ເພື່ອສືບທອດພາລະກິດຂອງໜັງສືພິມສືເຖິດ (ຄວາມຈິງ), ໜັງສືພິມເຍີນເຢີນ ໄດ້ຖືກສ້າງຕັ້ງຂຶ້ນໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ II ຂອງພັກ (ເດືອນ 2 ປີ 1951) ໂດຍຜ່ານສົງຄາມຕໍ່ສູ້ກູ້ຊາດອັນສັກສິດຂອງຊາດ, ກ້າວເຂົ້າສູ່ 40 ປີແຫ່ງການປ່ຽນແປງໃໝ່ ແລະ ປະເທດຊາດໄດ້ກຽມພ້ອມທັງທ່າແຮງ ແລະ ກຳລັງແຮງ ເພື່ອກ້າວເຂົ້າສູ່ສັງກາດໃໝ່ແຫ່ງຍຸກສະໄໝ.
ຕະຫຼອດ 75 ປີ ຂອງການປະຕິບັດໜ້າທີ່ອັນມີກຽດສູງສົ່ງ, ໜັງສືພິມເຍີນເຢີນ ຍັງຮັກສາບົດບາດເປັນຄັນທຸງທາງດ້ານແນວຄິດ, ເປັນກະບອກສຽງ ແລະ ເປັນກອງໜ້າປະຈັນບານບຸກທະລຸໃນຂະແໜງສື່ມວນຊົນ - ການໂຄສະນາເຜີຍແຜ່ແນວທາງຂອງພັກ, ລະບຽບກົດໝາຍ ນະໂຍບາຍຂອງ ລັດ ແລະ ປະຊາຊົນ ຢ່າງສະເໝີຕົ້ນສະເໝີປາຍ.
ເມື່ອຫວນຄືນຜົນງານ ແລະ ພາລະບົດບາດຂອງ ໜັງສືພິມເຍີນເຢີນ ນັບແຕ່ມື້ສ້າງຕັ້ງ, ພວກເຮົາຈະເຫັນໄດ້ປະຫວັດສາດການເຕີບໃຫຍ່ຂະຫຍາຍຕົວ ທາງດ້ານເນື້ອໃນ ແລະ ຮູບການ ໃນໜ້າໜັງສືພິມ ທີ່ອຸດົມສົມບູນ ຊຶ່ງສ່ອງແສງໃຫ້ເຫັນລັກສະນະພົ້ນເດັ່ນໄລຍະການຕໍ່ສູ້ກູ້ຊາດ. ການປ່ຽນແປງໃໝ່ - "ການຫັນປ່ຽນທີ່ມີລັກສະນະຊີ້ຂາດຕໍ່ຊະຕາກຳ", ບໍ່ພຽງແຕ່ແມ່ນກົນໄກນະໂຍບາຍເສດຖະກິດໃນໄລຍະໃດໜຶ່ງເທົ່ານັ້ນ, ແຕ່ຍັງແມ່ນຂະບວນການຕໍ່ສູ້ທາງດ້ານແນວຄິດ ແລະ ທິດສະດີອັນຍາວນານ ໂດຍຜ່ານການຄົ້ນຄວ້າ ແລະ ທົດສອບຈາກພຶດຕິກຳຕົວຈິງຢ່າງຫຼວງຫຼາຍ.
ບັນດາຂ່າວ-ບົດ ທີ່ລົງໃນໜ້າໜັງສືພິມ ລ້ວນແຕ່ສ່ອງແສງໃຫ້ເຫັນຄວາມມີຊີວິດຊີວາ ທີ່ສະທ້ອນເຖິງທຸກຂົງເຂດວຽກງານຄື: ດ້ານການເມືອງ-ແນວຄິດ, ການກໍ່ສ້າງພັກ, ການສ້າງສາເສດຖະກິດ, ການຜະລິດກະສິກຳ, ການຄ້າ ແລະ ອື່ນໆ ໜັງສືພິມເຍີນເຢີນ ໄດ້ປະກອບສ່ວນເປັນກະບອກສຽງແຫ່ງຄວາມເປັນຫ່ວງເປັນໄຍໃນການຄົ້ນຄວ້າຊອກຫາວິທີແກ້ໄຂ, ປະສິດທິຜົນຕົວຈິງ ແລະ ທົດລອງຮູບແບບໃໝ່. ນີ້ໄດ້ສະທ້ອນໃຫ້ເຫັນເຖິງການຫັນປ່ຽນໃໝ່ໃນການຈັດຕັ້ງການຜະລິດຄືນໃໝ່, ການປ່ຽນແປງໃໝ່ ກົນໄກການຄຸ້ມຄອງ, ຍົກໃຫ້ເຫັນບົດຮຽນ ແລະ ຂໍ້ສະເໜີແນະຈາກພຶດຕິກຳຕົວຈິງ.
