ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີແຂກຖືກເຊີນ ແລະ ຜູ້ແທນສົມບູນ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງເຂົ້າ.
ສະຫາຍ ພູລັດຕະນະ ພົມມະຫາໄຊ ວ່າການເລຂາພັກເມືອງ ວ່າການເຈົ້າເມືອງພີນ ໄດ້ກ່າວເປີດກອງປະຊຸມໃຫຍ່ຄັ້ງທີ XII ຜູ້ແທນອົງຄະນະພັກເມືອງພີນຢ່າງເປັນທາງການ. ຈາກນັ້ນ ສະຫາຍ ເກດສະໜາ ບຸດຕະວົງ ຮອງເລຂາພັກເມືອງ ໄດ້ຜ່ານຮ່າງລາຍງານການເມືອງຕໍ່ກອງປະຊຸມວ່າ: ກອງປະຊຸມໃຫຍ່ຄັ້ງນີ້ ໄດ້ດໍາເນີນພາຍໃຕ້ຄໍາຂວັນທີ່ວ່າ: “ສ້າງເມືອງພີນເປັນເມືອງເຂັ້ມແຂງ, ຍົກສູງລະບົບການເມືອງໃຫ້ໜັກແໜ້ນ, ຍູ້ແຮງການຜະລິດກະສິກຳ, ຫັດຖະກຳ ແລະ ອຸດສາຫະກຳເປັນສິນຄ້າ, ສົ່ງເສີມການທ່ອງ ທ່ຽວທາງດ້ານວັດທະນະທຳ, ທຳມະຊາດ, ປະຫວັດສາດ, ພັດທະນາຊັບພະຍາກອນມະນຸດ ແລະ ສ້າງວຽກເຮັດງານທຳໃຫ້ປະຊາຊົນມີລາຍໄດ້ໝັ້ນຄົງ”.
ຕະຫຼອດໄລຍະ 5 ປີຜ່ານມາ, ຄະນະບໍລິຫານງານພັກເມືອງໄດ້ເອົາໃຈໃສ່ໃນການຜັນຂະຫຍາຍມະຕິກອງປະຊຸມໃຫຍ່ອົງຄະນະພັກເມືອງຄັ້ງທີ XI ໂດຍຖືເອົາວຽກງານສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານ ສະມາຊິກພັກທີ່ຢູ່ໃນຄວາມຮັບຜິດຊອບຂອງຕົນຢ່າງເປັນປົກກະຕິ, ໄດ້ນຳພາເຜີຍແຜ່ ແລະ ຜັນຂະຫາຍບັນດາເອກະສານມະຕິຄຳສັ່ງຕ່າງໆຂອງພັກ, ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ປະຕິບັດວິຊາສະເພາະຕິດພັນກັບການສ້າງພະລາທິການກັບທີ່, ຈັດຕັ້ງກຳລັງປະຈຳການກຽມສູ້ຮົບ, ປ້ອງກັນເວນຍາມ ແລະ ຕິດຕາມສະພາບຮອບດ້ານ, ສ້າງກຳລັງກອງຮ້ອຍ ໄດ້ 15 ກອງຮ້ອຍ, ປັບປຸງກຳລັງກອງຮ້ອຍໄດ້ 5 ກອງ, ປະກາດສ້າງບ້ານປ້ອງກັນຊາດເຂັ້ມແຂງໄດ້ 63 ບ້ານ, ຮັບຮອງບ້ານປ້ອງກັນຊາດເຂັ້ມແຂງໄດ້ 58 ບ້ານ, ມີ 8,000 ກວ່າຄອບຄົວເພີ່ມຂຶ້ນ 22 ບ້ານ, ຮັບຮອງບ້ານປ້ອງກັນຄວາມສະຫງົບດີໄດ້ 99 ບ້ານເພີ່ມຂຶ້ນ 62 ບ້ານ, ຮັບຮອງບ້ານປອດຢາເສບຕິດໄດ້ 70 ບ້ານ, ເພີ່ມຂຶ້ນ 59 ບ້ານ.
ດ້ານການພັດທະນາເສດຖະກິດ-ສັງຄົມການຂະຫຍາຍຕົວທາງດ້ານເສດຖະກິດສະເລ່ຍ 5.6%,ລວມຍອດຜະລິດຕະພັນ (GDP) ບັນລຸໄດ້ 764 ຕື້ກວ່າກີບ ຫຼື ຫຼາຍກວ່າ 97% ທຽບໃສ່ແຜນການ,ສະເລ່ຍໃສ່ພົນລະເມືອງໄດ້ 10 ລ້ານກວ່າກີບຕໍ່ຄົນຕໍ່ປີ ເທົ່າກັບ 461 ໂດລາສະຫະລັດ; ທົ່ວເມືອງມີເນື້ອທີ່ນາປີ 9,500 ເຮັກຕາ, ນາແຊງ 257 ເຮັກຕາ ດ້ວຍສະມັດຕະພາບ 3.3 ໂຕນຕໍ່ເຮັກຕາ, ບັນລຸໄດ້ 147,000 ກວ່າໂຕນເທົ່າກັບ 94% ຂອງແຜນການ, ສະເລ່ຍ 378 ກິໂລ/ຄົນ/ປີ.
ໃນກອງປະຊຸມ ຍັງໄດ້ຮັບຟັງການຜ່ານຮ່າງບົດສະຫຼຸບແຜນພັດທະນາເສດຖະກິດ-ສັງຄົມ 5 ປີຜ່ານມາ ແລະ ທິດທາງແຜນການໃນ 5 ປີຕໍ່ໜ້າຈາກສະຫາຍ ຄົມຄິດ ຍາດຕິວົງ ກໍາມະການພັກເມືອງຮອງເຈົ້າເມືອງ ຜູ້ຊີ້ນຳວຽກເສດຖະກິດ, ຮັບຟັງການປະກອບຄຳຄິດຄຳເຫັນຈາກຜູ້ຕາງໜ້າຂົງເຂດວຽກງານຕ່າງໆພາຍໃນເມືອງ. ພ້ອມນີ້, ບັນດາສະຫາຍຜູ້ແທນສົມບູນ ຍັງຈະໄດ້ມີການປ່ອນບັດຄັດເລືອກເອົາຄະນະບໍລິຫານງານພັກເມືອງພີນຊຸດໃໝ່. ກອງປະຊຸມດັ່ງກ່າວ, ແມ່ນໄດ້ດຳເນີນນັບແຕ່ວັນທີ 25-26 ມີນາ 2025 ຈິ່ງສໍາເລັດ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