ປະກາດແຂວງຫຼວງພະບາງ ເປັນແຂວງຢຸດຕິການຖ່າຍຊະຊາຍວ່າ: ການຂາດຫຼັກອະນາໄມໂດຍສະເພາະແມ່ນການຖ່າຍຊະຊາຍ ຊຶ່ງມີຜົນກະທົບຕໍ່ສຸຂະພາບຂອງຊຸມຊົນ ແລະ ສັງຄົມເຊັ່ນ: ການເກີດພະຍາດຖອກທ້ອງ, ແມ່ກາຝາກ, ລ່ອຍແຫຼວ ໂປລີໂອ, ໂລກອະຫິວາ, ການຂາດສານອາຫານໃນເດັກ ແລະ ອື່ນໆ, ເນື່ອງຈາກວ່າການແຜ່ລະບາດຂອງພະຍາດທີ່ຕິດຕໍ່່ຈາກອາຈົມ ຊຶ່ງມີຜົນກະທົບຕໍ່ສຸຂະພາບ ແລະ ຊີວິດວິດການເປັນຢູ່ຂອງປະຊາຊົນ, ວິທີການເຮັດໃຫ້ຊຸມຊົນ ເປັນເຈົ້າການດ້ານສຸຂະອະນາໄມ (ຊຈສ) ແມ່ນຮູບການນຳພາປະຊາຊົນ ເພື່ອສ້າງຈິດສຳນຶກດ້ານສຸຂະອະນາໄມ ແລະ ຊຸມຊົນເອງເປັນເຈົ້າການ. ການຢຸດຕິການຖ່າຍຊະຊາຍ ແລ້ວຫັນມາກໍ່ສ້າງ ແລະ ຊົມໃຊ້ວິດຖ່າຍຢ່າງຖຶກຕ້ອງຕາມຫຼັກສຸຂະອະນາໄມ.
ຜ່ານມາພາກສ່ວນກ່ຽວຂ້ອງຂອງແຂວງ ໄດ້ຈັດຕັ້ງປະຕິບັດກອງປະຊຸມຊີ້ແຈງ ແລະ ຜັນຂະຫຍາຍວຽກງານ ພ້ອມທັງເຊັນສັນຍາ ແລະ ຈັບມືວາງຂໍ້ແຂ່ງຂັນລະຫວ່າງເມືອງຕໍ່ເມືອງ, ຈັດກອງປະຊຸມຂັ້ນວິຊາການ, ເຜີຍແຜ່ເນື້ອໃນແຜນການ ຈັດຕັ້ງປະຕິບັດວຽກງານ ໃຫ້ທົ່ວເຖິງແຕ່ລະບ້ານ, ໄດ້ຈັດຕັ້ງຄະນະກຳມະການ ຮັບຜິດຊອບກວດກາຄອບຄົວຊົມໃຊ້ວິດຖ່າຍ ຂັ້ນບ້ານ ແລະ ເມືອງ, ພ້ອມທັງເຜີຍແຜ່ເນື້ອໃນຂໍ້ແຂ່ງຂັນ ໃຫ້ປະຊາຊົນບັນດາເຜົ່າແຕ່ລະຄອບຄົວທົ່ວແຂວງໄດ້ຮັບຮູ້ ແລະ ເຂົ້າໃຈຢ່າງເລິກເຊີ່ງ ກ່ຽວກັບຄາດໝາຍ ແລະ ຄຸນປະໂຫຍດຂອງການນຳໃຊ້ວິດຖ່າຍ. ມາຮອດປັດຈຸບັນໃນທົ່ວແຂວງ ມີທັງໝົດ 85,437 ຄອບຄົວ. ໃນນີ້, ມີວິດຖ່າຍເປັນຂອງຕົນເອງແມ່ນ 80,279 ຄອບຄົວ ເທົ່າກັບ 93.96% ແລະ ໃຊ້ວິດຖ່າຍຮ່ວມນໍາພີ່ນ້ອງມີທັງໝົດ 5,158 ຄອບຄົວ ເທົ່າກັບ 6.04%, ມີໂຮງຮຽນປະຖົມ 721 ແຫ່ງ, ໂຮງຮຽນມັດທະຍົມຕົ້ນ 67 ແຫ່ງ ແລະ ໂຮງຮຽນມັດທະຍົມສົມບູນ 49 ແຫ່ງ ທັງໝົດມີວິດຖ່າຍ ແລະໄດ້ນຳໃຊ້ທຸກແຫ່ງ.
ທ່ານ ຄຳສອນ ພົງສະຫວັດດີ ກ່າວຕື່ມວ່າ: ສຳລັບການກະກຽມ ປະກາດແຂວງຫຼວງພະບາງ ເປັນແຂວງຢຸດຕິການຖ່າຍຊະຊາຍ ໄດ້ສຳເລັດແລ້ວໂດຍພື້ນຖານ ຊຶ່ງໃນວັນທີ 5 ພະຈິກນີ້ ຈະມີຂະບວນການຍ່າງເພື່ອສຸຂະພາບ ຕາມເສັ້ນທາງກາງເມືອງ ເລີ່ມຈາກສວນລາດແລງ ໄປຫາ ວັດຊຽງທອງ ເພື່ອສ້າງຂະບວນການຕ້ອນຮັບ ແລະ ໃນວັນທີ 8 ພະຈິກ 2024 ນີ້ ຈະມີພິທີ ປະກາດແຂວງຫຼວງພະບາງເປັນ ແຂວງຢຸດຕິການຖ່າຍຊະຊາຍຢ່າງເປັນຂະບວນການຟົດຟື້ນ.
(ແຫຼ່ງຂ່າວ: ຫຼວງພະບາງ)
ຄໍາເຫັນ