75 ປີກ່ອນໜ້ານີ້, ນັບຕັ້ງແຕ່ໜັງສືພິມສະບັບທຳອິດ ໄດ້ຖືກຈັດພິມອອກ ໃນວັນທີ 11 ມີນາ 1951, ໜັງສືພິມເຍີນເຢີນ ໄດ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງທາງດ້ານປະລິມານ ແລະ ຄຸນນະພາບ, ກາຍເປັນອົງການສື່ມວນຊົນທີ່ມີຫຼາຍຜະລິດຕະພັນ, ມີບົດບາດສຳຄັນໃນການນຳພາ ແລະ ກຳນົດທິດທາງສັງຄົມ ໃຫ້ແກ່ເພື່ອນຜູ້ອ່ານ, ໂດຍສະເພາະແມ່ນຮຸ່ນຊາວໜຸ່ມ.
ການສະເຫຼີມສະຫຼອງ 75 ປີ ໜັງສືພິມອອກສູ່ສາຍຕາມວນຊົນສະບັບທໍາອິດ ແມ່ນກາລະໂອກາດໃຫ້ຖັນແຖວນັກຂ່າວໜັງສືພິມເຍີນເຢີນ ກໍຄືສື່ມວນຊົນຫວຽດນາມ ໄດ້ຮ່ວມກັນທົບທວນຄືນຄວາມຊົງຈຳ ແລະ ຂີດໝາຍທີ່ບໍ່ມີວັນຈາງຫາຍໃນຊີວິດການເປັນນັກຂ່າວ. ໃນການຮ່ວມເດີນທາງໄປກັບປະຊາຊົນທົ່ວປະເທດ ຜ່ານບັນດາສົງຄາມຕໍ່ສູ້ກູ້ຊາດ ເພື່ອປົກປັກຮັກສາເອກະລາດ ແລະ ອິດສະລະພາບຂອງປະເທດຊາດ, ພະນັກງານ ແລະ ນັກຂ່າວຂອງໜັງສືພິມເຍີນເຢີນຫຼາຍທ່ານ ບໍ່ໄດ້ຫວັ່ນກົວຕໍ່ໄພອັນຕະລາຍໃດໆ, ພວກເຂົາເຈົ້າ ໄດ້ເອົາຊີວິດສ່ຽງເຂົ້າໄປໃນສະໜາມຮົບທີ່ດຸເດືອດທີ່ສຸດ ເພື່ອບັນທຶກ ແລະ ສະແດງໃຫ້ເຫັນເຖິງຈິດໃຈການຕໍ່ສູ້ອັນພິລະອາດຫານຂອງກອງທັບ ແລະ ປະຊາຊົນຫວຽດນາມ. ຫຼາຍທ່ານ ໄດ້ເສຍສະຫຼະຊີວິດຢ່າງອົງອາດກ້າຫານ, ກາຍເປັນນັກຂ່າວ-ນັກຮົບເສຍສະຫຼະຊີວິດເພື່ອຊາດ ເພື່ອປະຊາຊົນ.
ຈິດໃຈແຫ່ງການຕໍ່ສູ້ ເພື່ອປົກປັກຮັກສາຄວາມຖືກຕ້ອງ, ຄວາມຍຸຕິທຳ ແລະ ຄວາມດີງາມນັ້ນ ໄດ້ຊຶມເລິກເຂົ້າໃນແນວຄິດຂອງນັກຂ່າວ ທີ່ເປັນກະບອກສຽງຂອງພັກ, ກາຍເປັນເຂັມທິດເຍືອງທາງໃຫ້ແກ່ແຕ່ລະບາດກ້າວຂອງໜັງສືພິມ ທີ່ຄຽງບ່າຄຽງໄຫຼ່ກັບປະຊາຊົນ ໃນເສັ້ນທາງແຫ່ງການສ້າງສາ ແລະ ພັດທະນາປະເທດຊາດ. ຍ້ອນມີຜົນງານອັນພົ້າເດັ່ນ ໃນການເຮັດໜ້າທີ່ການເມືອງຂອງຕົນ, ໜັງສືພິມເຍີນເຢີນ ໄດ້ຮັບການປະດັບຫຼຽນໄຊ ແລະ ນາມມະຍົດອັນສູງສົ່ງ ຈາກພັກ ແລະ ລັດຢ່າງຫຼວງຫຼາຍ, ໃນນັ້ນມີ; ຫຼຽນໄຊດາວຄຳ 1 ໜ່ວຍ, ຫຼຽນໄຊໂຮ່ຈິມິນ 2 ໜ່ວຍ, ນາມມະຍົດວິລະຊົນແຮງງານ ໃນໄລຍະການປ່ຽນແປງໃໝ່, ວີລະຊົນກຳລັງປະກອບອາວຸດປະຊາຊົນ. ນອກຈາກນັ້ນ, ໜັງສືພິມ ເຍີນເຢີນ ຍັງມີຜົນງານອັນໃຫຍ່ຫຼວງ ໃນການປະກອບສ່ວນຊ່ວຍເຫຼືອທາງດ້ານວັດຖຸ ແລະ ຈິດໃຈ ໃຫ້ແກ່ໜັງສືພິມປະຊາຊົນສຽງຂອງສູນກາງພັກປະຊາຊົນ ປະຕິວັດລາວ ນັບແຕ່ມື້ສ້າງຕັ້ງຈົນເຖິງປັດຈຸບັນ ໂດຍສະເພາະແມ່ນການສ້າງບຸກຄະລາກອນນັກຂ່າວແຕ່ລະປີ, ການສ້າງເວບໄຊທີ່ທັນສະໄໝ ແລະ ອື່ນໆ ເປັນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ຫວຽດນາມ - ລາວ ໃຫ້ໝັ້ນຄົງຕະຫຼອດກາລະນານ.
