ຈຸດປະສົງຂອງການຈັດງານຄັ້ງນີ້, ເພື່ອໃຫ້ທຸກຄົນໃນສັງຄົມເຫັນໄດ້ຄວາມສຳຄັນຂອງເດັກນ້ອຍ ທີ່ເປັນອານາຄົດຂອງຊາດ, ເອົາໃຈໃສ່ປູກຈິດສຳນຶກໃຫ້ອານຸຊົນ ແລະ ເຍົາວະຊົນລຸ້ນຫຼັງ ໃຫ້ມີຄວາມຮັກ ແລະ ຜູກພັນກັບທຳມະຊາດ ໂດຍສະເພາະປ່າໄມ້,ທັງເປັນການປຸກລະດົມທຸກພາກສ່ວນ (ພາກລັດ, ເອກະຊົນ, ອົງການຈັດຕັ້ງມະຫາຊົນ ແລະ ນິຕິບຸກຄົນ) ຮ່ວມປະກອບສ່ວນດ້ານວັດຖຸ ແລະ ຈິດໃຈໃນການປົກປ້ອງສິດທິຂອງເດັກ, ພັດທະນາເດັກນ້ອຍທີ່ເປັນອານາຄົດຂອງປະເທດຊາດ ໃຫ້ມີຄວາມຮູ້ຄວາມສາມາດ, ມີສ່ວນຮ່ວມໃນການແກ້ໄຂຄວາມທຸກຍາກ ຕິດພັນກັບການປົກປັກຮັກສາ ແລະ ຄຸ້ມຄອງຊັບພະຍາກອນທຳມະຊາດໃຫ້ຍືນຍົງ.ເບ້ຍໄມ້ທີ່ນຳມາປູກໃນຄັ້ງນີ້,ມີເບ້ຍໄມ້ວິກ, ໄມ້ດູລາຍ, ຕົ້ນກາເຟ, ຕົ້ນຄາເດເມັຍ ແລະ ຕົ້ນໄມ້ກິນໝາກຈໍານວນໜຶ່ງ, ມີຈໍານວນທັງໝົດ 600 ເບ້ຍ.
ໃນພິທີດັ່ງກ່າວ, ທ່ານ ນາງ ເຮືອຍ ສົມຫວັງ ໄດ້ມີຄໍາເຫັນກ່າວເປີດ ວັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນຢ່າງເປັນທາງການ ແລະ ກໍໄດ້ແຈກຢາຍອຸປະກອນການຮຽນເປັນຕົ້ນ ປືມຂຽນ, ບິກ,ສໍ ແລະ ເຂົ້າໜົມໃຫ້ແກ່ນ້ອງນ້ອຍເຍົາວະຊົນ. ຈາກນັ້ນ, ຄະນະນໍາຂອງເມືອງ ແລະ ແຂກທີ່ເຂົ້າຮ່ວມທັງໝົດກໍໄດ້ຮ່ວມກັນປູກຕົ້ນໄມ້, ຢ່າງເປັນຂະບວນຟົດຟື້ນຊຶ່ງປູກຢູ່ຕາມສໍານັກງານຫ້ອງການ, ໂຮງຮຽນ,ໂຮງໝໍ ແລະ ສະຖານທີບ່ອນອື່ນໆຕາມເງື່ອນໄຂຂອງແຕ່ລະບຸກຄົນ.
(ພາບ-ຂ່າວ: ຄໍາປິງ)
ຄໍາເຫັນ