ຫຼວງນໍ້າທາເຜີຍແຜ່ກົດໝາຍ ວ່າດ້ວຍການກວດກາລັດ 

ຫຼວງນໍ້າທາ ໄດ້ ເຜີຍແຜ່ກົດໝາຍ ວ່າດ້ວຍການກວດກາລັດ (ສະບັບປັບປຸງ), ທາບທາມຄໍາເຫັນໃສ່ຮ່າງກົດໝາຍ ວ່າດ້ວຍການສະກັ້ນ ແລະ ຕ້ານການສໍ້ລາດບັງຫຼວງ ແລະ ຮ່າງຍຸດທະສາດສະກັດກັ້ນ ແລະ ຕ້ານການສໍ້ລາດບັງຫຼວງ ແຕ່ປີ 2023-2030 ເມື່ອບໍ່ດົນຜ່ານມາ ,ເປັນປະທານໂດຍ ທ່ານ ຄໍາຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ມີທ່ານ ໄຊຄໍາ ອຸ່ນມີໄຊ ຮອງປະທານຄະນະກວດກາສູນກາງພັກ, ອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງຂັ້ນສູນກາງ ຊຶ່ງມີພະນັກງານການນຳແຂວງ ເມືອງ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄະນະຮັບຜິດຊອບປັບປຸງກົດໝາຍໄດ້ເຜີຍແຜ່ຄໍາແນະນໍາ ການຈັດຕັ້ງປະຕິບັດກົດໝາຍ ວ່າດ້ວຍການກວດກາລັດ ( ສະບັບປັບປຸງ ), ຜ່ານຮ່າງກົດໝາຍ ວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ ມີ 12 ພາກ, 7 ໝວດ, 88 ມາດຕາ ແລະ ນໍາສະເໜີຮ່າງຍຸດທະສາດສະກັດກັ້ນ ແລະ ຕ້ານການສໍ້ລາດບັງຫຼວງ ແຕ່ປີ 2023-2030 ໂດຍສູມໃສ່ເພີ້ມທະວີການສືກສາອົບຮົມ ແລະ ສ້າງສະຕິກົດໝາຍ, ຄຽງຄູ່ກັບການຄົ້ນຄວ້າສ້າງ ແລະ ປັບປຸງບັນດານິຕິກໍາ ກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງ ຊຶ່ງເປັນການຜັນຂະຫຍາຍແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກ ຕິດພັນກັບການແກ້ໄຂຈຸດອ່ອນ ແລະ ບັນດາຂໍ້ຄົງຄ້າງໃນການຄຸ້ມຄອງລັດ,ຄຸ້ມຄອງສັງຄົມ ເຮັດໃຫ້ພະນັກງານນໍາພາຄຸ້ມຄອງທຸກຂັ້ນສາມາດຮັບຮູ້ ແລະ ກໍາແໜ້ນແນວທາງ, ແຜນນະໂຍບາຍ, ມະຕິ,ຄໍາສັ່ງ,ຂໍ້ກໍານົດຕ່າງໆຂອງພັກ, ກົດໝາຍ ແລະ ລະບຽບການຕ່າງໆຂອງລັດກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງຢູ່ ສປປ ລາວ, ພ້ອມນັ້ນຜູ້ເຂົ້າຮ່ວມກອງປະຊຸມກໍ່ໄດ້ປະກອບຄໍາຄິດຄໍາເຫັນໃສ່ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ, ຮ່າງຍຸດທະສາດສະກັດກັ້ນ ແລະ ຕ້ານການສໍ້ລາດບັງຫຼວງ ແຕ່ປີ 2023-2030 ເພື່ອເຮັດໃຫ້ກົດໝາຍດັ່ງກ່າວມີເນື້ອໃນສອດຄ່ອງ ແລະ ສົມບຸນຂື້ນ.
ຂ່າວ: ມຸນຕີ