ເມືອງສະໝ້ວຍ ປະກາດຂະບວນການສ້າງຄອບຄົວ ແລະ ບ້ານສາມັກຄີປອງດອງ

ພິທີປະກາດເມືອງສະໝ້ວຍ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ເປັນເມືອງສຸດທ້າຍຂອງແຂວງສາລະວັນ ໄດ້ຈັດຂຶ້ນເມື່ອບໍ່ດົນມານີ້, ທີ່ສະໂມສອນເມືອງ ໂດຍການເຂົ້າຮ່ວມຂອງ ທ່ານ ຄຳຕາ ໂຮ່ຊົງເລືອງ ປະທານແນວລາວສ້າງຊາດແຂວງ, ມີທ່ານ ບຸນເຕີ້ຍ ດວງສຸລິຍະວົງສາ ເຈົ້າເມືອງໆສະໝ້ວຍ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ກາບ ແດງສະຫວ່າງ ປະທານແນວລາວສ້າງຊາດເມືອງ ໄດ້ຜ່ານບົດສະຫຼຸບການຈັດຕັ້ງປະຕິ ບັດຂະບວນການສ້າງຄອບຄົວ ແລະ ບ້ານສາມັກຄີປອງດອງໃນໄລຍະແຕ່ປີ 2017-2022 ຜ່ານມາວ່າ: ແນວລາວສ້າງຊາດເມືອງສະໝ້ວຍ ໄດ້ສຸມໃສ່ຈັດຕັ້ງຜັນຂະຫຍາຍຄໍາແນະນໍາກ່ຽວກັບບ້ານສາມັກຄີ ເປັນບ້ານຕົວແບບທີ່ດີຂອງແນວລາວສ້າງຊາດ ແລະ ຄໍາແນະນໍາຂອງຄະນະປະຈຳສູນກາງແນວລາວສ້າງຊາດ ວ່າດ້ວຍການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີຂອງແນວລາວສ້າງຊາດ, ຖືເອົາການປະສານສົມທົບກັບອົງຄະນະພັກ, ອົງການປົກຄອງບ້ານ ແລະ ແຕ່ງຕັ້ງຄະນະຮັບຜິດຊອບຂັ້ນບ້ານ, ຈັດຕັ້ງເຜີຍແຜ່ເຊື່ອມຊຶມບັນດານິຕິກຳ ແລະ ເອກະສານຕ່າງໆກ່ຽວກັບວຽກງານສ້າງຄອບຄົວ ແລະ ບ້ານສາມັກຄີປອງດອງໃຫ້ປະຊາຊົນພາຍໃນບ້ານເປົ້າໝາຍ ຮັບຮູ້ເຂົ້າໃຈເຫັນໄດ້ຕໍ່ຄວາມສໍາຄັນຂອງຂະບວນການດັ່ງກ່າວ ທັງຊີ້ນໍາ-ນໍາພາຢູ່ຂັ້ນບ້ານເອົາໃຈ ໃສ່ໃກ້ຊິດຕິດແທດເຮັດໃຫ້ຂະບວນການສ້າງຄອບຄົວ ແລະ ບ້ານສາມັກຄີປອງດອງໄດ້ຜັນຂະຫຍາຍຢ່າງເປັນຂະ ບວນກ້ວາງຂວາງ ຊຶ່ງມີຈໍານວນບ້ານເຂົ້າຮ່ວມທັງໝົດ 51 ບ້ານ 3.440 ຄອບຄົວ, ມີຈຳນວນພົນເຂົ້າຮ່ວມທັງໝົດ 6.880 ເທື່ອຄົນ, ຍິງ 3.540 ເທື່ອຄົນ ໂດຍແບ່ງອອກເປັນ 5 ຂັ້ນຕອນຄື: ການກະກຽມເກັບກໍາຂໍ້ມູນ ແລະ ວາງແຜນ, ເຜີຍແຜ່ເຊື່ອມຊຶມເອກະສານໃນຂັ້ນບ້ານ ພ້ອມທັງເປີດຂະບວນການ, ນໍາພາຈັດຕັ້ງປະຕິບັດຂະບວນການ, ຊຸກຍູ້, ຕິດຕາມ, ກວດກາຂະບວນການຈັດຕັ້ງປະຕິບັດໃນແຕ່ລະໄລຍະ 1-3 ເດືອນ ແລະ ປະເມີນຜົນການເປີດຂະບວນການແຕ່ລະໄລຍະ. 
    ຜ່ານການຈັດຕັ້ງປະຕິບັດໂຄງການສ້າງຄອບຄົວ ແລະ ບ້ານສາມັກຄີປອງດອງ ໂດຍປະຕິບັດຕາມ 4 ມາດຖານຂອງຄອບຄົວ, 5 ມາດຖານຂອງບ້ານ ແລະ 6 ມາດຖານຂອງເມືອງເປັນຕົ້ນ ຄອບຄົວມີຄວາມຮັກ ແພງຊຶ່ງກັນ ແລະ ກັນ, ມີຄວາມສາມັກຄີຖືກຕ້ອງປອງດອງ, ເຄົາລົບນັບຖືຊຶ່ງກັນ ແລະ ກັນ, ມີຄວາມຕື່ນຕົວທາງດ້ານການເມືອງ, ອະນຸລັກຮີດຄອງປະເພນີອັນດີງາມ, ເສີມຂະຫຍາຍວັດທະນະທໍາຂອງເຜົ່າ ແລະ ຂອງຊາດເປັນຄອບຄົວທີ່ມີແບບແຜນດໍາລົງຊີວິດທີ່ປອດໃສ, ມີເຮືອນຢູ່ໝັ້ນຄົງ, ມີອາຊີບທຳມາຫາກິນຄົງທີ່ ແລະ ເປັນຄອບ ຄົວພົ້ນທຸກ, ເປັນບ້ານພົ້ນທຸກ, ມີກອງທຶນພັດທະນາບ້ານ, ລະບົບການເມືອງ, ການປົກຄອງມີຄວາມໜັກແໜ້ນ, ອົງການແນວລາວສ້າງຊາດບ້ານມີຄວາມເຂັ້ມແຂງ ແລະ ບັນດາມາດຖານອື່ນໆ. ຊຶ່ງໄລຍະແຕ່ປີ 2017 ມາຮອດປັດຈຸບັນສາມາດສ້າງຄອບຄົວ ແລະ ບ້ານສາມັກຄີປອງດອງບັນລຸເຖິງ 51 ບ້ານ, 3.353 ຄອບຄົວ ເທົ່າກັບ 97,47% ຂອງຄອບຄົວທັງໝົດ. ໃນພິທີໄດ້ຜ່ານຂໍ້ຕົກລົງຂອງປະທານສູນກາງແນວລາວສ້າງຊາດ ວ່າດ້ວຍການຢັ້ງຢືນເມືອງສະໝ້ວຍເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃຫ້ກຽດມອບໂດຍທ່ານ ຄຳຕາ ໂຮ່ຊົງເລືອງ ກ່າວຮັບໂດຍທ່ານ ບຸນເຕີ້ຍ ດວງສຸລິຍະວົງສາ ແລະ ມອບໃບຍ້ອງຍໍບຸກຄົນດີ ເດັ່ນໃຫ້ຜູ້ທີ່ມີຜົນງານໃນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ, ໂອກາດນີ້ຄະນະປະທານໄດ້ເປີດປ້າຍ, ລັ່ນຄ້ອງ 9 ບາດເພື່ອເປັນສິລິມຸງຄຸນຕື່ມອີກ.  ຂ່າວ: ທິດລານີ ໂຄດໂຍທາ