ກອງປະຊຸມຄັ້ງນີ້ ໄດ້ລົງປະຊາມະຕິເປັນເອກະພາບຮັບຮອງເອົາບັນດາເນື້ອໃນ ພ້ອມກັນຄົ້ນຄວ້າ ແລະ ປະກອບຄໍາເຫັນໃສ່ບົດລາຍງານການເມືອງທັງສອງພາກ ສະເໜີໂດຍສະຫາຍນາງຈີລະພາ ແກ້ວຄຳຜຸຍ ປະທານສະຫະພັນແມ່ຍິງອົງການກາແດງແຫ່ງຊາດລາວແລະ ບົດສໍາຫຼວດການນໍາພາລວມຂອງຄະນະຊຸດຜ່ານມາ, ເປັນເອກະພາບດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດບົດຮຽນໃນການນໍາພາ-ຊີ້ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ5ປີ ຜ່ານມາ ຊຶ່ງຍົກໃຫ້ເຫັນຜົນງານທີ່ພົ້ນເດັ່ນຫຼາຍດ້ານ ເປັນຕົ້ນທາງດ້ານວຽກງານວິຊາສະເພາະ ການຈັດຕັ້ງຜັນຂະຫຍາຍຂໍ້ແຂ່ງຂັນ 3 ດີຂອງແມ່ຍິງລາວພ້ອມນີ້ກອງປະຊຸມຍັງໄດ້ເປັນເອກະພາບກັນຮັບຮອງເອົາທິດທາງແຜນການ 5ປີ ຕໍ່ໜ້າ ແຕ່ປີ 2024 ເຖິງປີ2029 ຊຶ່ງຈະໄດ້ພ້ອມກັນສືບຕໍ່ຜັນຂະຫຍາຍດ້ານດີ, ປັບປຸງແກ້ໄຂຈຸດອ່ອນ-ຂໍ້ຄົງຄ້າງໃຫ້ດີຂຶ້ນ.ພ້ອມນີ້, ສະມາຊິກສະຫະພັນແມ່ຍິງອົງການກາແດງແຫ່ງຊາດລາວໄດ້ພ້ອມກັນໃຊ້ສິດຂອງຕົນ ປ່ອນບັດຄັດເລືອກ ຄະນະບໍລິຫານງານຊຸດໃໝ່ ບົນພື້ນຖານຄວາມຖືກຕ້ອງສອດຄ່ອງກັບມາດຖານທີ່ໄດ້ກໍານົດໄວ້ ຊຶ່ງມີຜູ້ຮັບສະໝັກເລືອກຕັ້ງທັງໝົດ 7ສະຫາຍ ເລືອກໄດ້ 5ສະຫາຍ ກອງປະຊຸມຄັ້ງປະຖົມມະລືກ ໄດ້ເປັນເອກະສັນເລືອກເອົາ ສະຫາຍນາງຈີລະພາແກ້ວຄຳຜຸຍເປັນປະທານ, ສະຫາຍນາງຈັນທະວີສຸກທອງສະຫວັດເປັນຮອງປະທານ, ສະຫາຍນາງກອງນີບຸນສະໜອງເປັນປະທານກວດກາ, ສະຫາຍນາງສັນທະລັກຫຼວງນິກອນແລະສະຫາຍນາງແສງມະນີໜໍ່ຈະເລີນເປັນຄະນະ.
ໃນຕອນທ້າຍສະຫາຍປະທານສູນກາງສະຫະພັນແມ່ຍິງລາວແລະສະຫາຍປະທານອົງການກາແດງແຫ່ງຊາດລາວ, ໄດ້ຜັດປ່ຽນກັນໃຫ້ການໂອ້ລົມຊຶ່ງທັງສອງສະຫາຍໄດ້ສະແດງຄວາມຍ້ອງຍໍຊົມເຊີຍຜົນສຳເລັດຂອງກອງປະຊຸມໃນຄັ້ງນີ້ ໂດຍສະເພາະຕໍ່ການນໍາພາ-ຊີ້ນໍາຂອງຄະນະຊຸດຜ່ານມາ, ສະແດງຄວາມຊົມເຊີຍຕໍ່ສະມາຊິກສະຫະພັນແມ່ຍິງທຸກສະຫາຍທີ່ໄດ້ເອົາໃຈໃສ່ຕໍ່ການປະຕິບັດວຽກງານດ້ວຍຄວາມຫ້າວຫັນ. ພ້ອມນີ້, ຍັງເນັ້ນໃຫ້ສືບຕໍ່ຜົນງານ,ເອົາໃຈໃສ່ບັນຫາວຽກງານການເມືອງ-ແນວຄິດມີສະຕິຕໍ່ການຈັດຕັ້ງແລະບົດບາດຂອງຕົນສືບຕໍ່ການຈັດຕັ້ງປະຕິບັດແຜນການເຄື່ອນໄຫວວຽກງານໃນ 5ປີຕໍ່ໜ້າ ໃຫ້ສອດຄ່ອງກັບໜ້າທີ່ວິຊາສະເພາະ ຕິດພັນກັບການປະຕິບັດເນື້ອໃນຂໍ້ແຂ່ງຂັນ 3ດີ ໃຫ້ປະສົບຜົນສໍາເລັດ.
(ຂ່າວ-ພາບ: ແສງຈັນ)
ຄໍາເຫັນ