ພາຍຫຼັງສໍາເລັດການເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປ ຈີນ, ໃນວັນທີ 21 ກັນຍາ ຜ່ານມາ ທ່ານ ສອນໄຊ ສີພັນດອນ ນາຍົກລັດຖະມົນຕີ ຫົວໜ້າຄະນະສະເພາະກິດ 19/ກມສພ ພ້ອມດ້ວຍຄະນະໄດ້ເດີນທາງດ້ວຍລົດໄຟ ລາວ-ຈີນ ຈາກນະຄອນຊຽງຮຸ່ງ ກິ່ງແຂວງສິບສອງພັນນາ ສປ ຈີນ ມາແຂວງຫຼວງນໍ້າທາ ເພື່ອສືບຕໍ່ເຄື່ອນໄຫວຊີ້ນໍາວຽກງານ ໂດຍໃຫ້ການຕ້ອນຮັບ ແລະ ຮ່ວມການເຄື່ອນໄຫວຂອງ ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ ພ້ອມດ້ວຍຄະນະນໍາຂອງແຂວງ, ຄະນະນໍາຂອງເມືອງ ແລະ ພາກສ່ວນທີ່ກ່ຽວຂ້ອງ.
ໃນໂອກາດນີ້ ທ່ານນາຍົກລັດຖະມົນຕີ ພ້ອມດ້ວຍຄະນະໄດ້ລົງຕິດຕາມສະພາບ ການຄຸ້ມຄອງດ່ານສາກົນ ບໍ່ເຕ່ນ ແລະ ການພັດທະນາເຂດເສດຖະກິດພິເສດບໍ່ເຕ່ນແດນງາມ ຊຶ່ງກ່ອນອື່ນ ແມ່ນໄດ້ຮັບຟັງການລາຍງານຈາກ ທ່ານ ອ່ອນຈັນ ຄຳພາວົງ ຮອງເຈົ້າແຂວງ ຜູ້ຊີ້ນຳວຽກງານຂົງເຂດເສດຖະກິດ ກ່ຽວກັບທີ່ຕັ້ງ ແລະ ຈຸດພິເສດຂອງດ່ານ ຊຶ່ງດ່ານສາກົນບໍ່ເຕ່ນ ເປັນດ່ານເຊິ່ງໜ້າກັບດ່ານສາກົນບໍ່ຫານ ສປ ຈີນ, ເປັນດ່ານດິນຕໍ່ແຜ່ນ ລະຫວ່າງ ເມືອງຫຼວງນໍ້າທາ ແຂວງຫຼວງນໍ້າທາ ແລະ ເມືອງຫຼ້າ ກິ່ງແຂວງສິບສອງພັນນາ ປະກອບມີ 3 ດ່ານກວດກາ ຄື: (1) ດ່ານເທິງ ຊຶ່ງມີ 2 ຈຸດກວດກາຄື: ຈຸດກວດກາທາດຫຼວງ ເປັນຈຸດກວດກາຄົນເຂົ້າ-ອອກເມືອງ ແລະ ຈຸດກວດກາຂາເຂົ້າລົດບັນທຸກສິນຄ້າ ທີ່ອະນຸຍາດແຕ່ລົດບັນທຸກສິນຄ້າຂາເຂົ້າເທົ່ານັ້ນ ເປີດບໍລິການທຸກວັນເລີ່ມແຕ່ເວລາ 7:30-19:30 ໂມງ ແລະ 7:30-16:30 ໂມງ ຕາມລໍາດັບ; (2) ດ່ານລຸ່ມ (ດ່ານພາສີສາກົນບໍ່ເຕ່ນ) ເປັນຈຸດກວດກາສິນຄ້າເຂົ້າ-ອອກຜ່ານດ່ານ ເປີດໃຫ້ບໍລິການ ເລີ່ມແຕ່ 8:00-16:30 ໂມງ; ສໍາລັບຜູ້ໂດຍສານ, ພາຫະນະລົດທ່ອງທ່ຽວຢ້ຽມຢາມເຂົ້າ-ອອກ ເປີດບໍລິການແຕ່ 6:00-22:00 ໂມງ; ແລະ (3) ດ່ານສາກົນທາງລົດໄຟລາວ-ຈີນ ເປີດບໍລິການເລີ່ມແຕ່ 8:00-16:30 ໂມງ; ສະພາບການນຳເຂົ້າ-ສົ່ງອອກສິນຄ້າ ຢູ່ດ່ານສາກົນບໍ່ເຕ່ນ ຢູ່ຈຸດກວດກາສິນຄ້າຢູ່ສາງແອວໄອຊີດີ ແລະ ສາງແອວເອສ ລົດບັນທຸກສິນຄ້າຂາເຂົ້າສະເລ່ຍ 189 ຄັນຕໍ່ວັນ, ໃນໄລຍະ 8 ເດືອນຜ່ານມາ ມີສິນຄ້າຂາເຂົ້າທັງໝົດຈໍານວນ 1.150,11 ລ້ານໂຕນ, ມູນຄ່າ 1.231,79 ລ້ານໂດລາ, ທຽບໃສ່ໄລຍະດຽວປີຜ່ານມາເພີ່ມຂຶ້ນ 18,43%; ລົດບັນທຸກສິນຄ້າຂາອອກສະເລ່ຍ 264 ຄັນຕໍ່ວັນ, ມີສິນຄ້າຂາອອກທັງໝົດ 2.235,37 ລ້ານໂຕນ, ມູນຄ່າ 1.270,42 ລ້ານໂດລາ, ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນ 21,26%; ສຳລັບລົດບັນທຸກສິນຄ້າຜ່ານແດນ ຈາກປະເທດໄທ ໄປ ສປ ຈີນ ມີທັງໝົດ 23.405 ຄັນ; ລົດບັນທຸກສິນຄ້າຜ່ານແດນ ຈາກ ສປ ຈີນ ໄປປະເທດໄທ ມີທັງໝົດ 17.183 ຄັນ; ຢູ່ຈຸດກວດກາສິນຄ້າຢູ່ສະຖານີລົດໄຟບໍ່ເຕ່ນ ມີສິນຄ້າຂາເຂົ້າ ສະເລ່ຍ 3 ຫາ 5 ຖ້ຽວຕໍ່ວັນ ຫຼື ປະມານ 20 ຫາ 80 ຕູ້ຕໍ່ວັນ; ສິນຄ້າຂາອອກ (ແຮ່ເຫຼັກ) ສະເລ່ຍ 3 ຫາ 5 ຖ້ຽວຕໍ່ວັນ ຫຼື ປະມານ 200 ຫາ 350 ຕູ້ຕໍ່ວັນ; ສິນຄ້າຜ່ານແດນ (ປະເພດໝາກໄມ້ສົດ) ສະເລ່ຍ 1-2 ຖ້ຽວຕໍ່ວັນ ຫຼື ປະມານ 30 ຫາ 60 ຕູ້ຕໍ່ວັນ. ໃນໄລຍະ 8 ເດືອນຜ່ານມາ ສາມາດຈັດເກັບລາຍຮັບງົບປະມານໄດ້ທັງໝົດ 696,08 ຕື້ກີບ ເທົ່າກັບ 73,71% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາເພີ່ມຂື້ນ 42,17%, ຄາດຄະເນໝົດປີ ຈະສາມາດປະຕິບັດລາຍຮັບງົບປະມານ ໄດ້ຕາມແຜນການປີ.
