ໃນລະຫວ່າງ ວັນທີ 20-21 ພະຈິກ ຜ່ານມາ ເມືອງຫົງສາ ແຂວງໄຊຍະຍູລີໄດ້ດຳເນີນກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 13 ສະໄໝທີ VIII ຢ່າງເປັນທາງການທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານຂອງສະຫາຍ ຄໍາຫຼ້າ ຜີວວັນນາ ກຳມະການພັກແຂວງ ເລຂາຄະນະບໍລິຫານງານພັກເມືອງ, ເຈົ້າເມືອງຫົງສາ, ມີຄະນະປະຈໍາພັກເມືອງ, ກໍາມະການພັກເມືອງ, ສະມາຊິກສະພາປະຊາຊົນຂັ້ນແຂວງ ປະຈຳເມືອງ, ເລຂາຄະນະພັກຮາກຖານ, ເລຂາໜ່ວຍພັກຫ້ອງການ-ກົມກອງ, ເລຂາໜ່ວຍພັກບ້ານເທດສະບານ, ພະນັກງານອາວຸໂສບຳນານ, ພະນັກງານລົງປະຈຳຮາກຖານບ້ານ ແລະ ຫົວໜ້າລັດວິສາຫະກິດສູນບໍລິການປະຈຳເມືອງເຂົ້າຮ່ວມ.
ກອງປະຊຸມໄດ້ຮັບຟັງ ແລະ ຮັບຮອງເອົາບົດສະຫຼຸບຫຍໍ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງໃນ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍປີ 2023, ຮັບຟັງ ແລະ ຮັບຮອງເອົາບົດສະຫຼຸບຕີລາຄາການກວດກາປະເມີນຜົນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ຕິດພັນກັບການດໍາເນີນກອງປະຊຸມໃຫຍ່ 3 ຂັ້ນ, ຮັບຟັງ ແລະ ຮັບຮອງເອົາບົດລາຍງານການຈັດຕັ້ງປະຕິບັດເກັບກູ້ຜົນຜະລິດລະດູຝົນ, ແຜນຜະລິດລະດູແລ້ງ ແລະ ແຜນການສະກັດກັ້ນປ້ອງກັນການຖາງໄຮ່ປ່າແກ່, ການປ້ອງກັນໄຟໄໝ້ລາມປ່າ ປະຈໍາປີ 2024. ຕະຫຼອດໄລຍະ 9 ເດືອນຜ່ານມາ ເມືອງຫົງສາ ໄດ້ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງເມືອງ ຄື: 2020-2024, ໄປຄຽງຄູ່ກັບການນໍາພາຈັດຕັ້ງປະຕິບັດວຽກງານຮອບດ້ານ, ສ້າງຂະບວນການຫັນລົງກໍ່ສ້າງຮາກຖານການເມືອງພັດທະນາຊົນນະບົດ. ບັນດາຂະແໜງການທີ່ກ່ຽວຂ້ອງ ໄດ້ເອົາໃຈໃສ່ຈັດຕັ້ງປະຕິບັດແຜນວຽກຈຸດສຸມດໍາເນີນໄປຕາມແຜນທີ່ກຳນົດໄວ້, ເຮັດໃຫ້ສະພາບໂດຍລວມຂອງເມືອງຍັງຮັກສາໄດ້ຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍໃນສັງຄົມ ໄດ້ໂດຍພື້ນຖານ. ສະແດງອອກຄື: ການຈັດເກັບລາຍຮັບເຂົ້າງົບປະມານໄດ້ທັງໜົດ7,2 ຕື້ກີບ, ທຽບໃສ່ແຜນການປີປະຕິບັດໄດ້ 106,74%.