ຜ່ານໄລຍະທາງ 75 ປີ, ຈາກຮູບການສຳນັກງານໜັງສືພິມ ແບບພິມຈຳໜ່າຍ, ໜັງສືພິມເຍີນເຢີນ ໄດ້ພັດທະນາ ກາຍເປັນອົງການສື່ມວນຊົນຫຼາຍຮູບແບບສື່ສິ່ງພິມ ແລະ ຜະລິດຕະພັນສື່ສານທີ່ຫຼາກຫຼາຍ. ນອກຈາກໜັງສືພິມເຍີນເຢີນລາຍວັນແລ້ວ, ຍັງມີສື່ສິ່ງພິມຕ່າງໆຄື: ເຍີນເຢີນທ້າຍອາທິດ, ເຍີນເຢີນລາຍເດືອນ, ສະໄໝນີ້. ພ້ອມທັງສື່ເຍີນເຢີນເອເລັກໂຕຣນິກເປັນ 6 ພາສາຕ່າງປະເທດ, ເພື່ອຕອບສະໜອງຄວາມຕ້ອງການຂໍ້ມູນຂ່າວສານກ່ຽວກັບຫວຽດນາມ ໃຫ້ແກ່ເພື່ອນມິດສາກົນ ທີ່ນັບມື້ເພີ່ມຂຶ້ນ. ຫຼາຍລາຍການ, ກິດຈະກຳ, ຜະລິດຕະພັນສິລະປະ ແລະ ສື່ສານຂອງໜັງສືພິມ ໄດ້ຮັບການຕອບຮັບຢ່າງອົບອຸ່ນຈາກມະຫາຊົນທັງໃນ ແລະ ຕ່າງປະເທດ, ປະກອບສ່ວນຊຸກຍູ້ຈິດໃຈແຫ່ງການປ່ຽນແປງໃໝ່ ແລະ ສ້າງສັນ ໃນຂົງເຂດວຽກງານສື່ມວນຊົນ, ການສື່ສານໃນຂອບເຂດທົ່ວປະເທດ.
ເພື່ອຈົດຈຳຜົນງານອັນດີເດັ່ນເປັນພິເສດ ໃນການປ່ຽນແປງໃໝ່ ວຽກງານການໂຄສະນາເຜີຍແຜ່ ແລະ ການກຳນົດທິດທາງຫາງສຽງສັງຄົມ, ປະກອບສ່ວນປົກປັກຮັກສາພື້ນຖານແນວຄິດຂອງພັກ, ປະທານປະເທດແຫ່ງສາທາລະນະລັດສັງຄົມນິຍົມຫວຽດນາມ ຈຶ່ງໄດ້ຕົກລົງປະດັບ ຫຼຽນໄຊແຮງງານຊັ້ນ I ໃຫ້ແກ່ໜັງສືພິມເຍີນເຢີນ. ການໄດ້ຮັບລາງວັນອັນສູງສົ່ງໃນໂອກາດສະເຫຼີມສະຫຼອງ 75 ປີ ແຫ່ງວັນສ້າງຕັ້ງໜັງສືພິມເຍີນເຢີນ ແມ່ນຄວາມພາກພູມໃຈແລະ ເປັນຄວາມສຸກອັນຍິ່ງໃຫຍ່ ຂອງນັກຂ່າວຂອງພັກ ໃນທຸກມື້ນີ້, ຜູ້ທີ່ພວມສືບຕໍ່ແບກຫາບພາລະໜ້າທີ່ອັນໜັກໜ່ວງຂອງຜູ້ຖືປາກກາປະຕິວັດ, ຮັກສາ "ປາກກາທີ່ແຫຼມຄົມ, ຈິດໃຈທີ່ໃສສະອາດ", ເພື່ອພ້ອມກັນນຳພາໜັງສືພິມຂອງພັກ ໄປສູ່ເພື່ອນຜູ້ອ່ານໃຫ້ກວ້າງຂວາງກວ່າເກົ່າ.
ຄໍາເຫັນ