ລາຍງານຈາກມະຫາວິທະຍາໄລ EdithCowan ໃນລັດ Western Australia ຊຶ່ງເຜີຍແຜ່ໃນເວັບໄຊ Science Media Exchange ຫວ່າງບໍ່ດົນມານີ້ ລະບຸວ່າ: ເຖິງຈະຍັງບໍ່ໄດ້ນຳໄປປະຍຸກໃຊ້ກັບຫຸ່ນຍົນຈິງ ແຕ່ໃນໄວໆນີ້ການຄົ້ນຄວ້າອາດຈະມີຜົນກະທົບຕໍ່ລະບົບທາງຄວາມຮູ້ສຶກໃນດ້ານການສະໜັບສະໜູນສຸຂະພາບຈິດ, ການບໍລິການລູກຄ້າ ແລະ ການສຶກສາທົ່ວໂລກ.
ລາຍງານລະບຸວ່າ: ທີມນັກຄົ້ນຄວ້າມະຫາວິທະຍາໄລດັ່ງກ່າວໄດ້ກ້າວຂ້າມເຕັກນິກແບບດັ່ງເດີມທີ່ວິເຄາະຮູບພາບຂອງໃບໜ້າແບບດຽວ, ໂດຍຫັນມາຝຶກອົບຮົມ AI ດ້ວຍຮູບພາບຂອງໃບໜ້າທີ່ສະແດງຄວາມຮູ້ສຶກສາທີ່ກ່ຽວຂ້ອງແທນ ຊຶ່ງເຮັດໃຫ້ສາມາດຕີຄວາມຮູ້ສຶກໄດ້ຢ່າງເລິກເຊິ່ງ ແລະ ໃກ້ຄຽງກັບມະນຸດຫຼາຍຍິ່ງຂຶ້ນ.
ທ່ານ ຊາຣຈີລ ຕາຮີ ຜູ້ນຳຂອງການສຶກສາກ່າວວ່າ: ວິທີນີ້ໃຊ້ການສະແດງອອກທາງໃບໜ້າຫຼາຍ ແບບເພື່ອໃຫ້ມີຂໍ້ມູນປະກອບການຄະເນຄວາມຮູ້ສຶກຫຼາຍຂຶ້ນ, ເຊັ່ນດຽວກັບທີ່ພວກເຮົາບໍ່ສາມາດຕັດສິນຄວາມຮູ້ສຶກຂອງຜູ້ອື່ນຈາກການເບິ່ງພຽງຄັ້ງດຽວ. ອີກທັງວິທີການດັ່ງກ່າວນີ້ຍັງຊ່ວຍເພີ່ມຄວາມໜ້າເຊື່ອຖື ເຖິງວ່າໃບໜ້າຈະປະກົດໃນມູມ ຫຼື ພາຍໃຕ້ແສງສະຫວ່າງທີ່ແຕກຕ່າງກັນ.
ທ່ານ ນີມາ ເມຍນາເຕກີ ໜຶ່ງໃນຜູ້ຂຽນການສຶກສາ ກ່າວວ່າ: ການໃຫ້ AI ໄດ້ຮຽນຮູ້ສັນຍານພາບທີ່ຫຼາກຫຼາຍພາຍໃນກຸ່ມຂໍ້ມູນທີ່ມີໂຄງສ້າງ ບໍ່ພຽງແຕ່ຈະຊ່ວຍເພີ່ມຄວາມຖືກຕ້ອງແຕ່ຍັງເຮັດໃຫ້ເຕັກໂນໂລຊີມີປະສິດທິພາບຫຼາຍຂຶ້ນ.
ໃນປັດຈຸບັນ, ທີມນັກຄົ້ນຄວ້າກໍາລັງສຸມໃສ່ການພັດທະນາຄວາມເຫັນອົກເຫັນໃຈແບບປະດິດ (artificial empathy) ເພື່ອໃຫ້ລະບົບ AI ສາມາດຕອບສະໜອງຕໍ່ຄວາມຮູ້ສຶກຂອງມະນຸດໄດ້ຢ່າງເໝາະສົມ ແລະ ເຮັດໃຫ້ຂະບວນການຕັດສິນໃຈຂອງ AI ມີຄວາມໂປ່ງໃສ ແລະ ເຂົ້າໃຈໄດ້ຫຼາຍຂຶ້ນ.
ທ່ານ ຊາຍິດ ອາຟັດ ອາຈານສອນອາວຸໂສ ແລະ ຜູ້ຊ່ຽວຊານດ້ານ AI ປະຈຳມະຫາວິທະຍາໄລEdithCowan ແລະ ເປັນຫົວໜ້າທີມຄົ້ນຄວ້າຄັ້ງນີ້ ກ່າວວ່າ: ການຄົ້ນຄວ້າດັ່ງກ່າວນີ້ກຳລັງວາງພື້ນຖານໃຫ້ແກ່ເຄື່ອງຈັກທີ່ສາມາດເຂົ້າໃຈ ແລະ ຕອບສະໜອງຕໍ່ຄວາມຮູ້ສຶກຂອງມະນຸດໄດ້ຢ່າງແທ້ຈິງ.
ຄໍາເຫັນ