ເມືອງລະມາມ ຈັດພິທີເປີດນ້ຳ ວັນຊົນລະປະທານ ແລະ ວັນສັກຢາປ້ອງກັນພະຍາດສັດແຫ່ງຊາດ

ຫ້ອງການກະສິກຳ ແລະ ປ່າໄມ້ ເມືອງລະມາມ ແຂວງເຊກອງໄດ້ຈັດພິທີເປີດນ້ຳ ວັນຊົນລະປະທານແຫ່ງຊາດ 3 ພະຈິກ ແລະ ວັນສັກຢາປ້ອງກັນພະຍາດສັດແຫ່ງຊາດ ເມື່ອບໍ່ດົນມານີ້ ທີ່ຊົນລະປະທານ ບ້ານໜອງບົງ-ຫ້ວຍຂຽວ, ໂດຍພາຍໃຕ້ການເປັນປະທານຂອງ ທ່ານ ວົງເດືອນ ຈັນທະບຸດຊຽງ ເຈົ້າເມືອງໆລະມາມ,ມີທ່ານ ເສີມສີ ສຸລິຕະ ຫົວໜ້າພະແນກກະສິກຳ ແລະ ປ່າໄມ້ແຂວງ,ມີພະແນກການອ້ອມຂ້າງແຂວງ,ຄະນະປະຈຳພັກເມືອງ,ກຳມະການພັກເມືອງ, ຫົວໜ້າ-ຄະນະຫ້ອງການອ້ອມຂ້າງເມືອງ, ຂະແໜງການກ່ຽວຂ້ອງຂອງພະແນກກະສິກຳແລະປ່າໄມ້ແຂວງ,ພ້ອມການຈັດຕັ້ງບ້ານດັ່ງກ່າວເຂົ້າຮ່ວມ.
ໃນພິທີ, ທ່ານ ສະໜອງ ສິມມະວັດ ຫົວໜ້າຫ້ອງການກະສິກຳ ແລະ ປ່າໄມ້ເມືອງລະມາມ ໄດ້ຜ່ານບົດລາຍງານການກະກຽມຄວາມພ້ອມດ້ານຕ່າງໆ ໃນວັນເປີດນ້ຳຊົນລະປະທານ ແລະ ວັນສັກຢາປ້ອງກັນພະຍາດສັດວ່າ: ໃນປີ 2023-2024 ທົ່ວເມືອງມີລະບົບຊົນລະປະທານທັງໝົດ 20 ແຫ່ງ ຂະໜາດໃຫຍ່ 1 ແຫ່ງ, ຂະໜາດກາງ 19 ແຫ່ງ, ສາມາດສະໜອງນ້ຳລະດູແລ້ງໄດ້ 926 ເຮັກຕາ, ໃນນັ້ນເຂົ້ານາແຊງ 869 ເຮັກຕາ, ພືດລະດູແລ້ງ 93 ເຮັກຕາ, ພືດລະດູຝົນ 110 ເຮັກຕາ. ສຳລັບຂະບວນການສັກຢາກັນພະຍາດສັດ ທາງຫ້ອງການກະສິກຳແລະປ່າເມືອງ ແມ່ນໄດ້ແຕ່ງວິຊາການໄດ້ລົງປັບປຸງຊຸກຍູ້ສັດຕະວະແພດຂັ້ນບ້ານໄດ້ 6 ຈຸດສຸມ ລວມ 25 ບ້ານໃນທົ່ວເມືອງ ເພື່ອລົງໂຄສະນາເຜີຍແຜ່ເຕັກນິກວິຊາການ ແລະ ເຄື່ອນໄຫວສັກຢາຕາມຄວາມຮັບຜິດຊອບຂອງຕົນ,ການຈັດຕັ້ງສະເຫຼີມສະຫຼອງວັນສັກຢາກັນພະຍາດສັດແຫ່ງຊາດ ແມ່ນໄດ້ປະຕິບັດແຕ່ປີ 2017 ເປັນຕົ້ນມາຮອດປັດຈຸບັນໄດ້ 16 ຄັ້ງ ແລະມີຈຳນວນສັດທີ່ໄດ້ຮັບການສັກຢາທັງໝົດ  935 ພັນກວ່າໂຕ,ສັກຄວາຍໄດ້ທັງໝົດ 205.716 ໂຕ,ງົວ 168.312 ໂຕ,ໝູ 112.208 ໂຕ,ແບ້ໄດ້ 44.883 ໂຕ ແລະ ສັດປີກສັກໄດ້ 403.951ໂຕ.
