ເມືອງວັງວຽງ ປະກາດຮັບຮອງເອົາ 18 ບ້ານເປັນບ້ານປ້ອງກັນຊາດເຂັ້ມແຂງ

ເມືອງວັງວຽງ ແຂວງວຽງຈັນ ປະກາດຮັບຮອງເອົາ 18 ບ້ານເປັນບ້ານປ້ອງກັນຊາດເຂັ້ມແຂງ ຄື: ບ້ານຜາຮອມ, ບ້ານຜາຕັ້ງ, ບ້ານນາດາວ, ບ້ານໂຊກໄຊ, ບ້ານໂພໄຊ, ບ້ານວຽງສະໄໝ, ບ້ານປາກເປາະ, ບ້ານພູດິນແດງ, ບ້ານຫ້ວຍສະເຫງົ້າ, ບ້ານເມືອງຊອງ, ບ້ານນາດ້ວງ, ບ້ານນາທອງ, ບ້ານໂພນຄຳ, ບ້ານຂັນໝາກ, ບ້ານໂພນວຽງ, ບ້ານໂພນສະຫວ່າງ,ບ້ານທ່າເຮືອ ແລະ ບ້ານຫ້ວຍປາ ເປັນບ້ານປ້ອງກັນຊາດເຂັ້ມແຂງ ບ້ານທີ 2-19 ຂອງເມືອງວັງວຽງ ແຫ່ງທີ 26 ຂອງແຂວງວຽງຈັນ ຊຶ່ງພິທີຮັບຮອງໄດ້ຈັດຂຶ້ນເມື່ອບໍ່ດົນມານີ້ ທີ່ສະໂມສອນຂອງເມືອງວັງວຽງ, ໂດຍການເປັນປະທານມອບໃບຢັ້ງຢືນ ຂອງທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ ປະທານປ້ອງກັນຊາດ-ປ້ອງກັນຄວາມສະຫງົບແຂວງວຽງຈັນ, ທ່ານ ບຸນມາ ວົງດາລາແສນ ຄະນະປະຈຳພັກແຂວງ ເລຂາຄະນະພັກ ຫົວໜ້າາການທະຫານແຂວງວຽງຈັນ, ທ່ານ ບຸນຈັນ ມາລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ ທັງເປັນຫົວໜ້າປ້ອງກັນຊາດ-ປ້ອງກັນຄວາມສະຫງົບເມືອງ, ມີທ່ານ ວັນຄຳ ຫຼວງພັນນາ ກຳມະການພັກເມືອງ ຫົວໜ້າກອງບັນຊາການທະຫານເມືອງ ແລະ ອຳນາດການປົກຄອງ 18 ບ້ານເຂົ້າຮ່ວມ.
         ທ່ານ ນາງ ແຫຼວທອງ ຈະເລີນສຸກ ເລຂາພັກບ້ານ-ນາຍບ້ານໆຫ້ວຍສະເຫງົ້າ ໄດ້ຕາງໜ້າໃຫ້ 18 ບ້ານ ຂຶ້ນຜ່ານບົດສະຫຼຸບການຈັດຕັ້ງປະຕິບັດການປະເມີນຜົນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ, ໂດຍໄດ້ຍົກໃຫ້ເຫັນດ້ານຕັ້ງໜ້າ ຄະນະພັກ ອຳນາດການປົກຄອງໃນແຕ່ບ້ານໄດ້ຖືເອົາວຽກງານສຶກສາອົບຮົມການເມືອງ, ນຳພາແນວຄິດ ໃຫ້ແກ່ປະຊາຊົນພາຍໃນບ້ານຂອງຕົນເປັນກົກ ດ້ວຍການນຳເອົາມະຕິຄຳສັ່ງຕ່າງໆຂອງພັກ ກົດໝາຍຂອງລັດ ມາຈັດຕັ້ງເຜີຍແຜ່ໃຫ້ປະຊາຊົນເຂົ້າໃຈແຈ້ງຕໍ່ແນວທາງນະໂຍບາຍຂອງພັກກົດໝາຍຂອງລັດ ເອກະສານອື່ນໆເພື່ອໃຫ້ເຂົາເຈົ້າຮັບຮູ້ເຊື່ອມຊຶມຢ່າງທົ່ວເຖິງ ເຮັດໃຫ້ປະຊາຊົນມີຄວາມສະດຸ້ງໄວຕື່ນຕົວປະກອບສ່ວນອັນສຳຄັນເຂົ້າໃນວຽກງານປ້ອງກັນຊາດ, ປ້ອງກັນຄວາມສະຫງົບຢ່າງຕັ້ງໜ້າ, ພ້ອມກັນເປັນເຈົ້າການເຮັດໜ້າທີ່ຕິດຕາມສະພາບກຸ່ມຄົນທີ່ບໍ່ຫວັງດີພາຍໃນບ້ານ ແລະ ຂອບເຂດຂອງຕົນຮັບຜິດຊອບຢ່າງເຂັ້ມງວດເພື່ອຕິດຕາມໃຫ້ທັນເວລາ. ທັງ 18 ບ້ານ ມີພົນລະເມືອງທັງໝົດ 23.990 ຄົນ ຍິງ 11.005 ຄົນ, ປັດຈຸບັນມີຫຼັງຄາເຮືອນທັງໝົດ 4.442 ຫຼັງຄາເຮືອນ, ມີຈຳນວນຄອບຄົວທັງ                    ໝົດ 4.463 