ໂດຍສຸມໃສ່ການເສີມຂະຫຍາຍການຮ່ວມມືພັດທະນາເສດຖະກິດການຄ້າໂດຍລວມຂອງສອງປະເທດ ໃຫ້ເລິກເຊິ່ງ ແລະ ເຂັ້ມແຂງຢ່າງບໍ່ຢຸດຢັ້ງ.
ກອງປະຊຸມການເລືອກຕັ້ງຄະນະບໍລິຫານງານສະໄໝທີ VII ຂອງສະພາການຄ້າຈີນປະຈໍາ ສປປ ລາວ ໄດ້ຈັດຂຶ້ນໃນວັນທີ 4 ພະຈິກຜ່ານມາທີ່ນະຄອນຫຼວງວຽງຈັນ ໂດຍການປະທານຂອງ ທ່ານ ລີ່ ຈື້ຢົງ (Li Zhiyong) ປະທານສະພາການຄ້າຈີນປະຈໍາ ສປປ ລາວ ສະໄໝທີ VI; ມີທ່ານ ຫວ່າງ ຊ້າງ ອັກຄະລັດຖະທູດທີ່ປຶກສາ ສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ, ທ່ານ ບຸນຈັນ ລໍວັນໄຊ ຮອງຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ, ທ່ານ ທະນົງສິນ ກັນລະຍາ ຮອງປະທານສະພາກການຄ້າ ແລະ ອຸດສາຫະກຳແຫ່ງຊາດລາວ ພ້ອມດ້ວຍບັນດາທ່ານຈາກພາກສ່ວນກ່ຽວຂ້ອງ ຊຶ່ງມີຫຼາຍກວ່າ 120 ວິສາຫະກິດ ເຂົ້າຮ່ວມ.
ພາຍຫຼັງ ທ່ານ ລີ່ ຈື້ຢົງ ໄດ້ຂຶ້ນລາຍງານວຽກງານໃນໄລຍະຜ່ານມາ ແລະ ກ່າວອຳລາຕໍາແໜ່ງ, ກໍໄດ້ມີການແນະນໍາຕົນເອງຂອງບັນດາທ່ານຜູ້ສະໝັກຮັບເລືອກຕັ້ງເຂົ້າເປັນຄະນະບໍລິຫານງານສະໄໝທີ VIIຂອງສະພາການຄ້າຈີນປະຈໍາ ສປປ ລາວ ຊຶ່ງມີ 18 ວິສາຫະກິດ ເຂົ້າສະໝັກ ແລະ ຄະນະກຳມະການເລືອກຕັ້ງກໍໄດ້ດຳເນີນການປ່ອນບັດລົງຄະແນນສຽງ ເລືອກຕັ້ງເອົາຄະນະບໍລິຫານງານຊຸດໃໝ່. ຜ່ານການລົງຄະແນນສຽງແມ່ນເລືອກໄດ້ຄະນະບໍລິຫານງານສະໄໝທີ VII ຂອງສະພາການຄ້າຈີນປະຈໍາ ສປປ ລາວ ໂດຍໄດ້ ທ່ານ ເຊິນ ເຊັຍຈິນ (Shen Xueqin) ຜູ້ຈັດການທົ່ວໄປຂອງທະນາຄານ ອຸດສາຫະກຳ ແລະ ການຄ້າຈີນ ຈຳກັດ (ICBC) ສາຂາ ນະຄອນຫຼວງວຽງຈັນ ເປັນປະທານສະພາການຄ້າຈີນປະຈໍາ ສປປ ລາວ ຊຶ່ງໃນໂອກາດນີ້ ປະທານຄົນໃໝ່ ກໍໄດ້ມີຄໍາເຫັນກ່າວຮັບຕໍາແໜ່ງ ໂດຍໃນນີ້ກໍໄດ້ກ່າວເຖິງບາງວຽກງານທີ່ຈະສຸມໃສ່ ເພື່ອສືບຕໍ່ເສີມຂະຫຍາຍການຮ່ວມມືດ້ານເສດຖະກິດການຄ້າລາວ-ຈີນ.