ຂະນະດຽວກັນ, ທ່ານ ສອນຈັນ ຕາງໜ້າອຳນາດການປົກຄອງບ້ານໜອງບົງ ກໍໄດ້ລາຍງານຫຍໍ້ກ່ຽວກັບການສ້າງຂະບວນການວັນສັກຢາປ້ອງກັນພະຍາດສັດລ້ຽງແຫ່ງຊາດວັນທີ 13 ພະຈິກ ແລະ ວັນເປີດນໍ້າຊົນລະປະທານ ວັນທີ 3 ພະຈິກ ຕິດພັນກັບຂະບວນການກະກຽມເຂົ້າສູ່ການຜະລິດ ລະດູແລ້ງປີ 2024 ເຫັນວ່າໃນໄລຍະຜ່ານມາຄະນະພັກ-ອຳນາດການປົກຄອງບ້ານຂອງພວກເຮົາ ໄດ້ເປັນເຈົ້າການ ແລະ ໄດ້ເອົາໃຈໃສ່ຊຸກຍູ້ພໍ່ແມ່ປະຊາຊົນໃນການຜະລິດກະສິກໍາ (ການປູກ-ການລ້ຽງ) ໂດຍສະເພາະ ແມ່ນການຜະລິດລະດູຝົນ ເຫັນໄດ້ວ່າມາຮອດປັດຈຸບັນນີ້ບ້ານຂອງພວກເຮົາສາມາດເກັບກ່ຽວຜົນຜະລິດ ເຂົ້ານາປີສຳເລັດປະມານ 80% ຂອງເນື້ອທີ່ທັງໝົດ, ຄຽງຄູ່ກັນນັ້ນພວກເຮົາຍັງໄດ້ເປັນເຈົ້າການສົມທົບ ກັບທີມງານລົງກໍ່ສ້າງຮາກຖານການເມືອງ, ຫ້ອງການກະສິກຳ ແລະ ປ່າໄມ້ເມືອງລະມາມ ໃນການຫ້າງຫາ ກະກຽມ ແລະ ນໍາພາພໍ່ແມ່ປະຊາຊົນບັນດາເຜົ່າຢູ່ພາຍໃນບ້ານ ເອົາໃຈໃສ່ໃນການສ້າງຂະບວນການອະນາໄມຄອງເໜືອງແມ່ (MC) ປະຕູນໍ້າຫ້ວຍວີ ມີຢູ່ 2 ຈຸດ ຊຶ່ງສາມາດອະນາໄມຄອງໄດ້ທັງໝົດມີຄວາມຍາວ 1.850 ແມັດ ແລະ ມີພໍ່ແມ່ປະຊາຊົນເຂົ້າຮ່ວມທັງໜົດ 135 ຄົນຍິງ 85 ຄົນ ທັງໝົດເຫຼົ່ານີ້ແມ່ນແນໃສ່ເພື່ອຮັບປະກັນການສະໜອງນໍ້າໃຫ້ແກ່ການຜະລິດລະດູແລ້ງ ໃຫ້ພຽງພໍກັບພື້ນທີ່ຕົວຈິງຂອງພໍ່ແມ່ປະຊາຊົນ, ໂດຍເລັ່ງໃສ່ການຜະລິດສະບຽງອາຫານ ແລະ ການຜະລິດເພື່ອໃຫ້ກາຍເປັນສິນຄ້ານັ້ນ ພວກເຮົາຈະຕ້ອງໄດ້ເອົາໃຈໃສ່ຊຸກຍູ້ໃຫ້ພໍ່ແມ່ປະຊາຊົນກະກຽມຄວາມພ້ອມເຂົ້າໃນການຜະລິດລະດູແລ້ງໃຫ້ທ່ວງທັນຕາມລະດູການ, ນອກຈາກນັ້ນພວກເຮົາຍັງໄດ້ເອົາໃຈໃສ່ຊຸກຍູ້ພໍ່ແມ່ປະຊາຊົນເພື່ອນຳເອົາສັດລ້ຽງຂອງຕົນມາສັກຢາ, ເນື່ອງໃນໂອກາດວັນສັກຢາປ້ອງກັນຍາດສັດລ້ຽງແຫ່ງຊາດ ໃຫ້ເປັນຂະບວນຟົດຟື້ນ, ພໍ່ແມ່ປະຊາຊົນເອົາໃຈໃສ່ໃນການສັກຢາປ້ອງກັນພະຍາດສັດລ້ຽງໃຫ້ສາມາດບັນລຸກວມເອົາ 85% ຂຶ້ນໄປຂອງຈໍານວນສັດລ້ຽງຢູ່ພາຍໃນບ້ານ.
ຂ່າວ-ພາບ: ດາວສະຫວັນ