ໃນໂອກາດດັ່ງກ່າວ, ທ່ານ ຣັດສະໝີ ດວງສັດຈະ ໄດ້ແຈ້ງສະພາບການເຄື່ອນໄຫວ ໂດຍຫຍໍ້ໃຫ້ທ່ານເຈົ້າແຂວງຮັບຊາບ, ຊຶ່ງພາຍຫຼັງມາຮອດນະຄອນປາກເຊແລ້ວ ກໍໄດ້ເດີນທາງສູ່ພື້ນທີ່ການຜະລິດຢູ່ເມືອງປາກຊ່ອງ ໂດຍມີທ່ານຮອງຜູ້ອໍານວຍການໃຫຍ່ທະນາຄານນະໂຍບາຍ (ທນບ), ທ່ານຮອງຫົວໜ້າສາຂາ ທຫລ ພາກໃຕ້ ແຂວງຈໍາປາສັກ, ທ່ານຮອງເຈົ້າເມືອງປາກຊ່ອງ, ທ່ານຫົວໜ້າສາຂາ ທນບ ແຂວງຈຳປາສັກ ພ້ອມດ້ວຍພະນັກງານກ່ຽວຂ້ອງ ແລະ ປະຊາຊົນເຂົ້າຮ່ວມ.
ເມືອງປາກຊ່ອງ ມີຍອດສິນເຊື່ອເຂົ້າເຖີງ 112 ກຸ່ມ, 626 ຄອບຄົວ ວົງເງິນທັງໝົດ 17,035,118,000 ກີບ; ສະເພາະຢູ່ບ້ານ ກອງຕູ່ນ ມີສິນເຊື່ອເຂົ້າເຖີງ ມີ 2 ເປົ້າໝາຍ: ປູກຜັກ, ປຸກກາເຟ, ຈໍານວນ 6 ກຸ່ມ, 50 ຄອບຄົວ. ວົງເງິນອະນຸມັດທັງໝົດ 3,220,000,000 ກີບ, ຍອດເຫຼືອຕົ້ນທຶນ 3,220,000,000 ກີບ, ດອກເບ້ຍຄ້າງ (ບໍ່ມີ). ມີລາຍບຸກຄົນ 4 ລາຍ, ວົງເງິນ 1,100,000,000 ກີບ. ຈາກນັ້ນ, ຄະນະດັ່ງກ່າວ ຍັງໄດ້ລາຍງານຜົນການໄປຕິດຕາມເບິ່ງການຜະລິດຂອງຊາວກະສິກໍາທີ່ຮັບເງິນກູ້ຈາກ ທນບ ໃນການເຮັດສວນປູກຜັກກະລໍ່າປີ, ປູກກາເຟ ແລະ ລ້ຽງສັດ ຂອງປະຊາຊົນບ້ານກອງຕຸ່ນ ເຫັນວ່າໄດ້ຮັບໝາກຜົນຕົວຈິງດີ, ແຕ່ລາຄາຜັກກະລໍ່າປີ ປີນີ້ຕົກເຫຼືອພຽງແຕ່ 1,600 - 1,700 ກີບ/ກິໂລ ແລະ ປີກາຍນີ້ ລາຄາສູງເຖິງ 10,000 ກ່ວາກີບ/ກິໂລ ຊຶ່ງຊາວສວນບ້ານ ໄດ້ສະເໜີໃຫ້ຂັ້ນເທິງຊອກຫາຕະຫຼາດ ທີ່ໝັ້ນທ່ຽງ ເພື່ອຄໍ້າປະກັນຜົນຜະລິດ ແລະ ສະເໜີໃຫ້ທາງ ທນບ ເພີ່ມຕົ້ນທຶນການຜະລິດ, ເພີ່ມເວລາກູ້ຢືມ, ປ່ອຍສິນເຊື່ອໃຫ້ທັນລະດູການ ແລະ ຂໍໃຫ້ພິຈາລະນາປັບຫຼຸດດອກເບ້ຍໃຫ້ຕໍ່າລົງກ່ວາເກົ່າ ຍິ່ງເປັນການດີ.
