ງານການກຸສົນຮ່ວມມືລາວ-ຈີນ "ຄວາມຫວັງໃໝ່ຫ່ວງໃຍຜູ້ດ້ອຍໂອກາດ"

ງານຄັ້ງນີ້, ຈັດຂຶ້ນເພື່ອລະດົມທຶນ ແລະ ວັດຖຸປັດໄຈໄປຊ່ວຍເຫຼືອຜູ້ທຸກຍາກ ແລະ ຜູ້ດ້ອຍໂອກາດ, ເດັກອານາຖາ ພ້ອມທັງສະໜັບສະໜູນການແກ້ໄຂບັນຫາການຂາດວຽກເຮັດງານທຳ, ສ້າງອາຊີບໃຫ້ ຊາວໜຸ່ມ, ສົ່ງເສີມການສຶກສາ, ຈັດຊື້ອຸປະກອນການຮຽນ ແລະ ອຸປະກອນການແພດໃຫ້ສຸກສາລາ ແລະ ໂຮງໝໍໃນເຂດຫ່າງໄກສອກຫຼີກ ພ້ອມທັງຈັດໂຄງການຝຶກອົບຮົມຈິດອາສາ ເພື່ອໃຫ້ເຍົາວະຊົນຫ່າງໄກຈາກຢາເສບຕິດ ແລະ ປ້ອງກັນການປະລະການຮຽນຂອງຊາວໜຸ່ມເຍົາວະຊົນແຂວງ, ເມືອງ ແລະ ບ້ານທຸກຍາກໃນສປປ ລາວ.

ທ່ານນາງ ວັນພອນ ສໍພາບມີໄຊ ປະທານມູນນິທິແມ່ຍິງລາວກ້າວໜ້າ ກ່າວວ່າ: ງານການກຸສົນຄັ້ງນີ້, ແມ່ນກິດຈະກຳທີ່ສະທ້ອນໃຫ້ເຫັນເຖິງຄວາມຮ່ວມມືອັນແໜ້ນແຟ້ນລະຫວ່າງ ລາວ-ຈີນ ໂດຍສະ ເພາະໃນປີທີສອງປະເທດສະຫຼອງ ຄົບຮອບ 65 ປີ ການສ້າງສາຍພົວພັນທາງການທູດ. ພັກ-ລັດ ສປປ ລາວໄດ້ເອົາໃຈໃສ່ ແລະ ໃຫ້ບຸລິມະສິດຕໍ່ການພັດທະນາແມ່ຍິງ ແລະ ເດັກນ້ອຍ ຄຽງຄູ່ກັບການພັດທະ ນາສັງຄົມ.

ທ່ານ ປ້າ ນາລີ ສີສຸລິດ ໄດ້ກ່າວສະແດງຄວາມຍິນດີ ແລະ ຊົມເຊີຍບັນດາອົງການ, ນັກທຸລະ ກິດ ແລະ ຜູ້ໃຈບຸນທັງຫຼາຍທີ່ໄດ້ປະກອບສ່ວນບໍລິຈາກທຶນ ແລະ ວັດຖຸປັດໄຈເພື່ອຊ່ວຍເຫຼືອແມ່ຍິງ-ເດັກນ້ອຍດ້ອຍໂອກາດ ຊຶ່ງເປັນອະນາຄົດຂອງຊາດ.

ການບໍລິຈາກຄັ້ງນີ້ມີຫຼາຍພາກສ່ວນເຊັ່ນ: ເຂດເສດຖະກິດພິເສດບຶງທາດຫຼວງ ບໍລິຈາກອຸປະກອນກິລາມູນຄ່າ 2,500,000 ຢວນ, ສະຖານີໂທລະພາບອາຊຽນ ບໍລິຈາກ 60 ລ້ານກີບ, ບໍລິສັດໂຊກດີ ຄົມມະນາຄົມຂົນສົ່ງສາທາລະນະຈຳກັດ, ບໍລິສັດລົງທຶນອຸດສາຫະກຳ OMI ຈຳກັດ, ໂຮງແຮມອານພິນ, ບໍລິສັດນໍ້າດື່ມແມ່ນໍ້າໃໝ່ຈຳກັດ, ໂຮງກັ່ນເຫຼົ້າຈີນຫົວເຊັຍກົວບິນ, ບໍລິສັດວັດສະດຸກໍ່ສ້າງຮູບໂສມໃໝ່ລາວ, ໄທ, ຈີນຈຳກັດ, ບໍລິສັດເຕັກໂນໂລຊີການແພດ ຊິນດາລີ ລາວຈຳກັດ, ສະໂມສອນບານເຕະເພີລາລີ້, ຮ້ານອາຫານຕ້າຊ້ວຍ, ຮ້ານຕົບແຕ່ງ ແລະ ສ້ອມແປງລົດຊ່ຽວຊ່ຽງ, ກຸ່ມບໍລິສັດ ຫວູໂຈ ລົງທຶນສາກົນ, ກຸ່ມບໍລິສັດລາດຊະວົງລາວພັດທະນາ ຈຳກັດ, ກຸ່ມບໍລິສັດລາດຊະວົງລາວການທ່ອງທ່ຽວ ແລະ ສຸຂະພາບ ສາກົນ ຈຳກັດ, ສະມາຄົມພັນທະມິດລາດຊາວົງລາວ ເພື່ອສຸຂະພາບສາກົນ.