ນາຍົກເນັ້ນໃຫ້ຂະແໜງສາທາລະນະສຸກ ສ້າງຄວາມເຂັ້ມແຂງວຽກງານໃຫ້ດີຂຶ້ນເທື່ອລະກ້າວ

ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍຜົນງານ ແລະ ຜົນສໍາເລັດຂອງຂະແໜງສາທາລະນະສຸກຍາດມາໄດ້ໃນໄລຍະຜ່ານມາ. ພ້ອມທັງມີຄໍາເຫັນຊີ້ນໍາ ແລະ ເນັ້ນໜັກບາງບັນຫາໃຫ້ຂະແໜງສາທາລະນະສຸກ ສືບຕໍ່ເອົາໃຈໃສ່ວຽກງານທີ່ສໍາຄັນຈໍານວນໜຶ່ງ ເປັນຕົ້ນໃຫ້ສຸມໃສ່ປະຕິບັດ 14 ຄາດໝາຍ ທີ່ຕິດພັນກັບການປະຕິບັດແຜນພັດ ທະນາເສດຖະກິດ-ສັງຄົມ 5 ປີ ຄັ້ງທີ X (2026-2030) ແລະ ໜ້າວຽກໃນການຈັດຕັ້ງຜັນຂະຫຍາຍ ທີ່ລະບຸໃນດໍາລັດ 08/ນຍ, ລົງວັນທີ 27 ມັງກອນ 2026 ວ່າດ້ວຍການກໍາໜ້າວຽກ ແລະ ແບ່ງຄວາມຮັບຜິດຊອບ ໃນການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາປະຈຳປີ 2026, ພ້ອມສູ້ຊົນປະຕິບັດບັນດາຄາດໝາຍໃຫຍ່ຂອງຂະແໜງການສາທາລະນະສຸກ ໃຫ້ບັນລຸຕາມແຜນທີ່ວາງໄວ້. ພ້ອມກັນນັ້ນ, ໃຫ້ສຸມໃສ່ປະຕິບັດບັນດາຄາດໝາຍ 11 ຕົວຊີ້ບອກ ທີ່ຜ່ານມາບໍ່ສາມາດບັນລຸໄດ້ (4 ຕົວຊີ້ບອກ); ສ້າງຄວາມເຂັ້ມແຂງວຽກງານສົ່ງເສີມສຸຂະພາບ, ກັນພະຍາດຕິດຕໍ່ ແລະ ບໍ່ຕິດຕໍ່ ໄປພ້ອມກັບການສ້າງຄວາມເຂັ້ມແຂງວຽກງານຮັກສາສຸຂະພາບຂັ້ນຕົ້ນ; ຊຸກຍູ້, ສົ່ງເສີມໃຫ້ຊຸມຊົນເຂົ້າຮ່ວມ ແລະ ເປັນເຈົ້າການໃນວຽກງານຮັກສາສຸຂະພາບ ໃຫ້ເປັນຂະບວນການກວ້າງຂວາງ ແລະ ຟົດຟື້ນ; ປັບປຸງການສະໜອງການຮັກສາສຸຂະພາບຂອງແມ່, ເດັກອ່ອນ ແລະ ເດັກນ້ອຍ, ວຽກງານໂພຊະນາການໃນເດັກລຸ່ມ 5 ປີໃຫ້ມີຄຸນນະພາບ, ມີຄວາມເຊື່ອມສານຢ່າງເປັນລະບົບ ແລະ ທົ່ວເຖິງ; ຫັນປ່ຽນໃໝ່ວິທີການສັກວັກຊິນປ້ອງກັນພະຍາດ ດ້ວຍການບໍລິການຢູ່ສະຖານທີ່ບໍລິການ (ໂຮງໝໍ ແລະ ສຸກສາລາ), ປັບປຸງລະບົບສຸຂະອະນາໄມ, ນໍ້າສະອາດ ແລະ ສຸຂາພິບານໃຫ້ມີຄຸນນະພາບ, ທົ່ວເຖິງຊົນນະບົດ, ຫ່າງໄກສອກຫຼີກ ແລະ ບ່ອນເຂົ້າເຖິງຍາກ; ສ້າງຄວາມເຂັ້ມແຂງວຽກເຝົ້າລະວັງ ແລະ ໂຕ້ຕອບທຸກເຫດການສຸກເສີນດ້ານສາທາລະນະສຸກ ທັງຢູ່ສູນກາງ ແລະ ທ້ອງຖິ່ນ, ຍົກສູງວຽກງານວິເຄາະການແພດໃຫ້ໄດ້ມາດຕະຖານເທົ່າທຽມກັບພາກພື້ນ ແລະ ສາກົນ ເພື່ອຮັບປະກັນຄຸນນະພາບໃນການບົ່ງມະຕິ ພະຍາດ; ສ້າງຄວາມເຂັ້ມແຂງໃນການຄວບຄຸມບັນດາພະຍາດຕິດຕໍ່ ທີ່ເປັນບັນຫາດ້ານສາທາລະນະສຸກ ເປັນຕົ້ນ ພະຍາດເອດ, ວັນນະໂຣກ, ມະລາເລຍ, ການຕິດຕໍ່ພະຍາດຈາກສັດສູ່ຄົນ, ແມ່ກາຝາກ ແລະ ພະຍາດອື່ນໆ, ຮັບປະກັນໃຫ້ສາ ມາດຄວບຄຸມໄດ້ ແລະ ລົບລ້າງບາງພະຍາດໃນປີ 2030; ປັບປຸງ, ຍົກລະດັບໂຄງລ່າງພື້ນຖານດ້ານສາທາລະນະສຸກທັງຢູ່ສູນກາງ ແລະ ທ້ອງຖິ່ນໃຫ້ໄດ້ມາດຕະຖານ ໄປພ້ອມກັບການສະໜອງອຸປະກອນການແພດທີ່ທັນສະໄໝ, ຮັບປະກັນການມີຢາທີ່ມີຄຸນນະພາບ ແລະ ພຽງພໍ ຕໍ່ການສະໜອງການບໍລິການ; ຫັນໂຮງໝໍລັດຢູ່ຂັ້ນສູນກາງ, ແຂວງ ສູ່ກົນໄກກຸ້ມຕົນເອງ ແລະ ຄວາມທັນສະໄໝເທື່ອລະກ້າວ, ປັບປຸງຊຸດບໍລິການໃຫ້ສົມຄູ່ກັບການບໍລິການຢູ່ໂຮງໝໍແຕ່ລະຂັ້ນ ຕາມນະໂຍບາຍ 5 ດີ, 1 ພໍໃຈ; ດັດສົມລາຄາຄ່າບໍລິການໃຫ້ສົມເຫດສົມຜົນ, ສ້າງຄວາມເຂັ້ມແຂງລະບົບສົ່ງຕໍ່ຄົນເຈັບ, ຄຸ້ມຄອງສະຖານທີ່ບໍລິການປິ່ນປົວທັງພາກລັດ ແລະ ພາກທຸລະກິດ ລວມທັງ ບຸກຄົນ, ນິຕິບຸກຄົນ ທີ່ດໍາເນີນການບໍລິການປິ່ນປົວ ແລະ ເສີມຄວາມງາມຕາມລະບຽບກົດໝາຍ; ເພີ່ມທະວີຄວາມອາດສາມາດໃນການຜະລິດຢາປິ່ນປົວ ແລະ ຮັກສາສຸຂະພາບ ທັງຢາຫຼວງ ແລະ ຢາພື້ນເມືອງ ເພື່ອສະໜອງໃຫ້ການຊົມໃຊ້ພາຍໃນ, ມີສ່ວນສົ່ງອອກໄປຕ່າງປະເທດ, ຄຸ້ມຄອງການນໍາເຂົ້າຢາ, ອາຫານ, ເຄື່ອງດື່ມ, ເຄື່ອງສໍາອາງຢ່າງມີປະສິດທິຜົນ, ດັດສົມການໍາເຂົ້າ ແລະ ການຜະລິດພາຍໃນຢ່າງມີປະສິດທິຜົນ ແລະ ມີຄວາມກົມກຽວກັບຂະແໜງການກ່ຽວຂ້ອງ; ເພີ່ມທະວີຄວາມເອົາໃຈໃສ່ການອະນຸລັກພືດ-ສັດ, ເຄື່ອງປ່າຂອງດົງເປັນຢາທີ່ຫາຍາກໃກ້ຈະສູນພັນ; ຊຸກຍູ້, ສົ່ງເສີມ ການຄົ້ນຄວ້າ, ການຜະລິດ ແລະ ການສົມທົບການນໍາໃຊ້ຢາພື້ນເມືອງ ແລະ ຢາຫຼວງເຂົ້າໃນການປິ່ນປົວ ແລະ ຮັກສາສຸຂະພາບຂອງປະຊາຊົນລາວບັນດາເຜົ່າໃຫ້ນັບມື້ຫຼາຍຂຶ້ນ; ຍົກສູງຄວາມສາມາດການກໍ່ສ້າງ, ການນໍາໃຊ້ບຸກຄະລະກອນສາທາລະນະສຸກທີ່ມີຄຸນນະພາບ, ຮັບປະກັນໃຫ້ສະຖານທີ່ບໍລິການສາທາລະນະສຸກຢູ່ແຕ່ລະຂັ້ນມີແພດຊ່ຽວຊານ, ຜູ້ຊຳນານງານຄົບຕາມມາດຖານຂອງການບັນຈຸບຸກຄະລາກອນ ເພື່ອຮັບປະກັນການບໍລິການ ທີ່ມີຄຸນນະພາບ; ປະຕິຮູບສະຖາບັນການສຶກສາ-ສາທາລະນະສຸກໃຫ້ມີມາດຕະຖານ ແລະ ຄຸນນະພາບ ເທົ່າທຽມກັບພາກພື້ນ ແລະ ສາກົນ ເພື່ອຮັບປະກັນການສ້າງບຸກຄະລາກອນທີ່ມີຄຸນນະພາບ; ສົມທົບແໜ້ນການຍົກສູງຄຸນນະພາບການບໍລິຫານຄຸ້ມຄອງ, ການບໍລິການ, ການສຶກສາສາທາລະນະສຸກ ໄປພ້ອມກັບການຍົກສູງວຽກງານການຄົ້ນຄວ້າວິທະຍາສາດສາທາລະນະສຸກ ເພື່ອເພີ່ມປະສິດທິພາບຂອງການພັດທະນາສາທາລະນະສຸກຢ່າງເປັນລະບົບ ແລະ ຕໍ່ເນື່ອງ; ຖັນແຖວແພດໝໍໃຫ້ຮັກສານາມມະຍົດ “ນັກຮົບເສື້ອຂາວ” ເພື່ອສ້າງຕົນໃຫ້ເປັນ “ແພດປະຕິວັດ” ທີ່ມີມາດຕະຖານ ນັບມື້ນັບສູງຂຶ້ນ ເພື່ອຕອບສະໜອງຄວາມຮຽກຮ້ອງຕ້ອງການທີ່ນັບມື້ນັບສູງຂອງສະພາບການປະເທດເຮົາ ທັງກຽມພ້ອມຮັບມືກັບສິ່ງທ້າທາຍຕ່າງໆ. ຂະແໜງການສາທາລະນະສຸກ ກໍຄືບັນດາແພດ, ໝໍ, ພະຍາບານ ຕ້ອງເປັນຜູ້ສະດຸ້ງໄວ, ຮຽນຮູ້ສິ່ງໃໝ່ໆ ຢູ່ທຸກເວລາ, ຕິດຕາມສະພາບການ ແລະ ນໍາທັນສະຖານະການດ້ານການເຝົ້າລະວັງ, ແຈ້ງການລ່ວງໜ້າ, ປ້ອງກັນພະຍາດ ແລະ ປິ່ນປົວພະຍາດໃຫ້ທັນການ; ສືບຕໍ່ປະຕິບັດນະໂຍບາຍສາທາລະນະສຸກທົ່ວປວງຊົນ, ຖືເອົາວຽກງານອະນາໄມກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ຖືເອົາວຽກງານປິ່ນປົວ ແລະ ສະໜອງການບໍລິການສຸຂະພາບຢ່າງທົ່ວເຖິງ, ມີຄຸນນະພາບ ຍຸຕິທຳ ແລະ ສະເໝີພາບ ເປັນສໍາຄັນ; ໂຄສະນາສຸຂະສຶກສາ, ສະໜອງຂໍ້ມູນຂ່າວສານ ແລະ ສ້າງຄວາມເຂົ້າໃຈ, ຄວາມຕື່ນຕົວໃນການຮັກສາສຸຂະພາບຂອງປະຊາຊົນໃຫ້ນັບມື້ນັບກວ້າງຂວາງ, ໃຫ້ເປັນວຽກງານປະຈຳ, ຊ່ວຍໃຫ້ພົນລະເມືອງຮູ້ຂໍ້ມູນໃໝ່ໆ ຢ່າງເປັນປົກກະຕິ, ໂດຍຜ່ານພາຫະນະສື່ມວນຊົນໃຫ້ຫຼາຍຂຶ້ນ ປະຕິບັດຫຼັກການ “ຖືເອົາການປ້ອງກັນຮັກສາສຸຂະພາບເປັນບຸລິມະສິດ ຕົ້ນຕໍ, ຖືເອົາການປິ່ນປົວເປັນສໍາຄັນ”. ປັບປຸງກອງທຶນປະກັນສຸຂະພາບໃຫ້ເຂັ້ມແຂງ, ມີປະສິດທິພາບ, ຮັບປະກັນໃຫ້ປະຊາຊົນ ເຂົ້າເຖິງການບໍລິການທີ່ນັບມື້ນັບທົ່ວເຖິງ. ພ້ອມກັນນັ້ນ, ກໍປັບປຸງຂອດການບໍລິຫານສໍາລັບຜູ້ທີ່ນໍາໃຊ້ກອງທຶນປະກັນສັງຄົມ-ປະກັນສຸຂະພາບໃຫ້ວ່ອງໄວ; ຍົກສູງຄຸນນະພາບການບໍລິການສຸຂະພາບຢູ່ໂຮງໝໍຂັ້ນຕ່າງໆ, ຫັນໂຮງໝໍສູນກາງ ແລະ ໂຮງໝໍແຂວງໄປສູ່ຄວາມທັນສະໄໝເທື່ອລະກ້າວ, ທັງທາງດ້ານພື້ນຖານໂຄງລ່າງ, ອຸປະກອນການແພດ ແລະ ປະກອບບຸກຄະລາກອນທີ່ເກັ່ງ, ຊຳນິຊຳນານ, ມີມາດຕະຖານນັບມື້ນັບສູງຂຶ້ນ. ລະບົບການບໍລິຫານຈັດການຂອງໂຮງໝໍ ຕ້ອງຫັນໄປນໍາໃຊ້ລະບົບໄອທີໃຫ້ໄດ້, ສ້າງໃຫ້ໂຮງໝໍ ສາມາດກຸ້ມຕົນເອງເທື່ອລະກ້າວ; ເອົາໃຈໃສ່ພັດທະນາອຸດສາຫະກໍາການຢາໃຫ້ເຂັ້ມແຂງ ທັງໂຮງງານຜະລິດຢາຂອງລັດ ແລະ ການລົງທຶນຂອງພາກເອກະຊົນທີ່ມີແລ້ວພາຍໃນປະເທດ ທັງມີການສົ່ງເສີມໃຫ້ເອກະຊົນມາລົງທຶນຕື່ມດ້ານຜະລິດຕະພັນການແພດ, ສົ່ງເສີມນໍາໃຊ້ທ່າແຮງຢາພື້ນເມືອງຂອງປະເທດເຮົາ ທີ່ມີຄວາມອຸດົມສົມບູນຢ່າງແຂງແຮງ ເພື່ອຊຸກຍູ້ສົ່ງເສີມສົມທົບການປິ່ນປົວຢາຫຼວງ ແລະ ຢາພື້ນເມືອງ (ການແພດສະໄໝໃໝ່ ແລະ ການແພດພື້ນເມືອງ) ໃຫ້ພຽງພໍກັບການນໍາໃຊ້ຄຽງຄູ່ກັບການຮັກສາມາດຕະຖານທີ່ມີຢູ່ ແລະ ປັບປຸງຄຸນນະພາບໃຫ້ຍັບເຂົ້າມາດຕະຖານພາກພື້ນ ແລະ ສາກົນເທື່ອລະກ້າວ; ການຮັກສາສຸຂະພາບທີ່ດີທີ່ສຸດແມ່ນການມີວິໄນ ແລະ ຖືກຫຼັກການ ຕາມຫຼັກວິທະຍາສາດຕາມກົດເກນທຳມະຊາດ ໃນການ ອອກກໍາລັງກາຍ, ເຮັດວຽກ ແລະ ຮັບປະທານອາຫານ ຫາກບໍ່ແມ່ນການປິ່ນປົວ ຫຼື ຮັບປະທານຢາຕາມພະຍາດທີ່ເກີດຂຶ້ນ ຍ້ອນແນວນັ້ນຕ້ອງຖືເປັນບຸລິມະສິດໃນການຮັກສາສຸຂະພາບ, ຖືເອົາການປິ່ນປົວເປັນສໍາຄັນ; ເອົາໃຈໃສ່ຕິດຕາມ, ກວດກາ, ຄຸ້ມຄອງ, ດັດສົມບັນດາໂຮງໝໍ ແລະ ຄຣີນິກເອກະຊົນໃຫ້ເປັນລະບົບ, ທັງເສີມຂະຫຍາຍບົດບາດຄວາມເປັນເຈົ້າການຂອງໂຮງໝໍເອກະຊົນໃນການສະໜອງບໍລິການກວດສຸຂະພາບ ແລະ ປິ່ນປົວພະຍາດໃຫ້ມີຄຸນນະພາບ ແລະ ລາຄາສົມເຫດສົມຜົນ ເພື່ອໃຫ້ປະຊາຊົນສາມາດເຂົ້າເຖິງ ແລະ ມີທາງເລືອກຫຼາຍຂຶ້ນ; ຕ້ອງຄຸ້ມຄອງດ້ານຈັນຍາບັນ-ຈັນຍາທໍາ ບໍ່ໃຫ້ກາຍເປັນການເອົາປຽບ, ເອົາລັດ ໃນການບໍລິການປິ່ນປົວຄົນເຈັບ; ສືບຕໍ່ເປັນເຈົ້າການຮ່ວມມືກັບຄູ່ຮ່ວມພັດທະນາ, ອົງການຈັດຕັ້ງສາກົນ, ປະເທດເພື່ອນມິດ ເພື່ອພັດທະນາວຽກງານສາທາລະນະສຸກໃຫ້ເຂັ້ມແຂງ.
ຂ່າວ-ພາບ: ວັນເພັງ