ມອບ-ຮັບທາງເຂົ້າບ້ານຊຳກ້ວາງ

ທ່ານ ຫຼີນຄາຍຫາງ ຜູ້ຈັດການພາກສະໜາມ ບໍລິສັດ ຊີແວວ ອິນເຕີເນເຊີນນໍ ເຕັກໂນໂລຊີ ອິເນີຈີ ລາວຈຳກັດ ໄດ້ລາຍງານການກໍ່ສ້າງເສັ້ນທາງວ່າ: ການກໍ່ສ້າງເສັ້ນທາງດັ່ງກ່າວ ແມ່ນໄດ້ຮັບການຊ່ວຍເຫຼືອລ້າຈາກບໍລິສັດ ຊີແວວ ອິນເຕີເນເຊີນນໍ ເຕັກໂນໂລຊີ ອິເນີຈີ ລາວຈຳກັດ ຊຶ່ງໄດ້ເລີ່ມຕົ້ນຈາກເສັ້ນທາງ3908 ຫາບ້ານຊຳກ້ວາງ ມີຄວາມຍາວ16ກິໂລແມັດ ເປັນທາງເປີດໃໝ່ ເສັ້ນທາງປູແຮ່ ກວ້າງ6ແມັດ ໄລຍະເວລາກໍ່ສ້າງ3ເດືອນ ມີມູນຄ່າການກໍ່ສ້າງ600,000ໂດລາສະຫະລັດ. ໂອກາດນີ້, ທາງແຂວງ ແລະ ເມືອງ ກໍໄດ້ກ່າວສະແດງຄວາມຂອບໃຈ ມາຍັງບໍລິສັດ ທີ່ໃຫ້ການຊ່ວຍເຫຼືອລ້າ ກໍ່ສ້າງເສັ້ນທາງດັ່ງກ່າວ ເພື່ອອຳນວຍຄວາມສະດວກໃຫ້ກັບພໍ່ແມ່ປະຊາຊົນບ້ານຊຳກວ້າງ. ບ້ານດັ່ງກ່າວ, ມີ 64ຄອບຄົວ ມີ430ຄົນ ປະຊາຊົນປູກຝັງ-ລ້ຽງສັດເປັນອາຊີບຕົ້ນຕໍ. ເມື່ອມີເສັ້ນທາງ ປະຊາຊົນກໍສະດວກໃນການຂົນສົ່ງສິນຄ້າ, ນຳສົ່ງຄົນເຈັບໄປໂຮງໝໍ ແລະ ຈໍລະຈອນໄດ້ສະດວກ ເຮັດໃຫ້ຊີວິດການເປັນຢູ່ຂອງປະຊາຊົນ ມີຄວາມສະດວກ ສະບາຍ ອຸດົມສົມບູນຂຶ້ນ.

(ຂ່າວ: ບຸນມີ ແສງທຸມມີ)