 |
ໃນກອງປະຊຸມ, ທ່ານຜູ້ຕາງໜ້າອະນຸກໍາມະການເລືອກຕັ້ງລາຍງານວ່າ: ຄະນະກໍາມະການເລືອກຕັ້ງຂັ້ນເມືອງໄດ້ເອົາໃຈໃສ່ຊີ້ນໍາ-ນໍາພາການກະກຽມວຽກງານເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V ຢູ່ເມືອງສະໜາມໄຊ ໃນໄລຍະຜ່ານມາ ເຖິງປັດຈຸບັນໄດ້ຮັບຜົນສໍາເລັດຕາມຂັ້ນຕອນ ຊຶ່ງໄດ້ຮ່າງຂໍ້ຕົກລົງແຕ່ງຕັ້ງຄະນະປະຈໍາການ ແລະ 5 ອະນຸກໍາມະການຕ່າງໆ ຂັ້ນເມືອງ ພ້ອມສໍາເລັດການຈັດກອງປະຊຸມຜ່ານຂໍ້ຕົກລົງດັ່ງກ່າວເພື່ອມອບວຽກໃຫ້ແຕ່ລະອະນຸເຮັດວຽກຂອງໃຜລາວ, ສໍາເລັດການຮ່າງຂໍ້ຕົກລົງວ່າດ້ວຍການກໍານົດໜ່ວຍເລືອກຕັ້ງຢູ່ເມືອງສະໜາມໄຊທັງໝົດມີ 43 ໜ່ວຍ, ໄດ້ຮ່າງຂໍ້ຕົກລົງແຕ່ງຕັ້ງຄະນະກໍາມະການຮັບຜິດຊອບປະຈໍາໜ່ວຍປ່ອນບັດເລືອກຕັ້ງຂັ້ນບ້ານໃນ 43 ໜ່ວຍ, ສໍາເລັດການຮ່າງຂໍ້ຕົກລົງແຕ່ງຕັ້ງຄະນະກໍາມະການຮັບຜິດຊອບລົງເປີດບັ້ນດໍາເນີນຊີວິດການເມືອງ ແລະ ເຊື່ອມຊຶມນິຕິກໍາຕ່າງໆ ແລະ ຊຸກຍູ້ຂະບວນການຕ່າງໆຢ່າງເປັນຂະບວນ, ໄດ້ສໍາເລັດການລາຍງານດ້ານສະຖິຕິຜູ້ມີສິດປ່ອນບັດເລືອກຕັ້ງ 18 ປີຂຶ້ນໄປທັງໝົດ 25,402 ຄົນ.
ໂອກາດດັ່ງກ່າວ, ທ່ານ ຈັນທະວົງ ແສນອາມາດມົນຕີ ໄດ້ມີຄໍາເຫັນ ພ້ອມທັງກ່າວຊົມເຊີຍໃນການຈັດຕັ້ງປະຕິບັດວຽກງານຂອງຄະນະຮັບຜິດຊອບວຽກງານການກະກຽມຄວາມພ້ອມໃນບັ້ນເລືອກຕັ້ງ ແມ່ນເຮັດວຽກງານໄດ້ດີຫຼາຍ, ສາມາດເກັບກໍາຈໍານວນພົນໄດ້ເປັນຢ່າງລະອຽດ, ຮັກສາໄດ້ຄວາມສະຫງົບ-ປອດໄພ ແລະ ຈົ່ງສືບຕໍ່ເອົາໃຈໃສ່ໂຄສະນາໃຫ້ຜູ້ມີສິດປ່ອນບັດຕື່ມອີກ ເພື່ອໃຫ້ມີຄວາມເຂົ້າໃຈຖືກຕ້ອງ, ຄວາມຈະແຈ້ງໂປ່ງໃສ ພ້ອມທັງ ຮັບປະກັນໃຫ້ສໍາເລັດຕາມລະດັບຄາດໝາຍທີ່ວາງໄວ້.
ໃນວັນດຽວກັນ, ທ່ານ ຈັນທະວົງ ແສນອາມາດມົນຕີ ພ້ອມດ້ວຍຄະນະ ຍັງໄດ້ຕິດຕາມການກະກຽມສະຖານທີ່ໃນມື້ຈະປ່ອນບັດວັນທີ 22 ກຸມພາ 2026 ຄື: ບ້ານດົງບາກໃໝ່ຫີນຄໍາ ແລະ ບ້ານຫາດຍາວຕື່ມອີກ
(ຂ່າວ: ແສງຈັນ)
ຄໍາເຫັນ