 |
ທ່ານ ວິລະພັນ ຊາພູວົງ ຜູ້ອໍານວຍການ ວິທະຍາໄລສິລະປະແຫ່ງຊາດ ກ່າວວ່າ: ໂຄງການປົກປັກຮັກສາການສະແດງຟ້ອນ ພະລັກ-ພະລາມ ເປັນການພັດທະນາບຸກຄະລາກອນຮຸ່ນສືບທອດ ຂອງວິທະຍາໄລສິລະປະແຫ່ງຊາດ ຊຶ່ງໄດ້ຮັບການສະໜັບສະໜູນທຶນຮອນເພື່ອມາຈັດຕັ້ງປະຕິບັດບັນດາກິດຈະກຳໂດຍສະເພາະການຜະລິດຊຸດໃໝ່ແຕ່ລະຕົວລະຄອນ ທີ່ຢູ່ໃນເລື່ອງລາມມະກຽມ ທີ່ເປັນຕົວລະຄອນເອກ, ຕົວລະຄອນສົມທົບຕ່າງໆ ແລະ ສໍາລັບການຜະລິດຫົວຕົວລະຄອນເອກ ແລະ ຕົວລະຄອນປະກອບ ເຊັ່ນ: ຫົວພະລັກ-ພະລາມ, ຫົວນາງສີດາ, ນາງ ສຸປະນະຂາ, ຍັກທົດສະກັນ, ຫະນຸມານ, ນົກສະດາຍຸ, ກວາງຄຳ, ນົກນ້ອຍ, ພະລືສີ ແລະ ມ້າລິດ ເປັນການຜະລິດທີ່ຕ້ອງໃຊ້ຄວາມປານີດສູງ ໂດຍສະເພາະໃຫ້ຖືກກັບລັກສະນະເອກະລັກທີ່ເໝືອນຈິງ ຂອງຕົວລະຄອນ ເວົ້າລວມ, ເວົ້າສະເພາະ ແມ່ນຕິດພັນກັບ ສີໄມ້ລາຍມື ທີ່ເປັນຂອງລາວແທ້. ດັ່ງນັ້ນ, ການຜະລິດຫົວຕົວລະຄອນນີ້ ຈຶ່ງໄດ້ດຳເນີນການຜະລິດໂດຍຊ່າງທີ່ຊໍານານທີ່ນະຄອນ-ຫຼວງພະບາງ ແຂວງຫຼວງພະບາງ. ສະເພາະດ້ານການຕັດຊຸດ ແຕ່ລະຕົວລະຄອນ ແມ່ນໄດ້ນຳໃຊ້ຮ້ານທີ່ເຄີຍມີຜົນງານໃນການອອກແບບ ແລະ ຕັດຊຸດລະຄອນດັ່ງກ່າວ ແລະ ເຄື່ອງດົນຕີນັກເສບແມ່ນໄດ້ຜະລິດຊຸດໃໝ່ທີ່ໄດ້ທັງຄຸນນະພາບ ແລະ ກົມກືນກັບບົດລະຄອນດັ່ງກ່າວ. ພ້ອມນັ້ນ, ຍັງໄດ້ຈັດຊື້ອຸປະກອນໄອທີ ຈຳນວນໜຶ່ງ ເຊັ່ນ: ກ້ອງ ແລະ ຄອມພິວເຕີ ໂນດບຸກ ຕາມຄວາມເໝາະສົມໃນວຽການຕົວຈິງ.
 |
ທ່ານ ວິລະພັນ ຊາພູວົງ ໄດ້ກ່າວຕື່ມວ່າ: ໂຄງການນີ້ ບໍ່ພຽງແຕ່ເປັນການຍົກລະດັບຄວາມເຂັ້ມແຂງໃຫ້ແກ່ຄູ-ອາຈານ ແລະ ນັກຮຽນສິລະປະເທົ່ານັ້ນ, ແຕ່ຍັງເປັນການປົກປັກຮັກສາມໍຣະດົກວັດທະນະທຳທີ່ມີຮາກເຫງົ້າຮ່ວມກັນມາແຕ່ບູຮານນະການ, ສ້າງລະບົບການຄຸ້ມຄອງ ແລະ ສືບທອດສິລະປະອັນລ້ຳຄ່ານີ້ ໃຫ້ຍືນຍົງສູ່ລະດັບສາກົນ. ທັງເປັນການປະກອບສ່ວນສະເຫຼີມສະຫຼອງ 70 ປີ ແຫ່ງການສ້າງຕັ້ງສາຍພົວພັນການທູດ ລາວ-ອິນເດຍ ປະກອບສ່ວນສຳຄັນໃນການຮັດແໜ້ນຄວາມສາມັກຄີ ແລະ ການຮ່ວມມືທາງດ້ານວັດທະນະທຳລະຫວ່າງສອງຊາດໃຫ້ນັບມື້ເກີດດອກອອກຜົນ ແລະ ຈະເລີນງອກງາມຍິ່ງໆຂຶ້ນ.
ຂ່າວ-ພາບ: ບຸນອູ້ມ
ຄໍາເຫັນ