ຄອບຄົວ, ມີໜ່ວຍສາມັກຄີທັງໝົດ 293 ໜ່ວຍ, ມີລະບົບການຈັດຕັ້ງຄົບຊຸດ, ມີທ່າແຮງບົ່ມຊ້ອນຫຼາຍດ້ານທີ່ເປັນເງື່ອນໄຂຂໍ້ສະດວກໃນການພັດທະນາເສດຖະກິດ-ສັງຄົມ ເຮັດໃຫ້ບ້ານໄດ້ຮັບການພັດທະນາຢ່າງຕໍ່ເນື່ອງ, ການສ້າງເສດຖະກິດແກ້ໄຂຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ, ເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກໄປເທື່ອລະກ້າວ. ຜ່ານການປະເມີນຜົນຂອງການຈັດຕັ້ງປະຕິບັດການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ 4.463 ຄອບຄົວ, ຈັດເປັນບ້ານປ້ອງກັນຊາດເຂັ້ມແຂງ ປະເພດ 1 ມີ 4.297 ຄອບຄົວ, ຈາກຜົນສຳເລັດດັ່ງກ່າວສາມາດຮັບຮອງເອົາ 18 ບ້ານທີ່ຂຶ້ນກັບເມືອງວັງວຽງ ເປັນຄອບຄົວ ແລະ ບ້ານປ້ອງກັນຊາດເຂັ້ມແຂງ ຕາມ 6 ມາດຖານຂອງກະຊວງປ້ອງກັນປະເທດວາງອອກ.
        ໃນພິທີ ຍັງໄດ້ຜ່ານຂໍ້ຕົກລົງຂອງທ່ານເຈົ້າເມືອງວັງວຽງ ວ່າດ້ວຍການຢັ້ງຢືນຮັບຮອງເອົາຄອບຄົວປ້ອງກັນຊາດເຂັ້ມແຂງ ແລະ ຜ່ານຂໍ້ຕົກລົງຂອງທ່ານເຈົ້າແຂວງວຽງຈັນ ວ່າດ້ວຍການຢັ້ງຢືນ ແລະ ຮັບຮອງເອົາ 18 ບ້ານທີ່ຂຶ້ນກັບເມືອງວັງວຽງ ເປັນບ້ານປ້ອງກັນຊາດເຂັ້ມແຂງ. ຈາກນັ້ນ ທ່ານ ຄຳພັນ ສິດທິດຳພາ  ແລະ  ທ່ານ ບຸນຈັນ ມາລາວົງ ໄດ້ໃຫ້ກຽດຂຶ້ນມອບໃບຢັ້ງຢືນໃຫ້ແກ່ ຄອບຄົວປ້ອງກັນຊາດເຂັ້ມແຂງ ແລະ ບ້ານ 18 ບ້ານ.
        ໂອກາດດັ່ງກ່າວ, ທ່ານ ຄຳພັນ ສິດທິດຳພາ  ກໍໄດ້ໃຫ້ກຽດໂອ້ລົມ ສະແດງຄວາມ ຍ້ອງຍໍຊົມເຊີຍ ຕໍ່ຜົນງານ ແລະ ຜົນສຳເລັດຫຼາຍດ້ານ ທີ່ອໍານາດການປົກຄອງ ທຸກຂັ້ນຍາດມາໄດ້ໃນໄລຍະຜ່ານມາ ພ້ອມທັງຮຽກຮ້ອງໃຫ້ແຕ່ລະພາກສ່ວນຕະຫຼອດຮອດ ປະຊາຊົນທີ່ໄດ້ກາຍເປັນຄອບຄົວ ແລະ ບ້ານປ້ອງກັນຊາດເຂັ້ມແຂງ ຕ້ອງເປັນເຈົ້າການສືບຕໍ່ປະກອບສ່ວນເຂົ້າຮ່ວມການຈັດຕັ້ງເຄື່ອນໄຫວເຮັດວຽກງານ ປ້ອງກັນຊາດ - ປ້ອງກັນຄວາາມສະຫງົບ ໃນການປົກປັກຮັກສາບ້ານຊ່ອງຂອງຕົນ, ປັບປຸງຕາໜ່າງກອງຫຼອນຂັ້ນບ້ານໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ຮູ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນເປັນເຈົ້າການປະສານສົມທົບກັບຂັ້ນເທິງ ແລະ ພາກສ່ວນກ່ຽວຂ້ອງ ໃນເວລາມີສະພາບການໃຫ້ທັນກັບເວລາ ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ໜໍ່ແໜງທີ່ຈະກໍ່ໃຫ້ເກີດຄວາມບໍ່ສະຫງົບຢູ່ທ້ອງຖິ່ນຂອງຕົນໃນສະເພາະໜ້າ ແລະ ຍາວນານ. ໃນຕອນທ້າຍ ຍັງໄດ້ເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສິຣິມຸງຄຸນອີກດ້ວຍ.
ຂ່າວ-ພາບ: ແຂວງວຽງຈັນ