ໃນໄລຍະດຽວກັນ, ຄະນະດັ່ງກ່າວ ຍັງໄດ້ລົງພື້ນທີ່ການຜະລິດຫັດຖະກໍາຕໍ່າຫູກ-ແຜ່ນແພ ຢູ່ບ້ານສະຜ່າຍ ຊຶ່ງເປັນບ້ານໃຫຍ່ ຂອງເມືອງຊະນະສົມບູນ, ເປັນບ້ານຕົ້ນແບບໃນການເຂົ້າເຖິງແຫຼ່ງທຶນເງິນກູ້ 1,1 ຕື້ກີບ ໂດຍເຂົ້າເຖິງເປົ້າໝາຍຫັດຖະກໍາ 170 ລ້ານກີບ, ລ້ຽງງົວ 630 ລ້ານກີບ, ລູກຄ້າລາຍບຸກຄົນ 300 ລ້ານກີບ ຂາຍເຄື່ອງຍ່ອຍ. ຕໍ່ບັນຫາດັ່ງກ່າວ, ທ່ານ ນາງ ຂັນພອນ ໄຊຍະເສນສຸກ ຮອງນາຍບ້ານ ໄດ້ສະເໜີຂໍເງິນກູ້ເພີ່ມຕື່ມ ເພື່ອໃຫ້ຊາວບ້ານ ທີ່ເພີ່ມຈໍານວນສະມາຊິກຂຶ້ນ ແລະ ໃຫ້ຜູ້ທີ່ເຮັດການຜະລິດ ທີ່ທຳແທ້ເຮັດຈິງ ໃນປີ 2025 ໃນວົງເງິນກູ້ 4.75 ຕື້ກີບ; ສະເພາະບ້ວງເງິນກູ້ຫັດຖະກໍາ ແມ່ນສະເໜີຂໍກູ້ໃນໄລຍະ 3 ປີ.
ໂອກາດນີ້, ທ່ານ ອາລຸນໄຊ ສູນນະລາດ ໄດ້ສະແດງການຕ້ອນຮັບ ແລະ ຊົມເຊີຍທ່ານ ຣັດສະໝີ ດວງສັດຈະ ພ້ອມຄະນະ ທີ່ໄດ້ມີຄວາມພະຍາຍາມຊອກຫາຂໍ້ມູນຄວາມຈິງ ເພື່ອລາຍງານໃຫ້ທາງແຂວງ ກໍຄືສັງຄົມໄດ້ຮັບຊາບຄວາມເປັນຈິງ ເພື່ອນໍາມາປັບປຸງແກ້ໄຂໃຫ້ຖືກຕ້ອງ ຕາມຫຼັກວິຊາການ, ຄວາມເປັນຈິງ, ລະບຽບການ. ພ້ອມນັ້ນ ທ່ານເຈົ້າແຂວງ ຍັງໄດ້ຊີ້ບອກໃຫ້ຮູ້ການພັດທະນາເສດຖະກິດ-ສັງຄົມ ຂອງແຂວງ ມີຫຼາຍບັນຫາ ທີ່ພົ້ນເດັ່ນ ເປັນຕົ້ນທາງດ້ານການຄ້າ, ການລົງທຶນ, ການທ່ອງທ່ຽວ, ການຜະລິດກະສິກຳສະອາດ, ການຄ້າຄາບອນເຄຼດິດ, ການເກັບລາຍຮັບເຂົ້າງົບປະມານໄດ້ເກີນແຜນ 400 ກ່ວາຕື້ກີບ; ວຽກງານກໍ່ສ້າງຊັບພະຍາກອນມະນຸດ ແລະ ສໍາຄັນແມ່ນວຽກງານການບູລະນະ, ກໍ່ສ້າງ ແລະ ປັບປຸງ ສ້ອມແປງເສັ້ນທາງ ພາຍໃນແຂວງ ເພື່ອເປັນຂອງຂວັນ ມອບໃຫ້ແກ່ກອງປະຊຸມໃຫຍ່ອົງຄະນະພັກແຂວງຈໍາປາສັກ ທີ່ຈະເປີດຂຶ້ນໃນຕໍ່ໜ້ານີ້.
(ແຫຼ່ງຂ່າວ: ດວງສັດຈະ)
ຄໍາເຫັນ