ນະຄອນໄກສອນພົມວິຫານ ຈັດງານບຸນອອກພັນສາ-ຊ່ວງເຮືອປະຈຳປີ

ພິທີງານບຸນປະເພນີອອກພັນສາ-ຊ່ວງເຮືອປະຈຳປີ ພ.ສ 2566 ໄດ້ຂຶ້ນໃນວັນທີ 30 ຕຸລາ ຜ່ານມາ ທີ່ສາລາແຄມຂອງນະຄອນໄກສອນພົມວິຫານ ແຂວງ ສະຫວັນນະເຂດ. ໂດຍມີທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມຄະນະການນຳແຂວງ, ນະຄອນ, ເມືອງ, ມີທ່ານ ບົວເຮືອງ ເມກສົມ ຮອງຜູ້ວ່າຣາຊະການແຂວງມຸກດາຫານປະເທດໄທ, ຕະຫຼອດຮອດມວນຊົນຊາວແຂວງສະຫວັນນະເຂດເຂົ້າຮ່ວມ.
ໃນພິທີ, ທ່ານ ປະສົງສິນ ຈະເລີນສຸກ ເຈົ້ານະຄອນໄກສອນພົມວິຫານ ໄດ້ລາຍງານວ່າ: ງານບຸນປະເພນີອອກພັນສາ-ຊ່ວງເຮືອ ໄດ້ເລີ່ມຄົບງັນມາຕັ້ງແຕ່ວັນທີ 21 ຕຸລາ ຈົນຮອດມື້ນີ້, ກົງກັບວັນທີ 30 ຕຸລາ 2023 ນັບເປັນເວລາ 10 ວັນເຕັມ, ຢູ່ໃນງານແຕ່ລະຄືນ ກໍມີມວນຊົນຊາວນະຄອນໄກສອນພົມວິຫານ ແລະແຂກມາຈາກຕ່າງເມືອງ, ຕ່າງແຂວງ ກໍໄດ້ມາທ່ອງທ່ຽວງານ ຊົມການວາງສະແດງ ແລະຈຳໜ່າຍຂາຍສິນຄ້າປະເພດຕ່າງໆ ຈາກບັນດາຫົວໜ່ວຍທຸລະກິດ, ຫ້າງຮ້ານທັງພາກລັດ, ເອກະຊົນ ທັງພາຍ ແລະຕ່າງແຂວງຈຳນວນກວ່າ 200 ຮ້ານ. ນອກຈາກນັ້ນ, ຍັງມີວົງດົນຕີ ແລະເຄື່ອງຫຼິ້ນຫຼາກຫຼາຍປະເພດ ທີ່ໄດ້ສ້າງຄວາມບັນເທີງ ແລະໃຫ້ຄວາມມ່ວນຊື່ນແກ່ມວນຊົນທີ່ມາທ່ອງທ່ຽວໃນງານ.  ນອກຈາກນີ້, ທາງຄະນະກໍາມະການພວກເຮົາຍັງມີບັນດາກິດຈະກໍາອື່ນທີ່ໜ້າສົນໃຈເຊັ່ນ: ການແຂ່ງຂັນແຈັດສະກີ, ຕັກບາດຖວາຍສັງຄະທານ, ວຽນທຽນ, ການປະກວດກະໂທງງາມ(ໂດຍນໍາໃຊ້ວັດສະດຸຈາກທໍາມະຊາດ), ການໄຫຼເຮືອໄຟ, ຊົມຂະບວນຟ້ອນປະເພນີຈາກ 6 ກຸ່ມບ້ານພັດທະນາໃນເທດສະບານນະຄອນ-ໂຮງຮຽນມັດທະຍົມຕ່າງໆ ແລະຂະບວນຟ້ອນມິດຕະພາບລາວ-ໄທ, ຊົມການພາຍເຮືອເປີດໜ້ານໍ້າຕີຊ້າງນໍ້ານອງ, ພິເສດກໍແມ່ນຊົມການຊ່ວງເຮືອ ຊຶ່ງປະກອບມີ 2 ປະເພດ 4 ຮຸ່ນຄື: ເຮືອປະເພນີ ຫຼື ເຮືອເຈາະ 41-55 ສີພາຍ ມີ 4 ລຳ, ເຮືອສູດ ຫຼື ເຮືອຕິດຮຸ່ນ 41-55ສີພາຍ ມີ 4 ລຳ, ເຮືອປະເພດກາງ 31-40 ສີພາຍ 6 ລຳ ແລະເຮືອປະເພດກິລາ 12 ສີພາຍມີ 12 ລຳ.