ໃນນີ້: ລາຍຮັບຈາກສ່ວຍສາອາກອນ 7 ຕື້ກີບ ເທົ່າກັບ 107,47% ຂອງແຜນການປີຮັບຈາກຊັບສິນຂອງລັດ 208 ລ້ານກວ່າກີບ ເທົ່າກັບ 86,76% ຂອງແຜນການປີ; ປະຕິບັດລາຍຈ່າຍໄດ້ທັງໝົດ 2,8 ຕື້ກີບ, ທຽບໃສ່ແຜນການປີປະຕິບັດໄດ້ 73,57%; ການຈັດຕັ້ງປະຕິບັດໂຄງການລົງທຶນ ມີທັງໝົດ 26ໂຄງການ, ມູນຄ່າຕາມສັນຍາ 153,3 ຕື້ກີບ, ປະຕິບັດໜ້າວຽກສໍາເລັດ 33,18% ເປັນເງິນ 50,8 ຕື້ກີບໃນນີ້ໂຄງການປະຕິບັດໜ້າວຽກສໍາເລັດ 100% ມີ 10 ໂຄງການ ເປັນເງິນ 11,6 ຕື້ກີບ; ການຜະລິດລະດູຝົນ (ປະຕິບັດໄດ້ລື່ນຄາດໝາຍ) ເນື້ອທີ່ແຜນການແມ່ນ 5.015,08ເຮັກຕາ, ຜ່ານການຈັດຕັ້ງປະຕິບັດສາມາດບັນລຸໄດ້ 5.585,57ເຮັກຕາ, ເທົ່າກັບ 111,37% ຂອງແຜນການ.ສະແດງອອກຄື: ການປູກເຂົ້າມີເນື້ອທີ່ແຜນການທັງໝົດ 2.575,08 ເຮັກຕາ, ສາມາດປະຕິບັດໄດ້ 3.195,08 ເຮັກຕາ, ເທົ່າກັບ 124% ຂອງແຜນການ, ຄາດຄະເນຜົນຜະລິດໄດ້ 10.327,86 ໂຕນ, ທຽບໃສ່ປີຜ່ານມາເນື້ອທີ່ເພີ່ມຂຶ້ນ 72,59 ເຮັກຕາ, ຜົນຜະລິດເພີ່ມຂຶ້ນ 470,32 ໂຕນ. ການປູກພືດເປັນສິນຄ້າໃນທົ່ວເມືອງວາງແຜນໄວ້ ທັງໝົດ 2.850 ເຮັກຕາ, ສາມາດປະຕິບັດໄດ້ທັງໝົດ 2.734,04 ເຮັກຕາ, ເທົ່າກັບ 95,94% ຂອງແຜນການ, ມາຮອດປັດຈຸບັນເກັບກູ້ໄດ້ 2.529,04 ເຮັກຕາ, ຜົນຜະລິດ 19.120,8 ໂຕນ, ເທົ່າກັບ 92,19% ຂອງເນື້ອທີທັງໝົດ, ຖ້າທຽບໃສ່ປີຜ່ານມາເນື້ອທີ່ເພີ້ມຂຶ້ນ 454,76 ເຮັກຕາ, ຜົນຜະລິດເພີ່ມຂຶ້ນ 2.848,72 ໂຕນ. ຄຽງຄູ່ໄປພ້ອມກັນນັ້ນ ເມືອງຫົງສາຍັງໄດ້ດຳເນີນການລົງກວດກາປະເມີນຜົນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍຕິດພັນກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ ໃນຂອບເຂດທົ່ວເມືອງ ປະຈຳປີ 2023 ໄດ້ສຳເລັດ ຈຳນວນ 15 ໜ່ວຍພັກ ໃນ 13 ບ້ານເທດສະບານເມືອງ. ໃນນີ້, ຄະນະພັກຂັ້ນເທິງໄດ້ນໍາພາກວດກາ, ປັບປຸງລະບົບການຈັດຕັ້ງພັກ-ລັດ ນັບແຕ່ຂັ້ນຄະນະພັກຮາກຖານລົງຮອດຂັ້ນໜ່ວຍພັກ ແລະ ຈະສືບຕໍ່ລົງປະເມີນໜ່ວຍພັກໃນເຂດຫ່າງໄກຕົວເມືອງ ຈໍານວນ 19 ບ້ານ 21 ໜ່ວຍພັກ ໃຫ້ສໍາເລັດໃນທ້າຍປີນີ້ ແລະ ຜັນຂະຫຍາຍໄປແຕ່ລະໜ່ວຍພັກຢູ່ສໍານັກງານ-ອົງການ, ກົມກອງ, ໂຮງຮຽນ ແລະ ໂຮງໝໍ ໃນທົ່ວເມືອງ ໃຫ້ສໍາເລັດໃນຕົ້ນປີ 2024; ຄາດຄະເນວ່າ: ຈະຮັກສາໜ່ວຍພັກແຂງ (ປອດໃສ, ເຂັ້ມແຂງ, ໜັກແໜ້ນ) ໃນທົ່ວເມືອງ ໃຫ້ໄດ້ 81 ໜ່ວຍພັກ ໃນຈໍານວນ 91 ໜ່ວຍພັກທັງໝົດ.
ໃນຕອນທ້າຍ ກໍໄດ້ເປັນກຽດຮັບຟັງການມີຄຳຄິດຄຳເຫັນ ແລະ ໂອ້ລົມໃຫ້ທິດຊີ້ນຳຈາກສະຫາຍ ຄໍາຫຼ້າ ຜີວວັນນາ ປະທານກອງປະຊຸມຄັ້ງນີ້ຕື່ມອີກ.
ຂ່າວ-ພາບ: ກິດຕິສັກ ບົວໄລ
ຄໍາເຫັນ