ໃນພິທີຕາງໜ້າ ບໍລິສັດ ອາຊີ-ໂປຕາ ສາກົນ (ກວາງໂຈວ) ຈໍາກັດ ໄດ້ຂຶ້ນລາຍງານຈຸດປະສົງຂອງໂຄງການດັ່ງກ່າວ, ເພື່ອຊ່ວຍໃຫ້ການຜະລິດພັນເຂົ້າຢູ່ບ້ານ ນາຕານ ເມືອງພຽງ ໃຫ້ໄດ້ຮັບການຂະຫຍາຍຕົວ ແລະ ຍົກສູງປະສິດທິພາບການຜະລິດໃຫ້ສູງຂຶ້ນ, ຊຶ່ງຈະເປັນການເປີດຮູບແບບໃໝ່ຂອງການພັດທະນາກະສິກໍາແບບທັນສະໄໝທີ່ໃຫ້ຜົນຜະລິດສູງ ສະເລ່ຍ 7 ໂຕນຕໍ່ເຮັກຕາ. ນອກນີ້, ຍັງເປັນການສົ່ງເສີມໃຫ້ປະຊາຊົນໃຫ້ຫັນມາປູກເຂົ້າແບບທັນສະໄໝດ້ວຍເຕັກນິກ ແລະ ເຄື່ອງມືການຜະລິດດ້ວຍກົນຈັກ, ສົ່ງເສີມໃນຮູບແບບ 2+3 ຄື: ປະຊາຊົນມີເນື້ອທີ່ການຜະລິດ ແລະ ແຮງງານ. ທາງບໍລິສັດປະກອບໃຫ້ມີ: ແນວພັນ, ປຸຍ, ເຕັກນິກວິຊາການ ແລະ ຕະຫຼາດ.
ໂອກາດນີ້, ທ່ານ ພົງສະຫວັນ ສິດທະວົງ ໄດ້ກ່າວຕໍ່ພິທີວ່າ: ໂຄງການຜະລິດເຂົ້າພັນລູກປະສົມທີ່ໄດ້ຈັດຕັ້ງຂຶ້ນຄັ້ງນີ້, ຈະໄດ້ຊຸກຍູ້ປະລິມານການຜະລິດໃຫ້ສູງຂຶ້ນ ພ້ອມສ້າງສະຕີຕິໃໝ່ ແລະ ເປັນຕົວແບບໃນການປັບປຸງຫັນປ່ຽນຮູບແບບການຜະລິດດ້ວຍເຄື່ອງກົນຈັກທີ່ທັນສະໄໝ, ການຮ່ວມມືລະຫວ່າງອໍານາດການປົກຂອງເມືອງພຽງ ກັບ ສອງບໍລິສັດດັ່ງກ່າວ ແມ່ນມີຄວາມສໍາຄັນຫຼາຍ ແລະ ຫວັງວ່າທັງສອງຝ່າຍຈະຖືເອົາໂຄງການຜະລິດເຂົ້າພັນ ແລະ ປູກເຂົ້າຫຼາຍລະດູການເປັນຕົວແບບ, ເກັບກ່ຽວປະສົບການເພື່ອນໍາໄປຜັນຂະຫຍາຍ, ທັງເປັນການປະກອບສ່ວນກໍາລັງຍິ່ງໃຫຍ່ໃນການພັດທະນາກະສິກໍາທັນສະໄໝ. ຈາກນັ້ນ, ໃນພິທີກໍໄດ້ມີການລົງນາມໃສ່ບົດບັນທຶກການຮ່ວມມືຂອງສອງບໍລິສັດ, ເປີດປ້າຍໂຄງການ ແລະ ຢ້ຽມຊົມການເກັບກ່ຽວເຂົ້າຂອງໂຄງການຕື່ມອີກ.
(ຂ່າວ-ພາບ: ອຸ່ນເຮືອນ ໂພທິລັກ)
ຄໍາເຫັນ