ທ່ານ ເຊິນ ເຊັຍຈິນ ກ່າວວ່າ: ຄະນະບໍລິຫານງານສະໄໝທີ VIIຂອງສະພາການຄ້າຈີນປະຈໍາ ສປປ ລາວ ມີສະມາຊິກທັງໝົດຈາກ 11 ວິສາຫະກິດ ທີ່ໄດ້ຮັບທຶນຈາກຈີນ ທີ່ຂຶ້ນທະບຽນເປັນເອກະລາດພາຍໃຕ້ການຊີ້ນຳຂອງສະຖານທູດ. ສະພາການຄ້າຈີນປະຈໍາ ສປປ ລາວຊຸດໃໝ່ນີ້ ຈະສືບຕໍ່ຮັກສານ້ຳໃຈສາມັກຄີ, ການຮ່ວມມື ແລະ ກ້າວໄປໜ້າ, ພະຍາຍາມສ້າງສະພາການຄ້າທີ່ສະໜິດສະໜົມ, ມີຫົວຄິດປະດິດສ້າງ ແລະ ມີອິດທິພົນຫຼາຍກວ່າເກົ່າ, ປະກອບສ່ວນຢ່າງຕັ້ງໜ້າເຂົ້າໃນການແລກປ່ຽນເສດຖະກິດການຄ້າຈີນ-ລາວ. ພາຍຫຼັງການປຶກສາຫາລືຢ່າງເລິກເຊິ່ງ ໃນກອງປະຊຸມຄັ້ງທຳອິດຂອງສະພາການຄ້າຈີນປະຈໍາ ສປປ ລາວ ສະໄໝທີ VII, ໂດຍການຊີ້ນຳຂອງສະຖານທູດ ພາຍໃຕ້ທິດຊີ້ນໍາຂອງທ່ານ ສີ ຈິ້ນຜິງ ກ່ຽວກັບສັງຄົມນິຍົມລັກສະນະຈີນໃນຍຸກໃໝ່, ປະຕິບັດແນວຄິດການພັດທະນາອັນໃໝ່ຢ່າງຮອບດ້ານ ແລະ ປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ; ສ້າງສະພາບແວດລ້ອມດ້ານການເມືອງ ແລະ ວິສາຫະກິດທີ່ດີ ແລະ ຊ່ວຍສະມາຊິກແກ້ໄຂບັນຫາ, ເປັນໃຈກາງປະສານງານລະຫວ່າງລັດຖະບານຈີນກັບວິສາຫະກິດຈີນ, ເປັນຕົວແທນໃຫ້ວິສາຫະກິດຈີນທີ່ໄດ້ຮັບທຶນຈາກຈີນ ເຂົ້າຮ່ວມການສົນທະນາກັບລັດຖະບານລາວ, ເພີ່ມທະວີການໂຄສະນາເຜີຍແຜ່ວຽກງານຂອງສະພາການຄ້າຈີນ ແລະ ຮ່ວມມືດ້ານເສດຖະກິດການຄ້າ ລະຫວ່າງ ສອງປະເທດ ໃຫ້ໄດ້ຮັບການພັດທະນາຢ່າງເລິກເຊິ່ງ ແລະ ເຂັ້ມແຂງຢ່າງບໍ່ຢຸດຢັ້ງ.
ທ່ານ ເຊິນ ເຊັຍຈິນ ຍັງກ່າວວ່າ: ເຖິງຢ່າງໃດກໍຕາມ, ສະພາບການສາກົນໃນປັດຈຸບັນມີຄວາມສັບສົນຄືແນວໃດຈະໃຫ້ບົດບາດຊີ້ນຳນະໂຍບາຍຂອງສະພາການຄ້າຈີນ ໄດ້ຢ່າງເຕັມທີ່, ຊ່ວຍໃຫ້ບໍລິສັດສະມາຊິກດຳເນີນທຸລະກິດເປັນຢ່າງດີ, ປົກປັກຮັກສາຜົນປະໂຫຍດອັນຊອບທຳຂອງວິສາຫະກິດທີ່ໄດ້ຮັບທຶນຈາກຈີນ; ພວກເຮົາຈະນໍາພາສະມາຊິກເລົ່າເລື່ອງຂອງຈີນ ດ້ວຍການກະທຳຕົວຈິງ, ປົກປັກຮັກສາສິດ ແລະ ຊື່ສຽງຂອງວິສາຫະກິດທີ່ໄດ້ຮັບທຶນຈາກຈີນ, ປົກປັກຮັກສາຜົນປະໂຫຍດ ແລະ ກຽດສັກສີຂອງປະເທດ, ປະກອບສ່ວນສະຕິປັນຍາ ສ້າງຄວາມເຂັ້ມແຂງໃຫ້ແກ່ການພັດທະນາຄຸນນະພາບຂອງສະພາການຄ້າຈີນ-ລາວ ເສີມຂະຫຍາຍການຮ່ວມມືພັດທະນາເສດຖະກິດການຄ້າຂອງສອງປະເທດ.
(ຂ່າວ-ພາບ: ສຸກສະຫວັນ)
ຄໍາເຫັນ