ມອບ-ຮັບໜ້າທີ່ເລຂາພັກເມືອງເຈົ້າເມືອງຜູ້ເກົ່າ ແລະ ເລຂາພັກເມືອງ ວ່າການເຈົ້າເມືອງໄຊຍະບູລີ ຜູ້ໃໝ່

ພິທີມອບ-ຮັບໜ້າທີ່ລະຫວ່າງເລຂາພັກເມືອງ,ເຈົ້າເມືອງຜູ້ເກົ່າ ແລະ ເລຂາພັກເມືອງ, ວ່າການເຈົ້າເມືອງໄຊຍະບູລີ ຜູ້ໃໝ່ ໄດ້ຈັດຂຶ້ນຫວ່າງບໍ່ດົນມານີ້ທີ່ຫ້ອງປະຊຸມໃຫຍ່ຂອງເມືອງ, ໃຫ້ກຽດເຂົ້າຮ່ວມໂດຍ ທ່ານ ດວງຕາ ໄຊວຸດ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດ, ວຽກພັກພະນັກງານ ແລະ ອົງການຈັດຕັ້ງມະຫາຊົນຂັ້ນແຂວງ, ມີການນໍາຂອງແຂວງ, ກໍາມະການປະຈໍາພັກເມືອງ, ກໍາມະການພັກເມືອງ, ມີຫົວໜ້າ, ຮອງຫົວໜ້າຫ້ອງການ, ຫົວໜ້າ, ຮອງຫົວໜ້າໜ່ວຍງານ, ເລຂາໜ່ວຍພັກບ້ານເທດສະບານເມືອງເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ ຜູ້ເກົ່າ ໄດ້ຂຶ້ນຜ່ານບົດລາຍງານຫຍໍ້ການຈັດຕັ້ງປະຕິບັດໜ້າທີ່ວຽກງານຮອບດ້ານຂອງເມືອງໃນໄລຍະ 4 ປີກວ່າຜ່ານມາວ່າ: ໃນຕະຫຼອດ 4 ປີກວ່າທີ່ຜ່ານມາ ອົງຄະນະພັກມືອງໄຊຍະບູລີ ໄດ້ສຸມທຸກສະຕິປັນຍາຄວາມຮູ້, ຄວາມສາມາດ ເພື່ອຊີ້ນຳ-ນຳພາເມືອງໄຊຍະບູລີ ໃຫ້ໄດ້ຮັບການພັດທະນາ ກ້າວຂຶ້ນຢ່າງບໍ່ຢຸດຢັ້ງໂດຍການຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກເຂົ້າເປັນແຜນງານ, ໂຄງການໄປພ້ອມກັບການຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ, ມະຕິ IX ຂອງອົງຄະນະພັກເມືອງ ໃຫ້ເຂົ້າສູ່ຊີວິດຕົວຈິງຖືເອົາການຫັນລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານເປັນໜ້າທີ່ຍຸດສາດ,ຕິດພັນກັບການສ້າງທ່າສະໜາມປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເປັນພື້ນຖານໃນການພັດທະນາເມືອງໄຊຍະບູລີ ກ້າວຂຶ້ນຢ່າງບໍ່ຢຸດຢັ້ງ; ເຮັດໃຫ້ທົ່ວເມືອງໄຊຍະບູລີມີສະຖຽນລະພາບທາງດ້ານການເມືອງ,ເສດຖະກິດໂດຍລວມມີການຂະຫຍາຍຕົວຢ່າງຕໍ່ເນື່ອງ, ລວມຍອດລາຍຮັບທັງໝົດໃນທົ່ວເມືອງບັນລຸ 2,7ຕື້ກວ່າກີບສະເລ່ຍຫົວຄົນເທົ່າກັບ 32 ລ້ານກີບເທົ່າກັບ 1.726ໂດລາຕໍ່ຄົນຕໍ່ປີ, ໄດ້ສຸມໃສ່ຊຸກຍູ້ປະຊາຊົນປູກເຂົ້າສອງລະດູມີເນື້ອທີ່ທັງໝົດ 6.952 ເຮັກຕາ, ສາມາດຜະລິດເຂົ້າໄດ້ທັງໝົດ 25.540ໂຕນ, ສະເລ່ຍເຂົ້າໃສ່ຫົວຄົນບັນລຸ 309 ກິໂລ/ຄົນ/ປີ; ພົ້ນເດັ່ນການຜະລິດຂອງປະຊາຊົນໄດ້ນັບມື້ນັບເພີ່ມຂຶ້ນ ເປັນຕົ້ນແມ່ນການປູກພືດຜັກ,ພືດຕະກຸນຖົ່ວໃສ່ທົ່ງນາ,ສາລີແຂງ,ໝາກເດືອຍ,ມັນຕົ້ນ ແລະ ໄມ້ໃຫ້ໝາກ, ການລ້ຽງສັດກໍມີທ່າອ່ຽງຂະຫຍາຍຕົວແລະເພີ່ມຂຶ້ນໂດຍຫັນການລ້ຽງແບບທຳມະຊາດກະແຈກກະຈາຍມາສູ່ການລ້ຽງເປັນກຸ່ມ, ເປັນຟາມ, ເປັນຄັງແລະທົ່ງຫຍ້າ-ພືດອາຫານສັດສາມາດຕອບສະໜອງການບໍລິໂພກຊີ້ນ, ໄຂ່, ປາຢູ່ພາຍໃນເມືອງໄດ້ 3.638 ໂຕນຕໍ່ປີ, ສະເລ່ຍຕໍ່ຫົວຄົນໄດ້  44 ກິໂລຕໍ່ຄົນຕໍ່ປີ, ຈາກນັ້ນໃນພິທີກໍໄດ້ມີການລົງນາມໃສ່ບົດບັນທຶກມອບ-ຮັບໜ້າທີ່ລະຫວ່າງ ທ່ານ ບຸນແທນ ທີແກ້ວ ກໍາມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ ຜູ້ເກົ່າ ແລະ ທ່ານ ເສນ ພັນລັກ ເລຂາພັກເມືອງ ວ່າການເຈົ້າເມືອງໄຊຍະບູລີ ຜູ້ໃໝ່ ໂດຍຊ້ອງໜ້າການນໍາຂອງແຂວງ ແລະ ການນໍາຂອງເມືອງ.
ໂອກາດດັ່ງກ່າວ, ທ່ານ ດວງຕາ ໄຊວຸດ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດ, ວຽກພັກພະນັກງານ ແລະ ອົງການຈັດຕັ້ງມະຫາຊົນຂັ້ນແຂວງກໍໄດ້ໃຫ້ກຽດໂອ້ລົມຕໍ່ພິທີດັ່ງກ່າວອີກດ້ວຍ.
(ຂ່າວ-ພາບ: ສົມພົງສີສະຫວັດ)