ເນັ້ນຄໍາເຫັນເຈາະຈີ້ມ ໃນການປະກອບຄໍາເຫັນ ຕໍ່ ສປສສ ແລະ ອອປສ

ຕໍ່ບົດລາຍງານຂອງ ສປສສ, ທ່ານ ນາງ ສູນທອນ ໄຊຍະຈັກ ມີຄໍາເຫັນເຈາະຈີ້ມດັ່ງນີ້:

1). ການສະຫຼຸບຕີລາຄາຜົນສໍາເລັດການເຄື່ອນໄຫວວຽກງານ 5 ປີ (2021-2025) ຜ່ານມາ ຂອງສານປະຊາຊົນ ໂດຍສະເພາະການພິຈາລະນາຄະດີ ຂອງສານປະຊາຊົນແຕ່ລະຂັ້ນ, ບັນດາທ່ານ ເຫັນວ່າ ການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງສອດຄ່ອງກັບຕົວຈິງແລ້ວບໍ່?

2). ຕໍ່ກັບຄາດໝາຍສູ້ຊົນ ທີ່ໄດ້ກໍານົດໃນການພິຈາລະນາຕັດສິນຄະດີຂອງສານ ໃຫ້ມີຄວາມວ່ອງໄວບັນລຸຕາມມະຕິສະພາແຫ່ງຊາດ ກໍານົດຄື: ຄະດີແພ່ງ-ການຄ້າ 75% ຂຶ້ນໄປ, ຄະດີຄອບຄົວ-ເດັກ-ແຮງງານ ແລະ ປົກຄອງ 85% ຂຶ້ນໄປ ແລະ ຄະດີອາຍາ 90% ຂຶ້ນໄປ, ອັດຕາການຂໍອຸທອນ ແຕ່ລະປະເພດຄະດີ ບໍ່ໃຫ້ເກີນ 15% ແລະ ການຈັດຕັ້ງປະຕິບັດ 5ແຜນງານ, 23 ໂຄງການ ແລະ 77 ກິດຈະກໍາຕົ້ນຕໍຂອງສານປະຊາຊົນນັ້ນ ບັນດາທ່ານເຫັນວ່າ ຍັງມີຄາດໝາຍແຜນງານ, ໂຄງການ ແລະ ກິດຈະກໍາໃດ ທີ່ບໍ່ທັນບັນລຸຕາມຄາດໝາຍ ທີ່ ສປສສ ຄວນໄດ້ສືບຕໍ່?

3). ຕໍ່ທິດທາງແຜນການ 5 ປີ (2026-2030) ໃນຕໍ່ໜ້າຂອງສານປະຊາຊົນ, ບັນດາທ່ານເຫັນວ່າ ມີເນື້ອໃນຖືກຕ້ອງຄົບຖ້ວນ ແລ້ວບໍ່? ເປັນຕົ້ນ ການກໍານົດຄາດໝາຍ ແລະ ວຽກງານຈຸດສຸມ ປີ 2026 ຂອງສານປະຊາຊົນ? ເພື່ອຮັບປະກັນໃນການຈັດຕັ້ງປະຕິບັດວຽກງານໃຫ້ມີຜົນສໍາເລັດ ບັນດາທ່ານເຫັນວ່າ ສປສສ ຄວນເພີ່ມມາດຕະການຈັດຕັ້ງປະຕິບັດຄືແນວໃດ?

4). ການປະຕິບັດຫຼັກການໂຕ້ແຍ່ງ, ໂຕ້ຖຽງ ໃນທີ່ປະຊຸມສານ ບັນດາທ່ານເຫັນວ່າ ສານໄດ້ໃຫ້ສິດ ແກ່ຄູ່ຄວາມ ໃນການປະຕິບັດຕາມຫຼັກການດັ່ງກ່າວ ຖືກຕ້ອງ, ຄົບຖ້ວນຕາມກົດໝາຍແລ້ວບໍ່ ຫຼື ຄວນເອົາໃຈໃສ່ບັນຫາໃດຕື່ມ?

5). ກົນໄກການປະສານສົມທົບກັບພາກສ່ວນທີ່ກ່ຽວຂ້ອງ ໃນການດໍາເນີນຄະດີ ເຊັ່ນ: ກະຊວງປ້ອງກັນຄວາມສະຫງົບ, ອົງການໄອຍະການປະຊາຊົນ, ອົງການກວດກາແຫ່ງລັດ, ກະຊວງຍຸຕິທໍາ, ກະຊວງການເງິນ, ກະຊວງກະສິກໍາ ແລະ ສິ່ງແວດລ້ອມ, ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທໍາ ແລະ ການແກ້ໄຂ ຄໍາຮ້ອງຂໍຄວາມເປັນທໍາ ຮ່ວມກັບຄະນະປະຈໍາສະພາແຫ່ງຊາດ, ບັນດາທ່ານ ເຫັນວ່າ ຄວນເພີ່ມທະວີກົນໄກການປະສານງານຮ່ວມກັນຄືແນວໃດ ເພື່ອຮັບປະກັນເຮັດໃຫ້ການດໍາເນີນຄະດີ ແລະ ການພິຈາລະນາຕັດສິນ, ພິພາກສາຄະດີຂອງສານຖືກຕ້ອງ, ຄົບຖ້ວນ, ຮອບດ້ານ ແລະ ພາວະວິໄສ?

