ຄະນະຮັບຜິດຊອບຄຸ້ມຄອງກອງທຶນໄພພິບັດເມືອງພຽງ ແຂວງໄຊຍະບູລີ ຈັດກອງປະຊຸມສະຫຼູບການຈັດຕັ້ງປະຕິບັດວຽກງານຄຸ້ມຄອງກອງທຶນໄພພິບັດປະຈຳປີ 2023 ແລະ ວາງທິດທາງແຜນການປະຈຳປີ 2024 ຂຶ້ນໃນວັນທີ 27 ມີນາຜ່ານມາ ທີຫ້ອງປະຊຸມຫ້ອງການແຮງງານ ແລະ ສະຫວັດດີການ-ສັງຄົມເມືອງໂດຍການເປັນປະທານຂອງທ່ານ ສົມພອນ ຈັນທະວົງຢາງ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ຫົວໜ້າຄະນະຮັບຜິດຊອບຄຸ້ມຄອງກອງທຶນໄພພິບັດ, ມີພາກສ່ວນກ່ຽວຂ້ອງພາຍໃນເມືອງເຂົ້າຮ່ວມ.
ໃນກອງປະຊຸມຄັ້ງນີ້, ໄດ້ຜ່ານບົດສະຫຼູບຕີລາຄາການຈັດຕັ້ງປະຕິບັດວຽກຄຸ້ມຄອງກອງທຶນໄພພິບັດຂັ້ນເມືອງປະຈຳປີ 2023 ແລະ ວາງທິດທາງແຜນການປະຈຳປີ 2024 ໂດຍໄດ້ຍົກໃຫ້ເຫັນຜົນງານດ້ານດີໃນການຈັດຕັ້ງປະຕິບັດວຽກງານໃນໄລຍະຜ່ານມາ ລວມເຖິງຂໍ້ສະດວກ, ຂໍ້ຫຍຸ້ງຍາກ ແລະ ອື່ນໆ.
ໄລຍະຜ່ານມາ ພາກສວນກ່ຽວຂ້ອງໄດ້ເອົາໃຈໃສ່ສົມທົບກັບຫ້ອງການກະສິກໍາ ແລະ ປ່າໄມ້ເມືອງ, ປກສ ເມືອງ ລົງກວດກາຜົນກະທົບຈາກໄພນໍ້າຖ້ວມ, ລົງກວດກາອັກຄີໄພ ໄດ້ 7 ຄັ້ງ ມີ 11 ຄອບຄົວ, ມີຈໍານວນພົນ 74 ຄົນ ຍີງ 43 ຄົນ. ໃນນັ້ນ ເສຍຊີວິດ 1 ຄົນ ຢູ່ບ້ານ ນໍ້າສົງ, ລົງກວດກາລົມພາຍຸພັດເຮືອນເປ່ເພ ໄດ້ 6 ຄັ້ງ ມີ 32 ຄອບຄົວ, ຈໍານວນພົນ 715 ຄົນ ຍີງ 83 ຄົນ ແລະ ຊັບສີນຂອງລັດ 2 ແຫ່ງ (ສະໂມສອນກອງບັນຊາການທະຫານເມືອງ ແລະ ໂຮງຮຽນ ປະຖົມນໍ້າປຸຍ), ລົງກວດກາຄອບຄົວທີ່ຖືກເຄາະຮ້າຍຈາກຟ້າຜ່າເຮືອນ ແລະ ສັດລ້ຽງຕາຍ ໄດ້ 1 ຄັ້ງ ຈໍານວນ 2 ຄອບຄົວ ຢູ່ບ້ານ ນາໂສມ, ບ້ານ ນາບວມ ຈໍານວນພົນ 11 ຄົນ ຍິງ 5 ຄົນ ມີມູນຄ່າການເສຍຫາຍເປັນຈໍາຫຼວງຫຼາຍ ແລະ ລົງກວດກາຜູ້ທີ່ເສຍຊີວິດຈາກເຫດລູກປືນຄົກ 60 ມມ ແຕກຢູ່ ບ້ານ ນໍ້າຍາບ ມີຜູ້ເສຍຊີວິດ 3 ຄົນ ຍີງ 1 ຄົນ ພ້ອມທັງລົງໂຄສະນາເຜີຍແຜ່ຜົນຮ້າຍຈາກ ລະເບີດບໍ່ທັນແຕກທີ່ຕົກຄ້າງ ໃຫ້ພໍ່ປມ່ປະຊາຊົນ ຢູ່ບ້ານ ນໍ້າຍາບ, ບ້ານ ຂຸນພອນ, ບ້ານ ນໍ້າພອນ, ບ້ານ ນາໝໍ້ ແລະ ບ້ານ ຫ້ວຍຫານ ມີຜູ້ເຂົ້າຮ່ວມທັງຫມົດ 126 ຄົນ ຍີງ 55 ຄົນ.
ກອງປະຊຸມຍັງໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າເມືອງວ່າດ້ວຍການແຕ່ງຕັ້ງຄະນະຮັບຜິດຊອບລົງປຸກລະດົມເງິນເຂົ້າໃນກອງທຶນຄຸ້ມຄອງໄພພິບັດຂັ້ນເມືອງປະຈຳປີ 2024 ແລະ ບັນດາເຂົ້າຮ່ວມກອງປະຊຸມຍັງໄດ້ປະກອບຄຳຄິດເຫັນປຶກສາຫາລື ເພື່ອພ້ອມກັນປັບປຸງບັນຫາຕ່າງໆທີຍັງບໍ່ທັນຈັດຕັ້ງປະຕິບັດໄດ້ດີ ເພື່ອໃຫ້ໄດຮັບການແກ້ໄຂໃຫ້ມີປະສິດທິຜົນດີຂຶ້ນ.
(ຂ່າວ: ແສງສຸດາ ກິ່ງສະຫວັດ).
ຄໍາເຫັນ