ສໍາລັບການພັດທະນາເຂດເສດຖະກິດພິເສດ ບໍ່ເຕ່ນແດນງາມ ໄດ້ເອົາໃຈໃສ່ກໍ່ສ້າງພື້ນຖານໂຄງລ່າງ ປັດຈຸບັນໄດ້ສໍາເລັດການປັບໜ້າດິນໃຫ້ພຽງ ແລ້ວຈໍານວນ 800 ຮຕ, ຕາໜ່າງເສັ້ນທາງ ສໍາເລັດ 90%, ຕາໜ່າງໄຟຟ້າ, ນໍ້າປະປາສໍາເລັດ 70%; ສໍາເລັດການສ້າງໂຮງງານນໍ້າປະປາ ທີ່ສາມາດຜະລິດນໍ້າໃຊ້ໄດ້ 10.000 ແມັດກ້ອນຕໍ່ວັນ; ສ້າງຕຶກອາຄານ ປະມານ 20 ກ່ວາຕຶກ ເພື່ອຮອງຮັບການຄ້າ, ການບໍລິການ, ສະຖານທີ່ພັກເຊົາ, ການສຶກສາ, ຮ້ານຄ້າປອດພາສີ, ທະນາຄານ, ໂຮງແຮມ ແລະ ບັນດາຫ້າງຮ້ານ; ໄດ້ກໍ່ສ້າງເສັ້ນທາງ-ອາຄານອ້ອມໜອງນໍ້າ ແລະ ບ້ານນໍ້າທຸງ ເພື່ອສ້າງເປັນເຂດທ່ອງທ່ຽວທາງທໍາມະຊາດ; ເຂດເສດຖະກິດພິເສດບໍ່ເຕ່ນແດນງາມ ລົງທຶນໄປແລ້ວ 2,11 ຕື້ໂດລາ, ມີບັນດາຫົວໜ່ວຍທຸລະກິດ ແລະ ຫ້າງຮ້ານ ລວມທັງໝົດ 298 ບໍລິສັດ ມີທຶນຈົດທະບຽນ 490 ລ້ານໂດລາ ບັນດາທຸລະກິດດັ່ງກ່າວແມ່ນມາຈາກປະເທດຈີນ, ມຽນມາ, ໄທ, ຫວຽດນາມ, ກໍາປູເຈຍ, ສິງກະໂປ, ມາເລເຊຍ ຊຶ່ງມີແຮງງານຢູ່ໃນເຂດມີທັງໝົດ 2.232 ຄົນ (ໃນນີ້ຄົນລາວ 1.783 ຄົນ).
ໃນໂອກາດດັ່ງກ່າວ, ທ່ານນາຍົກລັດຖະມົນຕີ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນສໍາເລັດທີ່ພາກສ່ວນກ່ຽວຂ້ອງ ແລະ ຜູ້ພັດທະນາເຂດເສດຖະກິດພິເສດບໍ່ເຕ່ນແດນງາມ ສາມາດຍາດມາໄດ້ໃນໄລຍະຜ່ານມາ ຊຶ່ງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ; ພ້ອມທັງ ຍົກໃຫ້ເຫັນຄວາມສໍາຄັນຂອງດ່ານດັ່ງກ່າວ ຊຶ່ງເປັນດ່ານຜັນຂະຫຍາຍປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ເຂົ້າກັບຍຸດທະສາດການຫັນປະເທດ ທີ່ບໍ່ມີຊາຍແດນຕິດຈອດກັບທະເລ ມາເປັນປະເທດເຊື່ອມໂຍງເຊື່ອມຈອດກັບພາກພື້ນ; ເປັນດ່ານບໍລິການ ທີ່ນໍາບັນດາສິນຄ້າສົ່ງອອກ-ນໍາເຂົ້າ ມີປະລິມານຈໍານວນຫຼາຍໃນແຕ່ລະວັນ ໂດຍອີງໃສ່ທ່າແຮງດັ່ງກ່າວ ສາມາດສ້າງລາຍຮັບເຂົ້າງົບປະມານຂອງແຂວງເພີ່ມຂຶ້ນ; ໂອກາດນີ້ ທ່ານນາຍົກລັດຖະມົນຕີ ໄດ້ເນັ້ນໜັກໃຫ້ພາກສ່ວນກ່ຽວຂ້ອງ ເອົາໃຈໃສ່ບາງບັນຫາຕື່ມອີກເປັນຕົ້ນ ສືບຕໍ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ດ້ວຍມາດຕະການຕ່າງໆຢ່າງຕັ້ງໜ້າ ແລະ ຕໍ່ເນື່ອງ ເພື່ອຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບຕາມບໍລິເວນຊາຍແດນ; ເອົາໃຈ ໃສ່ພັດທະນາ, ປັບປຸງຍົກລະດັບເສັ້ນທາງຄົມມະນາຄົມ ເພື່ອເປັນການອຳນວຍຄວາມສະດວກ ໃຫ້ແກ່ການຂົນສົ່ງສິນຄ້າເຂົ້າ-ອອກດ່ານ ໃຫ້ວ່ອງໄວຂຶ້ນກວ່າເກົ່າ; ເອົາໃຈໃສ່ຄຸ້ມຄອງການຈັດເກັບລາຍຮັບໃຫ້ຄົບຖ້ວນ; ສົ່ງເສີມການລົງທຶນພາຍໃນ ແລະ ຕ່າງປະເທດ ໂດຍນຳໃຊ້ບົດຮຽນຈາກປະເທດອ້ອມຂ້າງ ເພື່ອດຶງດູດການລົງທຶນທີ່ມີຄຸນນະພາບ ແລະ ນໍາເຂົ້າເງິນຕາຕ່າງປະເທດໃຫ້ຫຼາຍຂຶ້ນ; ສົ່ງເສີມການຜະລິດສິນຄ້າສົ່ງອອກ ເພື່ອທົດແທນການນຳເຂົ້າ; ໃນປີ 2024 ສປປ ລາວ ຈະໄດ້ເປັນປະທານອາຊຽນ ແລະ ເປັນປີທ່ອງທ່ຽວລາວ ສະເໜີໃຫ້ເຂດເສດຖະກິດພິເສດ ບໍ່ເຕນແດນງາມ ເອົາໃຈໃສ່ໂຄສະນາປະຊາສໍາພັນ ບັນດາກິດຈະກໍາການທ່ອງທ່ຽວພາຍໃນເຂດໃຫ້ກວ້າງຂວາງ, ເອົາໃຈໃສ່ປັບປຸງໂຄງລ່າງພື້ນຖານ ສິ່ງອໍານວຍຄວາມສະ ດວກ, ສ້າງກິດຈະກໍາເຊື່ອມໂຍງການທ່ອງທ່ຽວ ໃຫ້ມີບັນຍາກາດໃໝ່ ຄຽງຄູ່ກັບການສ້າງວຽກເຮັດງານທໍາຂອງປະຊາຊົນ ກໍຄື ການມີສ່ວນຮ່ວມຂອງທຸກພາກສ່ວນໃນສັງຄົມ; ເອົາໃຈໃສ່ຄຸ້ມຄອງການນໍາເຂົ້າທຶນຕົວຈິງຂອງການລົງທຶນ ໃຫ້ຜ່ານລະບົບທະນາຄານ ແລະ ສະເໜີໃຫ້ບັນດາບໍລິສັດ ກໍຄືຜູ້ປະກອບການ ທີ່ລົງທຶນພັດທະນາຢູ່ເຂດເສດຖະກິດພິເສດບໍ່ເຕນແດນງາມ ລວມທັງຜູ້ອອກແຮງງານຢູ່ພາຍໃນເຂດເປີດບັນຊີເພື່ອທຸລະກໍາທາງດ້ານການເງິນຜ່ານລະບົບທະນາຄານ ໃຫ້ຖືກຕ້ອງຕາມກົດໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ ຄຽງຄູ່ກັບການສົ່ງເສີມການນໍາໃຊ້ເງິນກີບໃຫ້ຫຼາຍຂຶ້ນ; ເອົາໃຈໃສ່ຈັດຕັ້ງປະຕິບັດບັນດາມາດຕະການ, ແຜນເຄື່ອນໄຫວວຽກຈຸດສຸມ ແລະ ບັນດາເນື້ອໃນນິຕິກໍາ ທີ່ລັດຖະບານໄດ້ກໍານົດ ໃຫ້ມີປະສິດທິຜົນ ແລະ ເປັນຮູບປະທໍາຕົວຈິງຢ່າງແຂງ ແຮງ.
ໃນວັນດຽວກັນທ່ານ ນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປເຄື່ອນໄຫວເຮັດວຽກ ແລະ ຕິດຕາມສະພາບຂົນສົ່ງສິນຄ້າເຂົ້າ-ອອກ ຢູ່ທີ່ດ່ານພາສີສາກົນ ແລະ ສາງຄ່ຽນຖ່າຍສິນຄ້າ LICD; ຕິດຕາມສະພາບການຂົນສົ່ງສິນຄ້າເຂົ້າ-ອອກ ຢູ່ທີ່ດ່ານຄົນເຂົ້າ-ອອກເມືອງ ແລະ ດ່ານສະເພາະລົດບັນທຸກສິນຄ້າດ້ວຍລົດ. ນອກຈາກນີ້, ຍັງໄດ້ໄປຢ້ຽມຢາມດ່ານທາງບົກບໍ່ຫານ, ເຂດຮ່ວມມືພັດທະນາເສດຖະກິດບໍ່ຫານ, ລະບົບການຂົນສົ່ງທາງລົດໄຟ ລາວ-ຈີນ ຢູ່ເມືອງຫຼ້າ ກິ່ງແຂວງສິບສອງພັນນາ ສປ ຈີນ ຕື່ມອີກ.
ຂ່າວ : ຫສນຍ
ຄໍາເຫັນ