ເມື່ອບໍ່ດົນມານີ້, ຫ້ອງການສະຫະພັນແມ່ຍິງເມືອງເງິນ ແຂວງໄຊຍະບູລີ ໄດ້ຈັດກອງປະຊຸມສະຫຼຸບວຽກງານຂອງຄະນະກຳມາທິການສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກປະຈຳປີ 2023 ແລະ ທິດທາງປີ 2024, ຕິດພັນກັບການມອບເຄື່ອງຊ່ວຍເຫຼືອເດັກກ່ຳພ້າ, ກໍ່ພອຍ, ເດັກພິການ ແລະ ທຸກຍາກຢູ່ທີ່ຫໍປະຂຸມໃຫຍ່ຂອງເມືອງ ໂດຍການເປັນປະທານຂອງທ່ານ ບຸນເລືອນ ບົວໄລ ຮອງເຈົ້າເມືອງເມືອງເງິນ ປະທານຄະນະກຳມາທິການວຽກງານສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກຂັ້ນເມືອງ. ມີພາກສ່ວນກ່ຽວຂ້ອງພາຍໃນເມືອງ ເຂົ້າຮ່ວມ.
ໃນກອງປະຊຸມ, ທ່ານ ນາງ ວຽງທອງ ສີຫາວົງ ປະທານສະຫະພັນແມ່ຍິງເມືອງ ໄດ້ຜ່ານບົດສະຫຼຸບ ຕີລາຄາຄືນກ່ຽວກັບການປະຕິບັດໜ້າທີ່ຂອງຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ໃນໜຶ່ງປີຜ່ານມາ ເປັນຕົ້ນແມ່ນວຽກການປົກປ້ອງສິດຜົນປະໂຫຽດຂອງແມ່ຍິງ ແລະ ເດັກ, ວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍ, ວຽກງານສຶກສາທິການ ແລະ ກິລາ, ວຽກງານສາທາລະນະສຸກ, ວຽກງານພັດທະນາສີມືແຮງງານ, ວຽກງານປ້ອງກັນທາງສັງຄົມ ແລະ ການມີສ່ວນຮ່ວມຂອງເດັກ. ຈາກນັ້ນ, ຄະນະກຳມາທິການ ແລະ ພາກສ່ວນທີ່ກ່ຽວຂ້ອງກໍ່ໄດ້ປະກອບຄຳຄິດ-ຄຳເຫັນໃສ່ບົດສະຫຼຸບ, ທິດທາງແຜນການ ແລະວຽກງານກອງທືນຢ່າງກົງໄປກົງມາ ແລະ ສ້າງສັນ.
ຕອນທ້າຍທ່ານ ຮອງເຈົ້າເມືອງ ໄດ້ມອບອຸປະກອນການຮຽນໃຫ້ແກ່ນ້ອງນັກຮຽນທີ່ທຸກຍາກ, ເດັກກ່ຳພ້າ, ກ່ຳພອຍ ມີ 19 ໂຮງຮຽນ ຈຳນວນ 354 ນ້ອງ ຍິງ 161 ນ້ອງ, ມູນຄ່າ 13.216 000 ກີບ ໂດຍແມ່ນທືນຂອງກອງທືນຊ່ວຍເຫຼືອເດັກທຸກຍາກຂອງເມືອງ.
(ພາບ+ຂ່າວ: ດາວສຸກ ສຸລິຍະພອນ)
ຄໍາເຫັນ