ສະຖານທູດຍີ່ປຸ່ນປະຈໍາ ລາວ ຮ່ວມກັບມູນນິທິຍີ່ ປຸ່ນ ໄດ້ຈັດງານເທດສະ ການຮູບເງົາຍີ່ປຸ່ນຄັ້ງທີ 7 ຂຶ້ນໃນວັນທີ 9 ກຸມພາ ຜ່ານມາ ທີ່ໂຮງຮູບເງົາເມເຈີວຽງຈັນເຊັນເຕີນະຄອນຫຼວງວຽງຈັນ (ນວ) ໂດຍເປັນກຽດເຂົ້າຮ່ວມຕັດແຖບຜ້າເປີດງານຂອງທ່ານ ຄໍາເພົ້າ ວັນນະວົງ ຫົວໜ້າກົມຮູບເງົາ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີທ່ານ ເຄັນອິຈິ ໂຄບາຢາຊິ ເອກອັກຄະລັດຖະທູດຍີ່ປຸ່ນ ປະຈຳ ລາວ ພ້ອມດ້ວຍແຂກ ຖຶກເຊີນເຂົ້າຮ່ວມ.
ທ່ານ ເຄັນອິຈິ ໂຄບາຢາຊິ ກ່າວເປີດງານວ່າ: ງານເທດສະການຮູບເງົາຍີ່ປຸ່ນຄັ້ງທຳອິດໄດ້ເປີດຂຶ້ນໃນເດືອນມັງກອນປີ 2017ນັບແຕ່ນັ້ນເປັນຕົ້ນມາ ໄດ້ແບ່ງປັນສະເໜ່ຂອງຮູບເງົາຍີ່ປຸ່ນໃຫ້ກັບຫຼາຍໆຄົນບໍ່ວ່າຈະເປັນຄົນລາວ ແລະ ຄົນຕ່າງ ປະເທດທີ່ນະຄອນຫຼວງວຽງຈັນໄດ້ເປັນຢ່າງດີ. ການຈັດງານເທດສະການຮູບເງົາປີນີ້ ຍັງເປັນນິມິດໝາຍສຳຄັນເພື່ອສະເຫຼີມ ສະຫຼອງມິດຕະພາບອັນຍາວນານລະຫວ່າງລາວ-ຍີ່ປຸ່ນ.
ຮູບເງົາທີ່ນຳມາສາຍໃນ ຄັ້ງນີ້ປະກອບມີ 8 ເລື່ອງ ລວມທັງກະຕຸນຢ້ອນຍຸກທີ່ຄົນຍີ່ປຸ່ນມັກມາເປັນເວລາຫຼາຍປີ ພ້ອມກັບການອອກສາຍໂຄສະນາ, ຜ່ານມາໄດ້ມີການສາຍຮອບປະຖົມມະເລີກໃນອາດີດທີ່ປະເທດຍີ່ປຸ່ນ. ຮູບເງົາບໍ່ພຽງແຕ່ເປັນແຫຼ່ງບັນເທີງທີ່ມະ ຫັດສະຈັນເທົ່ານັ້ນ ແຕ່ຍັງຊ່ວຍໃຫ້ພວກເຮົາຮຽນຮູ້ກ່ຽວກັບວັດທະນະທໍາ, ວິຖີການດຳລົງຊີວິດຂອງຄົນຍີ່ປຸ່ນ ແລະ ອື່ນໆ. ພ້ອມໄດ້ຮັບປະສົບການ ທັດສະນະທີ່ມີຄວາມແຕກຕ່າງກັນ ແລະ ເປີດດວງຕາໄປສູ່ສ່ວນໜຶ່ງຂອງໂລກທີ່ອາດຈະບໍ່ຮູ້ຈັກຫຼາຍ. ສຳລັບຮູບເງົາທັງ 8 ເລື່ອງທີ່ເລືອກມາສາຍ ລ້ວນແຕ່ໄດ້ສະແດງເຖິງວັດທະນະທໍາ ແລະ ປະ ຫວັດສາດຂອງຍີ່ປຸ່ນ. ໃນນັ້ນ, ແຕ່ລະປະເພດຮູບ ເງົາຈະປະກອບມີອະນິເມຊັນ, ສິນລະປະ, ໂຣແມນຕິກ ແລະ ຕະຫຼົກ. ພິເສດຍັງມີຮູບເງົາອີກໜຶ່ງເລື່ອງທີ່ໜ້າສົນໃຈຄື: "Lupin the 3rd, the Castle of Cagliostro" ຫຼື ຈອມໂຈນລູແປງທີ 3 ຕອນ ປະສາດຄາກຣີອັອດສະໂທຣ. ໃນນັ້ນ, ຮູບເງົາກະຕຸນແບບຢ້ອນຍຸກຍັງຄົງເປັນທີ່ນິຍົມໃນກຸ່ມຄົນທຸກໄວ ລວມທັງໄວໜຸ່ມໃນປະເທດຍີ່ປຸ່ນ. ຂ້າພະເຈົ້າແນ່ໃຈວ່າທ່ານຈະສາມາດຊອກຫາຮູບເງົາທີ່ທ່ານມັກຈາກຮູບ ເງົາຫຼາກຫຼາຍປະເພດທີ່ໄດ້ຄັດເລືອກມາສາຍໃນປີນີ້.
ການເປີດເທດສະການຮູບເງົາຍີ່ປຸ່ນໃນຄັ້ງນີ້ຈະດຳເນີນໄປເປັນເວລາ 5 ວັນຄື: ວັນທີ 10-11 ກຸມພາ ແລະ ວັນທີ 16-17-18 ກຸມພາ 2024 ນີ້ເທົ່ານັ້ນ ທ່ານສາມາດເລືອກເຂົ້າຊົມໄດ້ຕາມວັນ ແລະ ເວລາດັ່ງ ກ່າວ ຫຼືຕິດຕາມລາຍລະອຽດໄດ້ທາງເຟດສບຸກ Japan Foundation, Vientiane ເຊື່ອແນ່ວ່າຜູ້ຊົມບໍ່ພຽງແຕ່ໄດ້ຮັບຄວາມມ່ວນຊື່ນປະທັບໃຈຍັງໄດ້ຮຽນຮູ້ເຖິງວັດ ທະນະທຳ, ວິຖີການດຳລົງຊີວິດຂອງຍີ່ປຸ່ນໄດ້ເປັນ ຢ່່າງດີ.
(ຂ່າວ-ພາບ: ວັນເພັງ)
ຄໍາເຫັນ