຽນເງິນແບບຜິດກົດໝາຍ; 8. ເອົາໃຈໃສ່ການຈັດຕັ້ງປະຕິບັດ ແຈ້ງການສະບັບເລກທີ 98/ຫສນຍ, ລົງວັນທີ 24 ກໍລະກົດ 2023 ວ່າດ້ວຍການຜັນຂະຫຍາຍທິດຊີ້ນໍາ ກ່ຽວກັບການຄຸ້ມຄອງອິນເຕີເນັດ ແລະ ສື່ສັງຄົມອອນລາຍ ຢ່າງເຂັ້ມງວດ.
(ຂ່າວ: ມະນີວັນ)
ຄໍາເຫັນ