ຈາກນັ້ນ, ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນປະທານຈັດງານ ໄດ້ກ່າວເປີດງານວ່າ: ການຈັດງານບຸນປະເພນີອອກພັນສາ-ຊ່ວງເຮືອປະຈໍາປີ ພ.ສ 2566 ຄັ້ງນີ້ ກໍເພື່ອເປັນການປະຕິບັດບຸນປະເພນີປະຈໍາເດືອນ 11(ລາວ) ຂອງປະຊາຊົນລາວບັນດາເຜົ່າພາຍໃນ 12 ເດືອນຊຶ່ງເປັນບຸນປະເພນີທີ່ເຄີຍປະຕິບັດສືບທອດກັນມາແຕ່ຄາວບູຮານນະການ ຈົນເຖິງປັດຈຸບັນ ທີ່ຄົນລາວເຮົາໄດ້ເຄົາລົບນັບຖື ແລະປະຕິບັດຕາມໃຫ້ຖືກກັບຂະນົບທໍານຽມອັນດີງາມຂອງຊາດລາວເຮົາຕະຫຼອດມາ, ທັງເປັນການສົ່ງເສີມການທ່ອງທ່ຽວທາງດ້ານວັດທະນະທໍາ ເພື່ອດຶງດູດເອົາການທ່ອງທ່ຽວ, ການຄ້າຂາຍ, ການລົງທຶນພາຍໃນແຂວງ, ຕ່າງແຂວງ, ຕ່າງປະເທດເຂົ້າມາທ່ອງທ່ຽວ ແລະລົງທຶນຢູ່ແຂວງສະຫວັນນະເຂດໃຫ້ຫຼາຍຂຶ້ນ ທັງເປັນການກະຕຸກຊຸກຍູ້ເສດຖະກິດຂອງແຂວງໃຫ້ຂະຫຍາຍຕົວຢ່າງຕໍ່ເນື່ອງ ແລະນັບມື້ໃຫ້ຫຼາຍຂຶ້ນເທື່ອລະກ້າວ. ໂອກາດນີ້, ທ່ານ ບຸນໂຈມ ອຸບົນປະເສີດ ກໍໄດ້ໃຫ້ກຽດລັ່ນ 9 ບາດ ເພື່ອເປັນສັນຍາລັກຂອງການເປີດງານບຸນອອກພັນສາ-ຊ່ວງເຮືອປະຈຳປີນີ້ຢ່າງເປັນທາງການ. 
ການຊ່ວງເຮືອປີນີ້ ໄດ້ດຳເນີນໄປທ່າມກາງສຽງຊົມສຽງເຊຍຢ່າງແໜ້ນໜາ ເຮັດໃຫ້ບັນຍາກາດຂອງງານມີສີສັນ ແລະຄຶກຄື້ນມ່ວນຊື່ນ ຜົນປະກົດວ່າ: ປະເພດເຮືອ 55 ສີພາຍ ແມ່ນເຮືອເທບພອນໄຊ(ນະຄອນໄກສອນພົມວິຫານ) ເປັນເຈົ້າທ່າຂອງປີນີ້(ທີ1), ທີ2 ເຮືອວິສຸດໂທນາວາ ບ້ານຫົວເມືອງໃຕ້ ນະຄອນໄກສອນພົມວິຫານ, ທີ3 ແມ່ນເຮືອແພເມືອງຟ້າ ແລະທີ4 ເຮືອເຈົ້າພໍ່ແສນເມືອງ ບ້ານຫົວເມືອງໃຕ້ ນະຄອນໄກສອນພົມວິຫານ; ປະເພດເຮືອເຈາະ 55 ສີພາຍ ທີ1 ເຮືອເຈົ້າພໍ່ເກດແກ້ວ ບ້ານຫົວເມືອງໃຕ້ ນະຄອນໄກສອນພົມວິຫານ, ທີ2ເຮືອແກ້ວຟ້າມີໄຊຈະເລີນຊັບ ບ້ານບຸ່ງນາດີ ເມືອງໄຊພູທອງ, ທີ3 ເຮືອຮຸ່ງເຮືອງໄຊ ບ້ານທ່າດ່ານ ເມືອງໄຊພູທອງ ແລະທີ4 ແມ່ນເຮືອນາງ ຫຼາວທອງ ບ້ານຫົວຫາດ ເມືອງໄຊພູທອງ; ສຳລັບປະເພດເຮືອກາງ 35 ສີພາຍ ທີ1 ເຮືອນາງສາວສະຫວີວັນ ບ້ານບຸ່ງນາດີ ເມືອງໄຊພູທອງ, ທີ2 ເຮືອນາງສາວຈັນເພັນ ບ້ານທ່າດ່ານ ເມືອງໄຊພູທອງ, ທີ3 ເຮືອນາງ ຫຼາວທອງ ບ້ານຫົວຫາດ ເມືອງໄຊພູທອງ ແລະ ທີ4 ເຮືອແກ້ວໄພລິນ 9 ຈະເລີນ ບ້ານຈອມແກ້ວ ນະຄອນໄກສອນພົມວິຫານ; ປະເພດເຮືອນ້ອຍ(ເຮືອກິລາ) 12 ສີພາຍ ທີ1 ເຮືອລູກຊາຍຫຼ້າ ບ້ານທ່າຊະໂນ ນະຄອນໄກສອນພົມວິຫານ, ທີ2 ເຮືອຂຸນເດດ 9 ຈະເລີນ ບ້ານຈອມແກ້ວ ນະຄອນໄກສອນພົມວິຫານ, ທີ3 ເຮືອພອນຈະເລີນ ບ້ານນາຍອນ ເມືອງອາດສະພອນ ແລະທີ4 ໄດ້ແກ່ເຮືອວັນພອນຈະເລີນນຳໂຊກ ບ້ານແກ້ງກອກ ເມືອງຈຳພອນ. ໃຫ້ກຽດມອບຂັນລາງວັນ ແລະເງິນລາງວັນໃນປະເພດຕ່າງໆ ໂດຍທ່ານເຈົ້ານະຄອນໄກສອນພົມວິຫານ ພ້ອມຄະນະການນຳຂອງນະຄອນ ຜັດປ່ຽນກັນຂຶ້ນມອບ.
ຂ່າວ-ພາບ:ສະຫວັນນະເຂດ