ສະຫາຍ ພົນຈັດຕະວາ ຈັນທະຈັກໄຊຍະວົງສາ ຫົວໜ້າກົມນໍ້າມັນເຊື້ອໄຟກົມໃຫຍ່ພະລາທິການກອງທັບຜູ້ເກົ່າ ໄດ້ຜ່ານບົດສະຫຼຸບການນຳພາ-ຊີ້ນຳວຽກງານ ຕະຫຼອດໄລຍະຊຸມປີຜ່ານມາ ຄະນະພັກ-ຄະນະບັນຊາກົມນໍ້າມັນເຊື້ອໄຟກົມໃຫຍ່ພະລາທິການກອງທັບ ໄດ້ເອົາໃສ່ຕໍ່ການສຶກສາອົບຮົມການເມືອງ-ນໍາພາແນວຄິດໃຫ້ພະນັກງານສະມາຊິກພັກ ແລະ ນັກຮົບທຸກສະຫາຍໃນທຸກຂະແໜງການວິຊາສະເພາະນໍ້າມັນເຊື້ອໄຟ ໃຫ້ມີສະຕິລະວັງຕົວຕໍ່ກົນອຸບາຍທໍາລາຍມ້າງເພຂອງສັດຕູ,ເຊື່ອມຊຶມກໍາແໜ້ນຕໍ່ແນວທາງນະໂຍບາຍຂອງພັກ, ປະຕິບັດທຸກມະຕິຄໍາສັ່ງ, ຂໍ້ກໍານົດ, ກົດລະບຽບຂອງພັກ, ກົດໝາຍຂອງລັດ ແລະ ຂອງກອງທັບວາງອອກຢ່າງເຂັ້ມງວດ, ຊີ້ນໍາບັນດາສາງນໍ້າມັນທີ່ຂຶ້ນກັບ,ຈັດຕັ້ງກໍາລັງປະຈຳການໃຫ້ເປັນປົກກະຕິ, ເຄື່ອນໄຫວຕາມພາລະບົດບາດຕາມການຈັດຕັ້ງຂັ້ນເທິງມອບໃຫ້, ດ້ານວຽກງານວິຊາສະເພາະໄດ້ເປັນເສນາທິການໃຫ້ແກ່ກົມໃຫຍ່ພະລາທິການກອງທັບ, ກໍຄືກະຊວງປ້ອງກັນປະເທດ ໃນການສະຫຼຸບ-ສັງລວມ, ເກັບກໍາສະຖິຕິ, ຂຶ້ນແຜນງົບປະມານຄວາມຕ້ອງການນໍ້າມັນເຊື້ອໄຟ, ອຸປະກອນເຕັກນິກ ແລະ ບົວລະບັດສ້ອມແປງສາງນໍ້າມັນ ກໍຄືພາຫະນະເຕັກນິກ, ພົວພັນປະສານກັບພາກສ່ວນກ່ຽວຂ້ອງໃນການຈັດຊື້ນໍາເຂົ້ານໍ້າມັນເຊື້ອໄຟ ຮັບໃຊ້ກອງທັບໄດ້ຕາມແຜນການທີ່ຂັ້ນເທິງອະນຸມັດ, ປັບປຸງ ແລະ ສ້າງນິຕິກຳໃນການຄຸ້ມຄອງ-ນໍາໃຊ້ນໍ້າມັນໃນກອງທັບ, ເບີກຈ່າຍສະໜອງຮັບປະກັນນໍ້າມັນເຊື້ອໄຟໃຫ້ທຸກການເຄື່ອນໄຫວຂອງກອງທັບ ພ້ອມກັນນັ້ນ ກໍມີສ່ວນແຮສໍາຮອງໄວ້ ເພື່ອຮັບປະກັນໃຫ້ວຽກງານຮີບດ່ວນບັງເອີນຂອງຂັ້ນເທິງ, ຈັດຊື້ ແລະ ປະກອບອຸປະກອນນໍ້າມັນເຊື້ອໄຟໃຫ້ບັນດາກົມກອງໄດ້ຢ່າງທົ່ວເຖິງ, ຟື້ນຟູສ້ອມແປງລົດຊີແຕັກ 6 ຄັນ ເພື່ອເຄື່ອນທີ່ເບີກຈ່າຍນໍ້າມັນ ໄດ້ 6 ຄັນ, ສະເໜີຂັ້ນເທິງດັດແປງລົດຂົນສົ່ງ 10 ລໍ້ເປັນຊີແຕັກໄດ້ 13 ຄັນ, ກໍ່ສ້າງປໍ້ານໍ້າມັນທັນສະໄໝຂັ້ນກະຊວງໄດ້ 1 ແຫ່ງ ແລະ ກົມກອງໄດ້ 5 ກົມກອງ, ກໍ່ສ້າງເພີ່ມເຕີມຖັງບັນຈຸນໍ້າມັນ ແລະ ຟື້ນຟູ ສາງນໍ້າມັນຂັ້ນຍຸດທະສາດ ໄດ້ 3 ແຫ່ງ, ມີບໍລິມາດບັນຈຸໄດ້ 3.000.000 ລິດ.
ຈາກນັ້ນ, ສະຫາຍ ພົນຈັດຕະວາ ຈັນທະຈັກ ໄຊຍະວົງສາ ຫົວໜ້າກົມນໍ້າມັນເຊື້ອໄຟ ຜູ້ເກົ່າ ກໍໄດ້ເຊັນບົດບັກທຶກມອບ-ໜ້າທີ່ ໃຫ້ສະຫາຍ ພັນເອກ ເພັດທອງຄູນ ວົງຜາຈັນ ຫົວໜ້າກົມນໍ້າມັນເຊື້ອໄຟ ຜູ້ໃໝ່ ສືບຕໍ່ນຳພາ-ຊີ້ນຳວຽກງານໃຫ້ມີີຜົນສຳເລັດໃໝ່ໃຫຍ່ຫຼວງກວ່າເກົ່າ.
(ຂ່າວ: ຄຳປະສົງ ລາດຊະວົງ)
ຄໍາເຫັນ