6). ການຕີຄວາມໝາຍຂອງບາງມາດຕາຂອງກົດໝາຍ ໄລຍະຜ່ານມາ ໄດ້ມີການປະຕິບັດຄືແນວໃດເຂົ້າໃນການຕັດສິນຄະດີຕ່າງໆ? ມີຄວາມເປັນເອກະພາບແລ້ວບໍ່?

ຕໍ່ບົດລາຍງານຂອງ ອອປສ, ທ່ານ ນາງ ສູນທອນ ໄຊຍະຈັກ ມີຄໍາເຫັນເຈາະຈີ້ມດັ່ງນີ້:

1). ການສະຫຼຸບຕີລາຄາຜົນສໍາເລັດການເຄື່ອນໄຫວວຽກງານ 5 ປີ (2021-2025) ຜ່ານມາຂອງ ອອປສ ໂດຍສະເພາະ ການພິຈາລະນາຄະດີຂອງອົງການໄອຍະການປະຊາຊົນແຕ່ລະຂັ້ນ, ການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ບັນດາທ່ານເຫັນວ່າ ສອດຄ່ອງກັບສະພາບຄວາມເປັນຈິງແລ້ວ ຫຼື ບໍ່?

2). ການກໍານົດທິດທາງ ແລະ ວຽກງານຈຸດສຸມ 5 ປີ (2026-2030) ຕໍ່ກັບການພັດທະນາວຽກງານລວມຂອງອົງການໄອຍະການປະຊາຊົນ ທີ່ໄດ້ກໍານົດ 6 ແຜນງານ, 27 ໂຄງການ ແລະ 104 ກິດຈະກໍາໄວ້ນັ້ນ ເຫັນວ່າ ການກໍານົດດັ່ງກ່າວມີຄວາມເໝາະສົມແລ້ວ ຫຼື ບໍ່? ຫຼື ຄວນມີການປັບປຸງໃນແຕ່ວຽກງານຄືແນວໃດ?

3). ການກໍານົດທິດທາງແຜນການວຽກງານຈຸດສຸມປີ 2026 ບັນດາທ່ານເຫັນວ່າ ມີເນື້ອໃນຖືກຕ້ອງ, ຄົບຖ້ວນ ແລ້ວບໍ່ ຫຼື ຄວນເພີ່ມເຕີມເນື້ອໃນໃດຕື່ມ ເພື່ອສຸມໃສ່ແກ້ໄຂບັນຫາຈຸດອ່ອນຂໍ້ຄົງຄ້າງຜ່ານມາ?;

4. ອີງຕາມກົດໝາຍວ່າດ້ວຍອົງການໄອຍະການປະຊາຊົນ ສະບັບປັບປຸງປີ 2024 ທີ່ໄດ້ກໍານົດ ພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນ ມີພາລະບົດບາດ ສັ່ງຟ້ອງຜູ້ຖືກຫາຂຶ້ນສານ ແລະ ຕິດຕາມກວດກາບັນດາອົງການດໍາເນີນຄະດີ ຕາມຂະບວນການຍຸຕິທໍານັ້ນ, ບັນດາທ່ານ ເຫັນວ່າ ອົງການໄອຍະການປະຊາຊົນ ໄດ້ປະຕິບັດຖືກຕ້ອງ, ຄົບຖ້ວນ, ເຂັ້ມງວດ, ເດັດຂາດ ແລ້ວ ຫຼື ບໍ່ ເປັນຕົ້ນ: ແມ່ນການຕິດຕາມກວດກາ ການປະຕິບັດກົດໝາຍຂອງ ອົງການສືບສວນ-ສອບສວນ, ໃນການນນໍາໃຊ້ວິທີການສືບສວນ-ສອບສວນ ແລະ ນໍາໃຊ້ 7ມາດຕະການສະກັດກັ້ນ?;

5). ການປະຕິບັດພາລະບົດບາດ, ສິດ ແລະ ໜ້າທີ່ ໃນການຕິດຕາມກວດກາ ການເຄົາລົບ ແລະ ປະຕິບັດກົດໝາຍ ໂດຍສະເພາະແມ່ນການຕິດຕາມກວດກາໂດຍໜ້າທີ່, ການຕິດຕາມກວດກາ ຄວາມສອດຄ່ອງຂອງກົດໝາຍ ແລະ ການອອກນິຕິກໍາຕ່າງໆ ຂອງບັນດາອົງການລັດ; ການຕິດ ຕາມກວດກາ ການປະຕິບັດຄໍາຕັດສິນຂອງສານ ແລະ ອື່ນໆ, ບັນດາທ່ານເຫັນວ່າ ອົງການໄອຍະການປະຊາຊົນ ຄວນຕ້ອງໄດ້ເອົາໃຈໃສ່ຕື່ມບັນຫາໃດແດ່ ແລະ ໃຫ້ມີມາດຕະການໃນການແກ້ໄຂ ແນວໃດ?

6). ການກົນໄກການປະສານງານລະຫວ່າງອົງການໄອຍະການປະຊາຊົນ ກັບພາກສ່ວນກ່ຽວຂ້ອງ ທີ່ຮັບຜິດຊອບໃນການດໍາເນີນຄະດີຕາມຂະບວນຍຸຕິທໍາໃນໄລຍະຜ່ານມານັ້ນ ບັນດາທ່ານເຫັນວ່າ ຄວນໄດ້ມີການກໍານົດຄືແນວໃດ ເພື່ອຍົກສູງປະສິດທິພາບຂອງວຽກງານແຕ່ລະພາກສ່ວນ?

(ຂ່າວ: ສຸກສະຫວັນ)